სასიამოვნო გარემო, უგემრიელესი კერძები და პროფესიონალთა გუნდი − ეს ის არასრული ჩამონათვალია, რომელიც „ვილა პარკ გორს“ ქმნის. იგი საუკეთესო ადგილია ნებისმიერი დღისთვის დღესასწაულის ელფერის შესაძენად. რესტორანი გამორჩეულია თავისი მდებარეობითაც. აღსანიშნავია ისიც, რომ ჰექტარზე გაშენებულ „ვილა პარკ გორს“ სულ მალე სასტუმროც დაემატება. დეტალური ინფორმაციისთვის OK! გაესაუბრა „ვილა პარკ გორის“ დამფუძნებელს, თამაზ გომიაშვილს.
გაგვაცანით თქვენი საქმიანობა.
რესტორატორობა წლების წინ, სანკტ-პეტერბურგში დავიწყე და მას შემდეგ ვაგრძელებ ამ მიმართულებით მუშაობას. ჩვენი ერთ-ერთი ყველაზე გამორჩეული რესტორანი გახლავთ „პორტო მალტეზე“, რომელიც დღემდე მოქმედია და არაერთ სტუმარს მასპინძლობს დიდი სიხარულითა და თბილი გარემოთი. მინდა გამოვარჩიო აგრეთვე ის რესტორანი, რომელიც სოფიაში გავხსენით. აქ მოსულ ადამიანებს ვთავაზობთ თევზისა და ზღვის პროდუქტების ფართო ასორტიმენტს. მინდა გითხრათ, რომ თითოეულმა რესტორანმა, რომელზეც ვიმუშავე, ძალიან დიდი გამოცდილება დამიგროვა. აღსანიშნავია ისიც, რომ საზღვარგარეთ არსებულმა ჩემმა რესტორნებმა დიდი ყურადღება მიიქცია საზოგადოებაში, რამაც გადამაწყვეტინა, რესტორანი მეგობართან ერთად საქართველოშიც, კერძოდ, ჩემს მშობლიურ ქალაქ გორში გამეხსნა.
გვიამბეთ „ვილა პარკ გორის“ შესახებ.
როგორც უკვე გითხარით, „ვილა პარკ გორზე“ მუშაობა დავიწყე ჩემს მეგობართან ერთად. ის, სამწუხაროდ, გარდაიცვალა, რასაც პროექტის დროებით შეჩერება მოჰყვა. თუმცა, ორი წლის წინ გადავწყვიტე აღმედგინა მასზე მუშაობა მეგობრებთან და არქიტექტურულ ბიურო „სპექტრუმთან“ ერთად. წელიწად-ნახევარში კი დავასრულეთ მშენებლობა და გავხსენით რესტორანი, რომელიც დაახლოებით ჰექტარზეა გაშენებული. იმავე მოცულობის ფართობზე, ვფიქრობთ დავამატოთ პატარა სასტუმრო, 20-22-ადგილიანი, აუზით. რაც შეეხება „ვილა პარკ გორს“, მისი შიდა და გარე ტერიტორია დაახლოებით 500 სტუმარს იტევს. ჩვენ აგრეთვე გვაქვს 400 ადამიანზე განკუთვნილი სივრცე, სადაც შესაძლებელია დიდი და ლამაზი ქორწილის, და სხვა ღონისძიებების ჩატარება. მას აქვს საკუთარი საპირფარეშოები, გარდერობები და მისაღები.
გვესაუბრეთ „ვილა პარკ გორის“ დიზაინის შესახებ.
„ვილა პარკ გორის“ დიზაინის შექმნა უკავშირდება ჩემს მრავალწლიან გამოცდილებას. შესაბამისად, როდესაც მასზე დავიწყე მუშაობა, ზუსტად ვიცოდი, რა იყო მთავარი საზოგადოებისთვის და რისთვის მიმექცია განსაკუთრებული ყურადღება. გვსურდა მოგვეწყო კომფორტული საპარკინგე ტერიტორია, სადა მისაღები და ბარი. თითოეული დეტალი შევქმენით მომხმარებლის მოთხოვნებიდან გამომდინარე, რამაც ხელი შეუწყო მისსავე პოპულარიზაციის პროცესს.
დაბოლოს…
ჩვენ ორიენტირებულნი ვართ მომსახურების ხარისხსა და კომფორტული გარემოს შექმნაზე. შესაბამისად, საგულდაგულოდ შევარჩიეთ თითოეული დეტალი, როგორც დიზაინის, ისე სამზარეულოს მხრივ. ამდენად, „ვილა პარკ გორში“ მოსულ თითოეულ ადამიანს დახვდება განსაკუთრებული გარემო, პროფესიონალთა გუნდი და უგემრიელესი კერძები.
ტექსტი: მარიამ მთივლიშვილი
ფოტო: ალექსეი სეროვი
