კომპანია „ინოვატორი“ 2005 წელს დაარსდა და 19 წელია, სამაუწყებლო და პროფესიონალური აუდიო/ვიდეო გადაწყვეტილებების ლიდერია როგორც საქართველოში, ასევე – მის ფარგლებს გარეთ: სომხეთში, აზერბაიჯანში, მოლდოვაში, ტაჯიკეტში, ბელორუსიაში, ლიეტუვაში, ლატვიაში, უგანდაში, ეთიოპიასა და სხვა ქვეყნებში.
„ინოვატორი“ ოფიციალური წარმომადგენელია ისეთი პრემიუმ ბრენდებისა, როგორებიცაა: ARRI, SONY, PANASONIC, CANON, ZEISS, ANGENIEUX, BLACKMAGIC DESIGN, FUJIFILM, EGRIPMENT, MOVIETECH, ROSS VIDEO, NEWTEK, VSN და სხვა.
გთავაზობთ ინტერვიუს „ინოვატორის“ დამფუძნებელ ზურაბ გეგენავასთან, რომელიც უფრო დაწვრილებით მოგვითხრობს, თუ რას საქმიანობს კომპანია ამჟამად და რა მიზნები და გეგმები აქვს სამომავლოდ.
საქმიანობის რა ძირითადი მიმართულებები აქვს კომპანია ინოვატორს?
ინოვატორი გამოცდილი სისტემური ინტეგრატორია ტელე-რადიო-სამაუწყებლო სფეროში და მომხმარებელს მათ საჭიროებებზე მორგებულ, მეცნიერულ და ტექნოლოგიურ ინოვაციებზე დაფუძნებულ ტექნიკურ გადაწყვეტილებებს სთავაზობს.
ჩვენი საქმიანობის ძირითადი მიმართულებებია:
სისტემური ინტეგრაცია. ინოვატორის გუნდი დაგეხმარებათ ნებისმიერი სირთულის პროექტის გეგმის შედგენასა და განხორციელებაში, რისთვისაც მუდამ ვაწარმოებთ სამაუწყებლო სფეროსთან დაკავშირებული სიახლეების მონიტორინგს. ვნერგავთ ინოვაციებს და ხშირად ვატარებთ კადრების გადამზადებისა და მათი ცოდნის ასამაღლებელ სემინარებს საერთაშორისო პარტნიორებთან ერთად.
ტექნიკის დისტრიბუცია. ინოვატორი მსოფლიოს წამყვანი მწარმოებლების ოფიციალური წარმომადგენელია, შესაბამისად შეგიძლიათ, ჩვენთან შეიძინოთ უმაღლესი ხარისხის პროდუქცია, საუკეთესო პირობებით.
საგარანტიო/პოსტ საგარანტიო მომსახურება. ინოვატორი, როგორც პროფესიონალური ტექნიკის ერთადერთი ავტორიზებული სერვის ცენტრი, ფლობს იმ დანადგარებსა და აღჭურვილობას, რომლებსაც თავად ტექნიკის მწარმოებელი კომპანიები იყენებენ. ჩვენთან შესაძლებელია, სამაუწყებლო ტექნიკის სრული დიაგნოსტიკა და პრობლემების აღმოფხვრა.
ინოვატორის სტუდია. ინოვატორის ოფისში განთავსებულია პანასონიკის პროფესიონალური კამერებით აღჭურვილი ვირტუალური სტუდია. Newtek live production studio იძლევა ლაივში გასვლისა და ჩანაწერების გაკეთების საშუალებას.
კინო ინდუსტრია. ინოვატორი ოფიციალური შემომტანია წამყვანი ბრენდებისა, რომელთა აპარატურაც დიდი პოპულარობით სარგებლობს კინოსარეჟისორო ინდუსტრიაში.
IEEBEE-ზეც მოგვიყევით მოკლედ. რა იყო მისი დაფუძნების მთავარი მიზანი და რა გეგმები გაქვთ ამ თემასთან დაკავშირებით?
IEEBE ანუ აღმოსავლეთ ევროპის ქვეყნების სამაუწყებლო ინჟინერთა გაერთიანება 2022 წელს დავაფუძნეთ და გახლავთ SBE ის (მსოფლიო სამაუწყებლო ინჟინერთა გაერთიანების) ოფიციალური წარმომადგენელი სტრუქტურა. აერთიანებს აერთიანებს აღმოსავლეთ ევროპასა და ცენტრალური აზიის ქვეყნებში მოღვაწე სამაუწყებლო ინჟინრებს. ახლახანს შევედით უზბეკეთის, სომხეთისა და აზერბაიჯანის ბაზრებზე.
IEEBE – პირველი ფილიალია ევროპის მასშტაბით რომელიც ოფიციალურად უფლებამოსილია, ევროპის მასშტაბით განახორციელოს SBE -ს საქმიანობა, რაც მოიცავს შემდეგ პუნქტებს:
- სამაუწყებლო ინჟინრების ჰაბის შექმნა;
- მასტერკლასებისა და ღია ლექციების ჩატარება;
- კადრების გადამზადება;
- საერთაშორისო სერთიფიცირებისთვის მომზადება;
- გამოცდაზე გასვლის უზრუნველყოფა როგორც საქართველოში, ასევე-ამერიკის შეერთებულ შტატებში;
- სამაუწყებლო გამოფენის მოწყობა.
სამომავლო გეგმებზე რას გვეტყვით?
უკვე შესაძელებელია Certified Television Operator (CTO) სერთიფიკატის მიღება. 2024 წლის განმავლობაში კი გვექნება შემდეგი სერთიფიკატების გაცემის შესაძლებლობა: Certified Broadcast Technologist (CBT) / Certified Video Engineer (CEV) / Certified Broadcast Television Engineer (CBTE) / Certified Broadcast Networking Engineer (CBNE) / Certified Senior Television Engineer (CSTE).
სასწავლო ცენტრში, ამ ეტაპზე, ერთჯერადად 10-20 მსურველის გადამზადება და სწავლება იქნება შესაძლებელი. იგეგმება მასშტაბური ტექნიკური სკოლის გახსნა, რომელიც გარდა საგანმანათლებლო საქმიანობისა, იქნება აღმოსავლეთ ევროპისა და ცენტრალური აზიის უმსხვილესი ჰაბი სამაუწყებლო ინჟინერიის სფეროში.
სიხარულით გეტყვით, რომ 2024 წლის მიწურულს, პარტნიორებთან ერთად, ვგეგმავთ სამაუწყებლო ტექნიკის ყოველწლიური გამოფენის გამართვას, რომელიც აღმოსავლეთ ევროპაში, მსგავსი შინაარსის, ყველაზე მასშტაბური ღონისძიება იქნება. გამოფენის ფარგლებში პროფესიონალური ტექნიკის მწარმოებელი ლიდერი კომპანიები სატელეკომუნიკაციო სფეროს უახლესი თაობის მოწყობილობებს წარმოადგენენ. ასევე გაიმართება პრეზენტაციები, ვორქშოპები და სემინარები აქტუალური თემების ირგვლივ.
