1 ივნისი ბავშვთა უფლებების დაცვის დღეა. მოჭარბებულ სმს-ებსა და სარეკლამო შეთავაზებებში ჩაფლულები, ალბათ, იშვიათად დავფიქრებულვართ, რა დატვირთვის მატარებელია ეს თარიღი.
ბუშტები, სახატავები, ცისარტყელები, სხვადასხვა ატრაქცია ასე გულუხვად რომ მოეფინება ხოლმე ქუჩებს, ძალიან სახალისოა. ამ დღეს „დიდი“ ქველმოქმედებების სურვილიც იღვიძებს და როგორც წესი, რომელიმე ორგანიზაცია ან პოლიტიკოსი გულუხვად ასაჩუქრებს რომელიმე ბავშვთა სახლის ბენეფიციარებს.
და რა დღეა 1 ივნისი?
გაერთიანებული ერების ორგანიზაციის გენერალური ასამბლეის მიერ 1989 წელს მიღებულ „ბავშვის უფლებათა კონვენციას“ საქართველო 1994 წელს შეუერთდა და იკისრა ვალდებულება, დაიცვას კონვენციით გათვალისწინებული უფლებები.
კონვენციაში გამოკვეთილი თითოეული უფლება ეხება ყველა ბავშვს, ყოველგვარი დისკრიმინაციული გამონაკლისის გარეშე.
ოთხი ძირითადი პრინციპი გახლავთ:
სიცოცხლე – ბავშვებს აქვთ სიცოცხლისა და გადარჩენის უფლება, სამედიცინო მომსახურებით სარგებლობის, წყლითა და სანიტარიული სისტემით უსაფრთხოდ სარგებლობის უფლება;
განვითარება – ბავშვებს აქვთ განათლების, ინდივიდუალობის განვითარების, გონებრივ თუ ფიზიკურ შესაძლებლობათა სრულად გამოვლენის უფლება.
დაცვა – ბავშვებს აქვთ უფლება, დაცულნი იყვნენ ნებისმიერი სახის შეზღუდვებისა და ექსპლუატაციისაგან, ომისა და გაჭირვებისაგან.
მონაწილეობა – ბავშვებს აქვთ უფლება, გააჩნდეთ საკუთარი აზრი, თავისუფლად გამოხატონ თავიანთი შეხედულებანი და მიიღონ სასურველი ინფორმაცია.
ჰოდა, 1 ივნისს განსაკუთრებულად მინდა ყველა ბავშვს ვუსურვო, რომ მათი უფლებები დაცული იყოს და ღირსეული ცხოვრების შესაძლებლობა ჰქონოდეთ სქესის, სოციალური ფენის, დაბადების ადგილისა და კანის ფერის მიუხედავად.
სიყვარულით,
მაიკო წერეთელი
ჟურნალ OK!-ის მთავარი რედაქტორი
