მეი მასკი
თანამედროვე სამყაროს უმდიდრესი ადამიანის, SpaceX-ისა და Tesla-ს დამფუძნებლის − ილონ მასკის დედას ხშირად ვხედავთ ყველაზე გლამურული ჟურნალების გარეკანებზე და რეიტინგულ ტელეშოუებში. ბევრს ჰგონია, რომ საზოგადოების ინტერესი მის მიმართ სწორედ ილონ მასკის დედობის ფაქტორითაა გამოწვეული, მაგრამ მეი მასკი წარმატებული მხოლოდ მას შემდეგ არ გამხდარა, რაც მსოფლიო მის შვილზე ალაპარაკდა. ამ დროისთვის მეის უკვე 50-წლიანი სტაჟი ჰქონდა სამოდელო ინდუსტრიაში. იგი თანამშრომლობდა ისეთ ბრენდებთან, როგორებიცაა Dolce & Gabbana, Revlon, CoverGirl და სხვები. თუმცა, მეი მასკის პოპულარობა გაცილებით გაიზარდა მას შემდეგ, რაც 60 წლის მოდელმა თმის შეღებვა შეწყვიტა. თეთრთმიანი, არაორდინარული ქალბატონი ყველასთვის მეტად საინტერესო გახდა და სხვადასხვა ბრენდისგან შეთავაზებებმაც იმატა. მან დაამსხვრია სტერეოტიპი, რომ ქალი გარკვეულ სილამაზის სტანდარტს უნდა მიჰყვებოდეს და დაამტკიცა, რომ ბუნებრიობა ძალიან მიმზიდველია.
მოდელობასთან ერთად, მასკი პროფესიონალი დიეტოლოგია და საკუთარ გარეგნობაზე განსაკუთრებულად ზრუნავს, რაც მისი უბერებელი სილამაზის საიდუმლოა. იგი მინიმალიზმის მოყვარულია, თუმცაღა ამ სისადავეში ყოველთვის უსაზღვრო ელეგანტურობას აქსოვს. მეის სტილი ტენდენციური და გემოვნებიანია. რამდენიმე თვის წინ, მშვენიერი მეი ქართველ დიზაინერ Anouki-ს ატმისფერ კაბაშიც ვიხილეთ.
უნდა აღინიშნოს ისიც, რომ კარიერასთან ერთად, მეი მასკი მუდამ ბოლომდე იყო ჩართული შვილების აღზრდაში.
უკვე ყველასთვის ცნობილია მეის უფროსი შვილის − ილონის წარმატებები. თუმცა, მის და-ძმასაც საკმაოდ წარმატებული კარიერა აქვთ. ილონის ძმა აშშ-ში რესტორნების ქსელ The Kitchen-ს ფლობს, და – ტოსკა კი, წარმატებული პროდიუსერი და რეჟისორია.
გასულ წელს მეიმ გამოსცა საკუთარი წიგნი − „ქალი ისახავს მიზანს“, რომელიც მთელ მსოფლიოში დიდი პოპულარობით სარგებლობს. წიგნი ქართულ ენაზეც არის ნათარგმნი, რომელშიც შეგიძლიათ წაიკითხოთ რჩევები თავგადასავლებით, სილამაზითა და წარმატებით აღსავსე ცხოვრებისათვის.
გრის გენემი
მოდის სფეროს კიდევ ერთი არაორდინარული, თეთრთმიანი, მომხიბვლელი ქალბატონი გრის გენემი გახლავთ. მისი სხეულის იდეალური ფორმა, საოცარი სტილი და თეთრი ფერის „კარე“ ვარცხნილობა ნამდვილად გამოარჩევს მას საზოგადოებისგან. 53 წლის გრისი ყოფილი მიკრობიოლოგი, პერსონალური ფიტნესტრენერი და მოდის ინფლუენსერია. მან სოციალურ ქსელში საკუთარი ქუჩის სტილის ფოტოების გამოქვეყნება 5-6 წლის წინ დაიწყო და დღეს უკვე ნახევარ მილიონზე მეტი გამომწერი ჰყავს ინსტაგრამ-გვერდზე.
მისი სტილი ნამდვილად გამორჩეულია. 50+ ასაკის გამო, არაფერში იზღუდავს თავს და იცვამს იმას, რაც მოსწონს. უყვარს მკვეთრი ფერები და ფერადი პრინტები; სპორტული ორეულები, ჯინსები და ტყავის სამოსი. სურს ყოველთვის ყურადღების ცენტრში იყოს და ახლაც ისეთივე ეფექტი მოახდინოს საზოგადოებაზე, როგორსაც 20-30 წლის წინ ახდენდა. აცვია მუდამ ტენდენციური სამოსი, რომლებსაც იდეალურად უხამებს სხვადასხვა აქსესუარს. მისი საყვარელი დიზაინერი გენიალური ფიბი ფაილო გახლავთ. რაც შეეხება ბრენდს, Celine და Bottega Veneta განსაკუთრებულად უყვარს. ინსტაგრამ-გვერდები, რომლებიც მისთვის ინსპირაციის წყაროს წარმოადგენს: @styleheroine,
@oksanarim, @tamuMcPherson.
