„ამაზონის“ დამფუძნებლის ჯეფ ბეზოსის კომპანიის „ბლუ ორიჯინის“ კოსმოსური ხომალდით, რომლის სახელწოდებაა “New Shepard”, კოსმოსში 6 ქალი გაემგზავრა. ეკიპაჟის წევრებს შორის იყვნენ პოპვარსკლავი კეტი პერი და ყოფილი ჟურნალისტი ლორენ სანჩესი.
ხომალდს სათავეში ლორენ სანჩესი ჩაუდგა, რომელმაც თავად გახლდათ Blue origin-ის პროექტის ხელმძღვანელი. სწორედ მისი მითითებებით შეირჩა ეკიპაჟის წევრები: CBS-ის წამყვანი გეილ კინგი, NASA-ს ყოფილი სარაკეტო მეცნიერი აიშა ბოი, სამოქალაქო უფლებების აქტივისტი ამანდა ნგუენი და კინოპროდიუსერი კერიან ფლინი. სანჩესის მთავარი მიზანი იყო მთლიანად ქალებით დაკომპლექტებული ეკიპაჟის შექმნა, რაც ხაზს უსვამს ქალთა შესაძლებლობებს ისეთ სფეროში, როგორიც კოსმოსია.
მისი სახელი ამ ბოლო დროს დიდი პოპულარობით სარგებლობს. ლორენი და ბეზოსი ერთმანეთს 2019 წლიდან ხვდებიან. ცოტახნის წინ, ბიზნესმენმა მას ხელიც სთხოვა, სწორედ მაშინ გავრცელდა ინფორმაცია კოსმოსური მისიის შესახებ. წყვილი ზაფხულში ქორწილსაც გეგმავს, მანამდე კი საზოგადოების წინაშე ხშირად ჩნდებიან. გაფრენამდე სანჩესმა აღნიშნა, რომ მისი მიზანი იყო ქალების შთაგონება მეცნიერებაში, ტექნოლოგიებსა და ინჟინერიაში მონაწილეობისკენ.
აღსანიშნავია, რომ ეს არის პირველი შემთხვევა 1963 წლის შემდეგ, როცა კოსმოსური ხომალდის ბორტზე მხოლოდ ქალები იყვნენ. მაშინ, კოსმოსში საბჭოთა ასტრონავტი ვალენტინა ტერეშკოვა მარტო გაფრინდა. ხომალდი New Shepard ორშაბათს, დასავლეთ ტეხასის შტატში, 105 კილომეტრის სიმაღლეზე აფრინდა. ფრენა 8-11 წუთამდე გაგრძელდა, ეკიპაჟის წევრებმა რამდენიმე წუთის განმავლობაში უწონადობას მიაღწიეს, შემდეგ კი ისევ დედამიწაზე დაბრუნდნენ. გაშვებამდე, ამერიკულმა ტელევიზიამ CBS-მა აჩვენა კადრები, სადაც ეკიპაჟის წევრები ფანჯრებიდან იყურებოდნენ და მაყურებლებს ესალმებოდნენ.
კეტი პერიმ, ხომალდიდან გადმოსვლისას ცრემლები ვერ შეიკავა. კოსმოსში გამგზავრებასა და დაბრუნებაზე საუბრისას მან თქვა, რომ ეს ყველაზე ძლიერი განცდა იყო. ეს ყველაფერი მხოლოდ კოსმოსში გაფრენა არ არის. ჟურნალისტებთან საუბრისას, მან განმარტა თუ რატომ გადაწყვიტა გაფრენა: „ყოველდღე საკუთარ თავს ვეუბნები: შენ გაბედული ხარ. შენ ამას აკეთებ მომავალი თაობის შთაგონებისთვის, განსაკუთრებით გოგოებისთვის. მე კოსმოსში გავფრინდები! – არანაირი საზღვრები. ძალიან მაინტერესებს ტექნიკური მხარე, STEM-ის სფერო და ყველაფერი, რაც ასეთი წარმატებული მისიის განხორციელებისთვისაა საჭირო,”.
როგორც ეკიპაჟის წევრები ირწმუნებიან კეტი პერიმ კოსმოსში სიმღერა ” what a wonderful world ” შეასრულა. მისი თქმით, ეს სიმღერა სწორედ კოლექტიურ ენერგიას და იმ ქალებს მიუძღვნა, ვისაც სურს, სამყაროში საკუთარი ადგილი დაიმკვიდროს. მან პირობა დადო, რომ მომავალში აუცილებლად დაწერს სიმღერას ამ გამოცდილების შესახებ. ასევე კოსმოსში ყოფნის დროს მან ეკიპაჟის წევრებს მისი მომავალი ტურნეს სიმღერების სიაც გაუმხილა.
კოსმოსურ მისიას თავად ჯეფ ბეზოსიც ესწრებოდა, რომელიც დედამიწაზე დაბრუნებულ ეკიპაჟის წევრებს შეხვდა და ხომალდის კარი გაუღო. პირველი ლორენ სანჩესი გადმოვიდა, მისი და ჯეფ ბეზოსის შეხვედრა საკმაოდ ემოციური იყო. ლორენმა ჟურნალისტებს საკუთარი განცდები გაუზიარა – „არ ვიცი, როგორ აღვწერო. მთვარე დავინახეთ, სავსე მთვარე. დედამიწა ისე მშვიდად ჩანდა. ირგვლივ სიმშვიდე იყო. ბევრად შთამბეჭდავი აღმოჩნდა, ვიდრე წარმომედგინა.“ მან ასევე აღნიშნა, რომ ეს მხოლოდ დასაწყისია და აპირებს, კიდევ უფრო მეტ პროექტში მიიღოს მონაწილეობა, სადაც ქალების როლი სამეცნიერო დარგებში კიდევ უფრო გაიზრდება.
