დიზაინერ მაკა კვიციანისა და კულინარიის მჭიდრო კავშირის შესახებ ძალიან ბევრი ადამიანისთვისაა ცნობილი. განსაკუთრებით მათთვის, ვინც „მასტერშეფის“ გადაცემებს აქტიურად ადევნებს თვალს. როდის დაინტერესდა ამ პროფესიით, რომელი კერძების მომზადება უყვარს ყველაზე მეტად და ვისთვის ამზადებს ყველაზე ხშირად − წაიკითხეთ OK!-ის ინტერვიუში მაკა კვიციანთან.
ბოლო პერიოდში განსაკუთრებული სისწრაფით დაიწყო კულინარის პროფესიამ განვითარება. როგორ ფიქრობთ, რამდენად შეუშალა ამ პროცესს ხელი პანდემიამ?
კულინარიით გატაცება საქართველოში „მასტერშეფის“ პარალელურად დაიწყო და ვფიქრობ, ამაში ერთ-ერთი გადამწყვეტი და მნიშვნელოვანი როლი სწორედ ამ პროექტს მიუძღვის. ყოველდღიურად ახალი სახეები ჩნდებიან, რომლებიც ძალიან კარგად ამზადებენ და ბევრს სიახლეს სთავაზობენ საზოგადოებას.
ვიდრე პანდემია დაიწყებოდა, გაიზარდა ტურისტების რაოდენობა საქართველოში, გაიზარდა მოთხოვნა რესტორნებზე და ესეც მნიშვნელოვანი ფაქტორი აღმოჩნდა ამ პროფესიის განვითარებისა და წინსვლისთვის.
ვფიქრობ, ვინც პანდემიისგან გამოწვეულ შეზღუდვებს ფეხი აუწყო, გადავიდა ონლაინმიტანის სერვისზე და მომხმარებელს შეუქმნა კომფორტი საკვების მიწოდების მხრივ, არც შექმნიათ დიდი პრობლემები, პანდემიის მიუხედავად − მათ ძალიან კარგად აითვისეს ონლაინრეჟიმში მუშაობის სპეციფიკა.
თქვენ როდის დაინტერესდით კულინარიით?
ბებია მყავდა ძალზე გამორჩეული კულინარი. ჩვენს ოჯახში მუდამ იყო სუფრისა და კერძების სხვადასხვაგვარად მომზადების კულტურა. ყველაფერი ახლებურად და განსხვავებულად მზადდებოდა. აქედან გამომდინარე, მეც გენეტიკურად გადმომეცა და ღრმა ბავშვობიდან დავინტერესდი კულინარიით.
რომელი კერძის მომზადება გიყვართ ყველაზე მეტად?
ვამზადებ ტრადიციულ კერძებს. ძალიან კარგად გამომდის ხორციანი კერძების მომზადება, ასევე – პასტა. გარდა ამისა, შინ ძალიან უყვართ ჩემ მიერ მომზადებული იტალიური, ჩინური და ინდური კერძები. თითქმის ყველაფერი გემრიელი გამომდის. ძალიან მიყვარს ექსპერიმენტები და მუდმივად ვცდილობ რაიმე ახალი გავაკეთო და ვისწავლო.
ვისთვის ამზადებთ კერძებს ყველაზე ხშირად?
ყველაზე ხშირად სტუმრებისთვის ვამზადებ, რადგან ყოველდღიურ რეჟიმში არ მაქვს დრო კერძების მოსამზადებლად. თუმცა შაბათ-კვირას ყოველთვის ვცდილობ ჩემი ოჯახისთვისაც მოვამზადო.
რამდენად გურმანი ხართ?
შეიძლება ითქვას, რომ ზედმეტად გურმანი ვარ. ძალიან მიყვარს ახალი კერძების დაგემოვნება.
რას ურჩევდით დამწყებ კულინარებს?
ვურჩევდი, ძალიან ბევრ ექსპერიმენტს და ბევრი კერძის დაგემოვნებას. ასევე, გაეცნონ სხვადასხვა ქვეყნის სამზარეულოს, რადგან ეს საშუალებას გვაძლევს, ბევრი სიახლე შევიტანოთ საკუთარი ხელით მომზადებულ კერძებში და ჩვენი ქვეყნის სამზარეულოს განვითარებაში.
