საფრანგეთის ერთ-ერთ მთავარ ღირსებას პარიზის ოპერა წარმოადგენს. იგი მდებარეობს პარიზის მე-9 ოლქში. აქ, ერთ სივრცეში, მარკ შაგალის მიერ მოხატული ჭერი, პიკასოს მიერ შექმნილი დეკორაციები, საუცხოო ბიბლიოთეკა და უზარმაზარი დარბაზის სიდიადე ერთმანეთს ჰარმონიულად ერწყმის. იგი ისეთივე დიადია ვიზუალურად, როგორი ფუნქციური დატვირთვაც აქვს. ოპერის შენობის სიგრძე 173, სიგანე კი 125 მეტრია.
აღსანიშნავია ის ფაქტიც, რომ პარიზის ოპერის სამხრეთის ფასადი მოედანს გადაჰყურებს, დასავლეთის ფასადზე ბრინჯაოს საიმპერატორო არწივია აღმართული, აღმოსავლეთის ფასადი მწვანე მარმარილოს კოლონებითაა შემკული, ხოლო ჩრდილოეთით ოპერას ახლანდელ დიაგილევის მოედანსა და ოსმანის ბულვარზე გავყავართ.
ოპერის ინტერიერი მკაცრი პროპორციულობითა და მასალათა მრავალფეროვნებით გამოირჩევა. აქ შეხვდებით კირქვის, რკინისა და მარმარილოს „ტანდემს“, რომელსაც მოოქრული დეტალები აგვირგვინებს და ერთ დიდ და უნიკალურ მთლიანობად აქცევს. იგი განსაკუთრებულია იმ შერეული სტილითაც, რომელშიც დამთვალიერებლისთვის ბაროკოს დეტალების აღმოჩენა არც ისე რთულია.
პარიზის ოპერა, იგივე გარნიეს სასახლე, 2 200 ადამიანს, სცენა კი 450 მსახიობს იტევს. აქ მოსული საზოგადოების ყურადღებას ის წრიული კიბეები და კორიდორებიც იპყრობს, რომლებიც ოპერაში უხვადაა წარმოდგენილი და გარემოს, ერთი შეხედვით, ხელმიუწვდომელს ხდის. აღსანიშნავია ისიც, რომ ამ სცენაზე მოხვედრა მხოლოდ რჩეულთა ხვედრია და თითოეული ხელოვანისთვის უდიდესი პატივია.
