„მითხარით რომ გმირები ნამდვილად არ კვდებიან, მითხარით, რომ კვიცი გვარზე არ ხტის! შენს სულს და ხსოვნას ვენაცვალე მეგობარო. შენი შვილი შენს მსგავსად,სიმართლის მხარესაა და ლამაზად დაცოცავს სიმაღლეზე“,- ასე გამოეხმაურა კომპანია „ეიფორიის“ დამაარსებელი ბესიკ საბაშვილი ახალგაზრდა ბიჭს, რომელმაც გორგასლის ძეგლზე საქართველოს დროშა აღმართა.
ყველა დღეს თავისი გმირი ჰყავს, ზოგს ვამჩნევთ, ზოგს კი- ვერ. ევროპული მარშის უპირობო გმირი კი გურამ ხუციშვილია, ბიჭი, რომელმაც ვახტანგ გორგასალს საქართველოს დროშა ხელში დააჭერინა. გმირობას კონკრეტული მომენტი არ სჭირდება, გმირობა გამბედაობაა, სიმართლის მხარეს დგომაა, საქართველოს დამოუკიდებლობისა და თავისუფლების დაცვაა. გმირობა, პირველ რიგში, საკუთარი ქვეყნის სადარაჯოსა და ხალხის გვერდით ყოფნაა. ღირსება ისტორიისა და წარსულში მოღვაწე დიდებულების პატივისცემაა,რასაც ვერავინ გამოხატავდა იმაზე უკეთესად, ვიდრე ეს გურამ ხუციშვილმა ვახტანგ გორგასლის ძეგლზე საქართველოს დროშის აღმართვით გააკეთა.
“როგორც გავიმარჯვებთ ისე დაიკიდა ეს დროშა აქ, თან გორგასალზე სიმბოლურია, ეს არის გამარჯვების მეფე”,- ამბობს გურამ ხუციშვილი ბიჭი, რომელმაც ვახტანგ გორგასლის ძეგლზე დროშა დაამაგრა.
რაოდენ სიმბოლურიც არ უნდა იყოს, გურამ ხუციშვილის მამა დავით ხუციშვილი აფხაზეთის ომის გმირი გახლდათ. მან უამრავი ლტოლვილი სიკვდილს გადაარჩინა, თავად კი სამშობლოს თავი შესწირა. და დიახ, გმირები არ კვდებიან, ისინი სიცოცხლეს თავისი შვილების მეშვეობით აგრძელებენ, ვაჟკაცებს ზრდიან და ჩვილობაშივე ასწავლიან, რომ „თავისუფლება ისე არ მოდის, თავისუფლება ლომთა ხვედრია“.
