მსოფლიოს საკლუბო ჩემპიონატის მერვედფინალში პსჟ-მ „ინტერ მაიამი“ 4:0 დაამარცხა. პსჟ მეოთხედფინალში „ფლამენგოსა“ და „ბაიერნს“ შორის გამარჯვებულს შეხვდება.
უპირატესობას თავიდანვე პარიზული გუნდი დაეუფლა, კვარაცხელიამ დრიბლინგის შემდეგ პასი ბარკოლას გაუკეთა, მიუხედავად იმისა, რომ ეს გოლი ვერ გავიდა, მალე პსჟ ნევეშმა თავურით დააწინაურა. 38-ე წუთზე ნევეშმა დუბლი შეასრულა. დუეს ჩაწოდებულ ბურთს ავილესმა საკუთარ კარში მიუჩინა ადგილი, ბოლოს ჰაკიმიმაც გაიტანა და პირველი ტაიმი 4:0 დასრულდა.
მეორე ტაიმში „ინტერ მაიამი“ შედარებით გააქტიურდა, მესის კარგი გადაცემა სუარესმა ვერ გამოიყენა. ტემპი დაეცა, რაც ანგარიშიდან გამომდინარე გასაკვირი არ იყო. „კვარა“ ხშირად იხსნებოდა მარცხენა ფლანგზე, მაგრამ პარტნიორები ხან ვერ ამჩნევდნენ და ხან პასს უგვიანებდნენ. დარჩენილ დროში მოედანზე განსაკუთრებული არაფერი მომხდარა და პარიზულმა გუნდმა ბრწყინვალე გამარჯვება მოიპოვა.
ხვიჩა მესისთან პირველ შეხვედრას ასე იხსენებს:
„ოქროს ბურთის გადაცემის ცერემონიაზე ლიონელ მესი ჩემგან მარჯვნივ იჯდა. ფეხბურთელებს გვითხრეს, რომ სარეკლამო პაუზისას ადგილზე დავრჩენილიყავით.
უცებ მესი ადგა და ჩემკენ წამოვიდა, ვიყურებოდი და ვერ ვხვდებოდი, რა ხდებოდა. ხელი ჩამომართვა და თავის ადგილზე დაბრუნდა. საოცარი გრძნობაა, როცა ამხელა ფეხბურთელი დგება და გამარჯობის სათქმელად შენთან მოდის. მაგარი პიროვნებაა. ძალიან ვაფასებ“, – ვკითხულობთ სერია „ლეგენდების“ წიგნში
