მოდით ჯერ კიდევ მაშინ დაინტერესდა, როცა საქართველოში თითზე ჩამოსათვლელი დიზაინერები არსებობდნენ. არაერთ ქართველ დიზაინერთან თანამშრომლობის შემდეგ კი გადაწყვიტა საკუთარი, ინდივიდუალური კოლექცია შეექმნა – მისი თვალით დანახული ქალი საფრანგეთიდან ახალი ჩამოსულია, რომელსაც მოსწონს ქართული კულტურა და სამოსი, სწორედ ამიტომ საკუთარ ჩაცმულობას ქართული დეტალებით ამრავალფეროვნებს. ჟურნალი OK! წარმოგიდგენთ დიზაინერ, ეკა კვანტალიანსა და Kstudio-ს.
როგორ გაჩნდა მოდის სფეროსადმი ინტერესი თქვენს ცხოვრებაში?
ძალიან დიდი ხანია მოდის სფეროში ვარ და არაერთ დიზაინერთან მითანამშრომლია. თავდაპირველად მათ ორგანიზაციულ საკითხებს ვაგვარებდი, როგორიცაა კოლექციების თავის დროზე მოსწრება, კონსტრუქციის სიზუსტე და სხვ. ვმუშაობდი აკა ნანიტაშვილთან, ბაკურ ბაკურაძესთან და სხვა ცნობილ დიზაინერებთან. ეს ადამიანები დღეს ჩემი მეგობრები არიან. შემდეგ მე, აკა ნანიტაშვილმა და ნინო ჩხიკვაძემ ერთად გავხსენით ატელიე – KStudio. თავდაპირველად ეს იყო მეგობრული სტუდია, რომელიც აერთიანებდა რამდენიმე დიზაინერს, მათი შექმნილი სამოსი, ფეხსაცმელი და ჩანთა Kstudio-ს სახელით გადიოდა. მალევე გავაკეთე კოლექცია, რომელიც ერთ-ერთმა მაღაზიამ სრულად შეიძინა. ეს იყო ქართულ მოტივებზე შექმნილი კოლექცია. კონცეპტუალურად წარმოვიდგინე, რომ ჩემი ქალი იყო ჩამოსული პარიზიდან, რომელსაც მოეწონა ქართული სამოსი და თავის ჩაცმულობაში ქართული შტრიხები შეიტანა, როგორიცაა, მაგალითად: ფრანგულ კაბაზე ჩიხტიკოპი და სხვ. აღსანიშნავია, რომ ეს ხაზი შემდგომ ჩემს კოლექციებშიც გადმოვიდა.
შემდეგ იყო პანდემიის პერიოდი, როდესაც სახლში ჩავჯექი და ამ დროს გამოვუშვი ჰუდები – ყაბალახური ფორმის, რომელიც საზოგადოებას ძალიან მოეწონა. ასევე, გავაკეთე სარაფანი-კაბა – ქისასთან ერთად, რაც ასევე ძალიან მოთხოვნადი აღმოჩნდა. შემდეგ მივიღე შემოთავაზება geofashionlab-ისგან, გამეკეთებინა ატელიე მათ ტერიტორიაზე. ეს მოიცავდა ასევე, სხვა დიზაინერებთან თანამშრომლობას – კონცეპტუალურად დამელაგებინა მათი კოლექცია, გადამეწყვიტა ხაზი და კონსტრუქცია.
რამ განაპირობა Kstudio-ს წარმატება?
სწორმა მიდგომამ და მომხმარებლის გემოვნებაზე მორგებამ, მოდის ტენდენციებზე დაყრდნობით. ზოგადად მიმაჩნია, რომ კოლექციაზე მუშაობა მარტივი არ არის, უპირველესად, უნდა გქონდეს ცოდნა, გამოცდილება, თუ როგორ უნდა დაალაგო კოლექცია. ამჟამად Kstudio-ში მე ვქმნი სამოსს, ხოლო ფეხსაცმელს – ირინა ბრიკალოვა, იმ კონცეფციით, რაც იმ მომენტში აქვს სამოსს.
როგორ შეაჯამებდით 2023 წელს?
შემოქმედებითი კუთხით საკმაოდ ნაყოფიერი წელი მქონდა. გამოვყოფდი ჩემს ვიზიტს ყაზახეთში, სადაც fashion week-ზე ვიყავი მიწვეული. 26 კონკურსანტიდან 6 აგვარჩიეს, საქართველოდან მხოლოდ მე ვიყავი წარმოდგენილი. ახლაც ვაგრძელებ ამ ქვეყანასთან თანამშრომლობას, ოღონდ სხვა განხრით, შემომთავაზეს „ქართული დღეების“ ორგანიზება ყაზახეთში და დავთანხმდი. ეს ერთდროულად ძალიან დიდი პასუხისმგებლობა და საინტერესო გამოწვევაცაა.
რა გაძლევთ შთაგონებას მუშაობის პროცესში?
ძირითადად, სიყვარულია ჩემი შთაგონების წყარო, თუმცა შემიძლია ყველაფრისგან, პატარა დეტალებისგანაც მივიღო შთაგონება, მაგალითად – საინტერესო გარემოდან, ადამიანებისგან, კარგი დილისგან, კარგი მუსიკისგან და სხვ.
სამომავლო გეგმები?
გარდა იმისა, რომ ვმუშაობთ გაზაფხული-ზაფხულის კოლექციაზე, ასევე ვეხმარებით ახალბედა ბრენდებს. დიზაინერებს ვასწავლით კონცეპტუალურ დალაგებას, ფერებს, ხაზებს, შტრიხებს, ეს ყველაფერი საჭიროა კოლექციის საბოლოო სახის მისაღებად. ახლაც ვითანამშრომლე ახალბედა დიზაინერებთან – დადეშქელიანებთან, 12 ლუქზე, რომელიც აუცილებელია დიზაინერს ჰქონდეს. წარმატებას ვუსურვებ მათ, მე კი გავაგრძელებ ახალგაზრდა დიზაინერების ხელშეწყობას და მათ ყოველთვის დავეხმარები განვითარებაში. რა თქმა უნდა, არ ვივიწყებ „ჩემს ქალს“, რომელიც არასოდეს არ უნდა დაბერდეს და ყოველთვის მოწოდების სიმაღლეზე იყოს, სიახლეებს კი Kstudio-სახელით კვლავ შევთავაზებ მოხმარებელს.
ტექსტი: სოფიო მალანია
ფოტო: პირადი არქივიდან
