ჟურნალი OK! გიამბობთ კომპანია Safebuddy LLC-ის შესახებ, რომელიც რამდენიმე წლის წინ ნიუ-იორკში დაფუძნდა და მისი საქმიანობა წარმატებით ვითარდება. Safebuddy სპეციალიზდება ფანჯრებისა და მინის სისტემების მონტაჟში, შეკეთებასა და თანამედროვე სტანდარტებით აღჭურვილ მომსახურებაში. კომპანია გამოირჩევა მაღალი ხარისხის მომსახურებით, დეტალებზე ორიენტაციითა და პროფესიონალიზმით. ამ და სხვა საინტერესო საკითხებთან დაკავშირებით კომპანიის დამფუძნებელი და მფლობელი, გიორგი ნინუა გვიამბობს, რომელსაც ფანჯრების მონტაჟისა და შეკეთების სფეროში მრავალწლიანი გამოცდილება აქვს.
გიორგი, გვიამბეთ თქვენ შესახებ, როგორი იყო თქვენი ცხოვრება საქართველოში და როგორ შეცვალა იგი ამერიკამ?
მე ვარ გიორგი ნინუა, საქართველოდან. ბავშვობა და ახალგაზრდობა გავატარე თბილისში, სადაც შრომისმოყვარეობა და ოჯახური ფასეულობები ჩემთვის უპირველესი იყო. საქართველოში ცხოვრებისას ყოველთვის მქონდა სურვილი, ვყოფილიყავი დამოუკიდებელი და რეალიზებული. ამერიკაში ჩამოსვლის შემდეგ ჩემი ცხოვრება მნიშვნელოვნად შეიცვალა – აქ ვისწავლე, რომ შანსი არ მოდის ორჯერ, რომ რთულ გარემოში სწრაფი ადაპტაცია და განვითარება აუცილებელია. იყო უამრავი გამოწვევა და სწორედ ამ გამოწვევებმა გამზარდეს როგორც პიროვნულად, ისე პროფესიულად.
რა თვისებები შეგძინათ ამერიკაში ცხოვრებამ, შეგეცვალათ თუ არა პრიორიტეტები?
ამერიკამ მასწავლა დისციპლინა, მიზანდასახულობა და მუდმივი თვითგანვითარება. აქ გაძლიერდა ჩემი პასუხისმგებლობა ბიზნესის როლში. პრიორიტეტებიც შეიცვალა – ადრე მთავარი იყო სტაბილურობა, ახლა ჩემთვის უპირველესია შვილების მომავალი, მათი დაცვა და მათთვის უკეთესი შესაძლებლობების შექმნა. ასევე, ვისწავლე, რომ დრო ყველაზე ძვირფასი რესურსია და მისი სწორად განაწილება პირდაპირ განსაზღვრავს ჩვენს წარმატებას.
რას მოაქვს წარმატება?
წარმატება მოაქვს უდიდეს შრომას და დისციპლინას. მათ გარეშე ვერ მიიღწევა ვერაფერი მყარი და რეალური. თუმცა, გულწრფელად რომ ვთქვა, მე არ მიმაჩნია, რომ რაიმე განსაკუთრებულ წარმატებას უკვე მივაღწიე. ჩემთვის წარმატება, პირველ რიგში, ნიშნავს იმას, რომ ვისწავლე, როგორ მოვიქცე საკუთარ თავთან ,როგორ დავამარცხო სიზარმაცე, შიში და შიდა წინააღმდეგობები. სწორედ ეს შინაგანი ცვლილება გახდა ჩემთვის ნამდვილი წინსვლის დასწყისი.
გაგვაცანით კომპანია Safebuddy LLC. საიდან გაჩნდა დაფუძნების იდეა?
Safebuddy LLC დაფუძნდა ნიუ-იორკში პროფესიონალური და სანდო ფანჯრის სერვისების მიწოდების მიზნით. კომპანიის დამფუძნებლის მრავალწლიანი გამოცდილება და მაღალი სტანდარტების საჭიროება ადგილობრივ ბაზარზე მთავარი მოტივაცია გახდა. ჩვენ დავიწყეთ საქმიანობა კონკრეტული მიზნებით – შეგვექმნა სერვისი, რომელიც დააკმაყოფილებდა როგორც ინდივიდუალურ, ისე კომერციულ კლიენტებს მაღალ დონეზე.
Safebuddy LLC-ის სრულ მომსახურებასა და შეთავაზებებზე მოგვიყევით.
ჩვენ გთავაზობთ შემდეგ მომსახურებებს:
- ფანჯრების ინსტალაცია და დემონტაჟი;
- ევროპული და ამერიკული სისტემის ფანჯრების შეკეთება;
- შუშისა და სარკეების გამოცვლა;
- მაღაზიებისა და საცხოვრებელი ობიექტებისთვის უსაფრთხოების მინა;
- 85 000-ზე მეტი სახეობის ფანჯრისა და კარის აქსესუარის მიწოდება ონლაინ;
- ასევე გვაქვს გადაუდებელი გამოძახების სერვისი და ვმუშაობთ როგორც საცხოვრებელ, ისე კომერციულ ობიექტებზე.
ვის შეუძლია თქვენი მომსახურებით სარგებლობა?
ჩვენი მომსახურება ხელმისაწვდომია ფიზიკური პირებისთვის, კომერციული დაწესებულებებისთვის, სამშენებლო კომპანიებისა და საჯარო სექტორისთვის. Safebuddy LLC არის რეგისტრირებული Vendor-ი და ასევე, სერტიფიცირებული Home Improvement Contractor ლიცენზიის მფლობელია, რაც საშუალებას გვაძლევს, ვიმუშაოთ სახელმწიფო და მუნიციპალურ პროექტებზე.
ხარისხზე მოგვიყევით.
ჩვენი კომპანიის მთავარი პრიორიტეტია უმაღლესი ხარისხის შესრულებული სამუშაო. ყველა ტექნიკოსი გადის პროფესიულ ტრენინგს, ხოლო სამუშაოები სრულდება უახლესი ტექნოლოგიებითა და სერტიფიცირებული მასალებით. ვთავაზობთ წერილობით გარანტიას შესრულებულ სამუშაოზე და უზრუნველვყოფთ კლიენტის სრულ კმაყოფილებას.
რა უპირატესობებით გამოირჩევა Safebuddy LLC? რა მიგაჩნიათ კომპანიის ნიშად?
ჩვენი უპირატესობები:
- ლიცენზირებული და სანდო გუნდი;
- სწრაფი გამოძახება და გადაუდებელი მომსახურება;
- დეტალური კონსულტაცია და გამჭვირვალე პროცესი;
- მაღალი ხარისხის მასალები და თანამედროვე ტექნოლოგიები;
- სანდოობა და კლიენტზე მაქსიმალური ფოკუსი.
ჩვენი კომპანიის ნიშაა პროფესიონალიზმი, სისწრაფე და მომსახურების მრავალფეროვნება.
როგორია კომპანიის მიზნები და სამომავლო გეგმები?
Safebuddy LLC ისწრაფვის რეგიონულ გაფართოებას, ვგეგმავთ სერვისების მიწოდებას სხვა შტატებშიც, მათ შორის მაიამისა და კალიფორნიაში. ასევე, ვმუშაობთ დამატებითი მიმართულებების განვითარებაზე, როგორიცაა საწმენდი სერვისები და მცირე ზომის კომერციული სამუშაოები. ერთ-ერთი მთავარი მიმართულებაა ციფრული ზრდა, სოციალური მედიის მეშვეობით ბრენდის ცნობადობის ამაღლება და სახელმწიფო ტენდერებში მონაწილეობა.
ტექსტი: ციაკო ღამბაშიძე
ფოტო: პირადი არქივი
