თბილისში, დიდ დიღომში „ინტერიორისმოს“ შოურუმი გაიხსნა, სადაც განთავსებულია ესპანური ბრენდებისა და მწარმოებლების ავეჯი, დეკორაციის ელემენტები და განათება. თითოეული ნივთი პირდაპირ ვალენსიის პორტიდან მოდის საქართველომდე. აქ თქვენ შეხვდებით როგორც თანამედროვე, ასევე კლასიკურ და ეგრეთ წოდებულ Iconic-მოდელებს, თითოეულ მათგანზე კი გამოყენებულია 90%‑ით ნატურალური მასალები. პარტნიორები ესპანეთში ცნობილი მწარმოებლები არიან და კომპანიას უკვე აქვს ექსკლუზივი ისეთ ბრენდთან, როგორიც არის „პერალტა ვიდავი ილუმინასიონ“. ეს გახლავთ ჭაღების ესპანელი დიზაინერი და მწარმოებელი, რომელიც, ფაქტობრივად, ესპანეთის სახეა და ქმნის უნიკალური სილამაზისა და ხარისხის განათებებს.
„ინტერიორისმოს“ შოურუმი მუდმივად განახლდება და მომხმარებელს დახვდება ისეთი მოდელები, რომლებიც საკმაოდ უცხოა საქართველოში. ესპანური წარმოების ავეჯს ახასიათებს დიზაინის უნიკალურობა და უმაღლესი ხარისხი.
უნდა აღინიშნოს, რომ ბრენდი მომხმარებელს მხოლოდ ესპანური ბრენდებისა და დიზაინერების მიერ შექმნილ მაღალი ხარისხის ნივთებს სთავაზობს. ალბათ ეს არის ერთგვარი უპირატესობაც და განმასხვავებელი ნიშანიც.
„ინტერიორისმოს“ შექმნა 4 მეგობრის იდეას უკავშირდება − ესპანეთიდან საქართველოში, ესპანელი დიზაინერების, ესპანეთში წარმოებული და ესპანური სტილის ავეჯი და განათება შემოეტანათ.
კომპანიის დამფუძნებლებს მიაჩნიათ, რომ საქართველოში ხალხს მართლაც ძალიან დახვეწილი გემოვნება აქვს და მათი სტანდარტიც საკმაოდ მაღალია ავეჯის შერჩევისას, ამიტომ მუდამ ისეთ ავეჯს თუ დეკორაციას ირჩევენ, რომელსაც საკუთარი სახლებისთვისაც შეიძენდნენ.
სოფო კალანდარიშვილი, იურისტი
„საინტერესო პერიოდი გავიარეთ „ინტერიორისმოს“ შექმნის გზაზე. მართალი გითხრათ, იმდენად სწრაფად და ერთსულოვნად მივედით იმ აზრამდე, თბილისში გაგვეხსნა ესპანური ავეჯისა და განათების მაღაზია, რომ ყველა ეტაპი დაწვრილებითაც აღარ მახსოვს. მახსოვს ის, რომ ვთქვით და გავაკეთეთ. ოთხი პარტნიორი ვართ, აქედან სამნი მადრიდში ვცხოვრობთ: ელენე გუნცაძე, თამუნა ბაქრაძე და მე. ნინჩო ჯიბლაძე კი თბილისშია და ადგილზე მართავს კომპანიას. ჩვენ აქედან ვეხმარებით“.
თამარ ბაქრაძე, სასტუმროს მენეჯმენტისა და რესტორნების ბიზნესის მაგისტრი; მადრიდში საერთაშორისო დიპლომატიური ასოციაციის ბორდის წევრი
„სირთულეები ყველა ბიზნესის დაწყებას ახლავს, განსაკუთრებით ისეთ საქმეს, რომელიც ორ სხვადასხვა ქვეყანას შორის უნდა აწარმოო. მაგრამ ამ სირთულეებს არ შევუშინებივართ − თავიდანვე გვესმოდა, ადვილი არ იქნებოდა. განსაკუთრებით სიფრთხილე უნდა გამოგვეჩინა პარტნიორების შერჩევისას. რადგან ჩვენ ოჯახებით უკვე დიდი ხანია ესპანეთში ვცხოვრობთ, კარგად ვიცნობთ აქაურ კულტურას და აქ ბევრი მეგობარი გვყავს, ამ მხრივ არ გაგვჭირვებია. კარგად ვიცნობთ ქართველ მომხმარებელს და გვესმის, რომ მათ განსაკუთრებული გემოვნება აქვთ, ამიტომაც აქცენტი თავიდანვე ხარისხზე გავამახვილეთ. თბილისში უნდა გაგვეხსნა საუკეთესო ხარისხის ავეჯისა და განათების მაღაზია. ეს იყო მიზანი…“
ნინო ჯიბლაძე, PR-ის სპეციალისტი. კომპანია „გალფის“ მარკეტინგის დირექტორი და ვიცეპრეზიდენტი; ჟურნალ OK!-ის მთავარი რედაქტორი; ბიზნესასოციაციის „ქალები მომავლისთვის“ სამეთვალყურეო საბჭოს წევრი.
„გარკვეული სირთულეები თბილისშიც შეგვხვდა, თავისთავად არაფერი გამოდის, სირთულეების გარეშე. მაგრამ როგორც ყოველთვის, ამ დროსაც გამოჩნდნენ ადამიანები, რომლებიც დაგვეხმარნენ. თითქოს ყოველ ნაბიჯზე ვიღაცის ჯადოსნური ძალა გვამხნევებდა, წინ გვწევდა, ზურგში ქარს გვიბერავდა და გვაგულიანებდა. ესპანეთში გოგონების საქმე იყო პარტნიორების მოძებნა და მათთან მოლაპარაკებები. აქ, თბილისში კი მთავარი იყო გვეპოვა ფართი, აგვეღო კრედიტი და შეგვერჩია შესაფერისი კადრები. ერთადერთი, ახლა თუ რაიმეზე გვეფიქრება, ის არის, თუ რა ცუდს ვიზამდით, ეს ბიზნესი რომ არ წამოგვეწყო. ყველაზე ცუდი, რა თქმა უნდა, ეს იქნებოდა“.
ელენე გუნცაძე, ჟურნალისტი
„ინტერიორისმოში“ მხოლოდ ესპანური ბრენდებისა და ესპანელი დიზაინერების ნამუშევრები იქნება წარმოდგენილი და ამის შეცვლას არ ვაპირებთ. ესპანეთში ავეჯს, განათებას, დეკორაციას ძალიან სერიოზულად უყურებენ. აქაური დიზაინერების კოლექციები უმეტეს შემთხვევაში ხელოვნების ნიმუშებს ჰგავს. ჩვენი შოურუმი დაბალანსებული იქნება − ადგილზე გვაქვს როგორც ძვირფასი მოდელები, ასევე უფრო დემოკრატიული ბრენდების კოლექციები. რაც მთავარია, არ ვარღვევთ მთავარ პირობას − ეს არის ხარისხი. ჩვენი ავეჯი, განათება და დეკორაციები იქნება მხოლოდ უმაღლესი ხარისხის. ამას ძალიან დიდ ყურადღებას ვაქცევთ როგორც ჩვენ, ასევე ჩვენი ესპანელი პარტნიორები“.
ფოტო: ლუიზა ჩალათაშვილი
