მაშინ, როდესაც რუსეთი უკრაინის ტერიტორიაზე უკანონოდ შეიჭრა და მშვიდობიან მოსახლეობას ომი გამოუცხადა, „მოდის ინდუსტრიამ რელევანტურობა დაკარგა“. როდესაც ევროპელი საზოგადოება მაღალი მოდის ბრენდების უახლეს კოლექციებს ნახულობდა, უკრაინის მოსახლეობა ქვეყნის ტერიტორიული მთლიანობისთვის იბრძოდა. ერთ-ერთი პირველი დიზაინერი, რომელმაც საკუთარი ჩვენება უკრაინაში მიმდინარე მოვლენებს დაუთმო და რუსეთის აგრესიაზე ღიად ისაუბრა, ეს არის საერთაშორისოდ აღიარებული ქართველი დიზაინერი და Balenciaga-ს მოდის სახლის კრეატიული დირექტორი დემნა გვასალია.
ბალენსიაგას“ 2022 წლის შემოდგომა/ზამთრის READY-TO-WEAR კოლექციის ჩვენებაზე მისულ მაყურებელს ადგილებზე უკრაინის დროშის ფერებში გაწყობილი მაისურები და თავად დემნა გვასალიას მიერ დაწერილი ემოციური წერილი დახვდათ.
„უკრაინაში მიმდინარე ომმა ჩემში წარსულის ტრავმა გააღვიძა, რომელსაც 1993 წლიდან ვატარებ, როდესაც ზუსტად იგივე რამ მოხდა ჩემს ქვეყანაში და რამაც მე სამუდამო ლტოლვილად მაქცია… ეს ტკივილი ჩემში სამუდამოდ დარჩება. ეს არის შიში, სასოწარკვეთა, იმის გაცნობიერება, რომ შენ არავინ აინტერესებ. დროთა განმავლობაში მე გავაანალიზე, რომ ცხოვრებაში ყველაზე მნიშვნელოვანი თავად ცხოვრება, ადამიანური სიყვარული და თანაგრძნობაა“.
„სწორედ ამიტომ, ამ შოუზე მუშაობა წარმოუდგენლად რთული იყო ჩემთვის. რადგან ასეთ დროს, მოდა კარგავ აქტუალობას და არსებობის უფლებას. მოდის კვირეულები ამ მომენტში აბსურდს ჰგავს. რაღაც მომენტში ვიფიქრე, გამეუქმებინა შოუ, რომელზეც მე და ჩემმა გუნდმა ძალიან დიდხანს ვიმუშავეთ, მაგრამ შემდეგ გავაანალიზე, რომ შოუს გაუქმება ნიშნავს დათმობას, დანებებას, იმ ბოროტების წინაშე, რომელმაც უკვე მომაყენა ჭრილობა და რომელსაც 30 წელია ვატარებ. გადავწყვიტე, რომ აღარ ვაპირებ დანებებას“.
„ამ შოუს ახსნა არ სჭირდება, ეს არის უშიშროების, წინააღმდეგობის, სიყვარულისა და მშვიდობისთვის თავდადების გამოხატულება“.
როგორც უკვე აღვნიშნეთ, უკრაინაში მიმდინარე შემზარავი მოვლენები ორმაგად უფრო ემოციური იყო დემნა გვასალიასთვის, ადამიანისთვის, რომელმაც 10 წლის ასაკში აფხაზეთი დატოვა და 1993 წლიდან სამუდამო ლტოლვილი გახდა.
„პირადად, მე ძალიან ბევრი რამ შევწირე ომს. გასულმა კვირებმა დამიბრუნა ყველა მოგონება, რომლებიც მე და დედაჩემმა პატარა ყუთში მოვაქციეთ და არასდროს ვუბრუნდებოდით. მიუხედავად ამისა, ეს ყველაფერი მაინც ვერასდროს გადავლახეთ“.
„ყველაფერი იგივეა. იმავე აგრესორი, შესაძლოა იგივე თვითმფრინავებიც კი, რომლებმაც ეს ჩვენ ადრე გაგვიკეთეს, ახლა ანალოგიურს უკრაინას უკეთებენ. ვინ იცის? როდესაც ამ ყველაფერს ვუყურებდი, ვფიქრობდი: „რას ვაკეთებთ ჩვენ აქ? ხომ არ გავაუქმო ჩვენება?“, მაგრამ არა, გადავწყვიტე, რომ ჩვენ წინააღმდეგობა უნდა გაგვეწია და ასეც მოვიქეცი“.
შეგახსენებთ, რომ უკრაინაში მიმდინარე მოვლენები არ ყოფილა ერთადერთი შემთხვევა, როდესაც დემნა გვასალიამ საკუთარი შემოქმედების საშუალებით რუსულ ოკუპაციაზე საჯაროდ ისაუბრა. საერთაშორისოდ აღიარებულმა ქართველმა დიზაინერმა 2019 წელს Vetements-ის ჩვენება საქართველოს ისტორიას მიუძღვნა.
აღსანიშნავია, ასევე ლეგენდარული იტალიელი დიზაინერის ჯორჯო არმანის ქმედება, როდესაც უკრაინაში არსებული მდგომარეობის და დაზარალებული მოსახლეობის საპატივსაცემოდ ახალი კოლექციის ჩვენება არმანიმ სრულ სიჩუმეში ჩაატარა.
„ბატონმა ჯორჯო არმანიმ გადაწყვიტა არ გამოიყენოს მუსიკა Giorgio Armani-ის 2022-23 წლის შემოდგომა/ზამთრის კოლექციის ჩვენებისას, როგორც უკრაინაში განვითარებული ტრაგედიის პატივისცემის ნიშნად“ – განცხადება ჯორჯო არმანის ოფიციალური Instagram გვერდიდან.
რუსეთის აგრესიულ ქმედებებს გამოეხმაურნენ ასევე პალესტინური წარმოშობის ამერიკელი მოდელები ჯიჯი და ბელა ჰადიდები, რომლებიც მიკა არგანარაზის ინიციატივას შეუერთდნენ და გადაწყვიტეს ამ სეზონზე მოდის კვირეულებიდან გამომუშავებული თანხა უკრაინელი ხალხის დასახმარებლად გადაერიცხათ.
„მოდის კვირეულების წინასწარ განსაზღვრული განრიგი ნიშნავს იმას, რომ მეც და ჩემს კოლეგებსაც ხშირად გვიწევს ახალი კოლექციების წარდგენა ისეთი ტრაგიკული მომენტების დროსაც კი, როგორებიც პარალელურად მსოფლიოში ხდება. ჩვენ ვერ ვაკონტროლებთ საკუთარ განრიგს, მაგრამ გვსურს „რაღაცისთვის მაინც ვიაროთ“. ჩემი მეგობრისა და კოლეგის, მიკა არგანარაზის მსგავსად, მე ამ სეზონზე მოდის ჩვენებებიდან გამომუშავებულ თანხას უკრაინელთა დასახმარებლად გადავრიცხავ, რასთან ერთადაც გავაგრძელებ ასევე პალესტინელების მხარდაჭერას. ომი უსამართლობაა, დღის ბოლოს ომის ფასს ყოველთვის უდანაშაულო ადამიანები და არა ლიდერები იხდიან… ხელები შორს უკრაინისგან, ხელები შორს პალესტინისგან. მშვიდობა. მშვიდობა. მშვიდობა“. – ჯიჯი ჰადიდი
„საშინელებაა, როდესაც ვუყურებ ჩემს უკრაინელ მეგობრებსა და კოლეგებს, რომლებიც ამჟამად შორს არიან ოჯახის წევრებისა და ახლობლებისგან, იმ ადამიანებისგან, რომლებიც სასტიკი ოკუპაციის მსხვერპლნი არიან. ის, რაც ახლა მსოფლიოში ხდება, საშინელი გამოცდილებაა. მე ყველა იმ ადამიანის გვერდით ვარ, რომელზეც ამ ომმა მოახდინა ზეგავლენა და მათი ცხოვრება სამუდამოდ შეცვალა. მინდა მიკა არგანარაზის და ჩემი დის, ჯიჯის მსგავსად, ამ სეზონზე მოდის კვირეულებიდან გამომუშავებული თანხა უკრაინელების დასახმარებლად გადავრიცხო. მხარს ვუჭერ უკრაინას, ისევე როგორც პალესტინას. როგორც ჩემმა დამ აღნიშნა, ომის საფასურს არა ლიდერები, არამედ ყოველთვის უდანაშაულო ადამიანები იხდიან“. – ბელა ჰადიდი.
