იყო წარმატებული, ცნობილი ექიმი-გინეკოლოგი, იღებდე უამრავ პაციენტს, უპასუხებდე სოციალურ ქსელში შემოსულ უთვალავ შეკითხვას და ამავდროულად გყავდეს ოჯახი, საკმაოდ დიდი ცხოვრებისეული გამოწვევაა. როგორ შეიძლება ბალანსის დაცვა კარიერასა და პირად ცხოვრებას შორის? რას ნიშნავს პროფესიის სიყვარული? როგორი მიდგომა უნდა ჰქონდეს ექიმს თითოეული პაციენტისადმი?.. გთავაზობთ OK!-ის გულახდილ საუბარს მედიცინის მეცნიერებათა დოქტორ, გურანდა ფხაკაძესთან.
რამ განაპირობა თქვენი პროფესიის არჩევა?
მახსოვს, ბავშვობაში ბებიას პირობა მივეცი, ვუთხარი: „რომ გავიზრდები, აუცილებლად ექიმი გამოვალ“. ექიმობა ბავშვობიდან მინდოდა, ჩემი ოცნება იყო… დედა სამედიცინო სფეროს წარმომადგენელი გახლდათ და მუდამ ვხედავდი თეთრხალათიან ადამიანებს ჩემ გარშემო. ეს ყველაფერი განსაკუთრებულ ემოციებს იწვევდა ჩემში.
ექიმის პროფესია დაუღალავ შრომას მოითხოვს. როგორ შეძელით კარიერისა და ოჯახის შეთავსება?
ექიმის პროფესია ნამდვილად დაუღალავ შრომას, ყოველდღიურ განათლებას და უამრავ დროს მოითხოვს, რომელიც ექიმმა უნდა დაახარჯოს პაციენტებსა და საყვარელ საქმეს. ექიმი მუდმივად უნდა იდგეს პაციენტების ჯანმრთელობის სადარაჯოზე. ყოველთვის მზად უნდა იყო, რათა ნებისმიერ დროს, დღის ნებისმიერ მონაკვეთში უპასუხო პაციენტებს. ექიმისთვის არ არსებობს დღესასწაულები, დასვენების დღეები.
მიუხედავად იმისა, რომ მე და ჩემს მეუღლეს 2 შვილი გვყავს, ოჯახთან ერთად მარტივი არ არის თანაფარდობაში იარსებოს კარიერამ, რადგან ხშირად მათთვის მიძღვნილი სამსახურის შემდგომი დროც პაციენტებს ეთმობათ. თუმცა, ოჯახის წევრებმა იციან, რომ გვიან ღამის საათებშიც სატელეფონო ზარი თუ შემოვა, მე აუცილებლად უნდა ვუპასუხო და თუ იმ მომენტში ვერ შევძელი პასუხი, აუცილებლად მექნება უკუკავშირი. მე არ მახასიათებს, უგულებელვყო ზარები, სოციალური ქსელით შემოსული მესიჯები… ყოველთვის ყველას უნდა ვუპასუხო. სხვანაირად არ შემიძლია. მუდამ ვფიქრობ, იქნებ რა შეემთხვა პაციენტს, ასე გვიან რომ რეკავს… იქნებ რა უჭირს…
მოკლედ რომ ვთქვათ, თუ ექიმს უყვარს თავისი პროფესია, არის მოწოდებით ექიმი, შინაგანად მობილიზებული, თანმიმდევრული და აკადემიური, მისთვის არ უნდა წარმოადგენდეს პრობლემას ოჯახისა და სამსახურის შეთავსება. ვფიქრობ, რაც უფრო დაკავებულია ქალი საკუთარი საქმით და განსაკუთრებით საყვარელი საქმით, ის უფრო კარგად ართმევს თავს ოჯახის საქმეებსაც.
პაციენტებთან ურთიერთობა რამდენად მარტივია? არსებობს „ჯადოსნური“ სიტყვები, რომელიც ყველას უნდა უთხრათ?
პაციენტთან ურთიერთობა არ არის რთული, თუ გიყვარს შენი პროფესია. ექიმი ყოველთვის უნდა ცდილობდეს სწორი ინფორმაცია მიაწოდოს თავის პაციენტს; აუხსნას მისი პრობლემა, რომელ დაავადებასთან აქვს საქმე და რა სახის მეთოდები არსებობს ამ პრობლემის მოსაგვარებლად. „ჯადოსნური“ სიტყვა, რომელიც ექიმმა უნდა უთხრას პაციენტს, არის ის, რომ თქვენ ყველაფერი კარგად გექნებათ! თქვენ აუცილებლად გამოჯანმრთელდებით!
ვერ წარმოიდგენთ, რამხელა ძალა აქვს ექიმის ამ სიტყვებს! ზოგჯერ ექიმმა შესაძლოა სიტყვით განკურნოს პაციენტი, ან პირიქით − დაუფიქრებელი ნათქვამით ძალიან ავნოს მას. ამიტომ ჩვენი პროფესიის ადამიანებს გვჭირდება ზედმიწევნით დაფიქრება, საკუთარი ნათქვამის აწონ-დაწონა და ინფორმაციის სწორად მიწოდება პაციენტებისთვის.
რამდენი წელია რაც დავით აბულაძის ქართულ-იტალიურ კლინიკაში მუშაობთ და რატომ ეს კლინიკა?
დავით აბულაძის ქართულ-იტალიურ კლინიკაში ვარ კლინიკის გახსნის პირველსავე დღიდან და ეს პერიოდი უკვე ითვლის 7 წელს. რატომ ეს კლინიკა? − იმიტომ, რომ დავით აბულაძის კლინიკა არის თანამედროვე სტანდარტზე მორგებული ევროპული ხარისხის კლინიკა, რომელიც აღჭურვილია ბოლო თაობის აპარატურით და მაღალი დონის ლაბორატორიით. გარდა ამისა, კლინიკა დაკომპლექტებულია პროფესიონალი, როგორც საქართველოში, ასევე მის ფარგლებს გარეთ მომუშავე ექიმებით. ასეთ გუნდში და პაციენტზე ორიენტირებულ, პროფესიულ გარემოში მეტად საინტერესოა მუშაობა, საქმიანობა და პროფესიული ზრდა.
რა არის თქვენი მთავარი მოტივატორი პროფესიაში?
ჩემი მთავარი მოტივატორი პროფესიულ ზრდაში არის გამოჯანმრთელებული პაციენტების რაოდენობა, მათი მადლიერი მზერა და გულიდან წამოსული სამადლობელი სიტყვები. ამაზე მეტად ძვირფასი და ფასდაუდებელი ექიმისთვის არაფერია!
ვიცით, რომ ბრძანდებით მედიცინის მეცნიერებათა დოქტორი. რა არის თქვენი შემდეგი ნაბიჯი-სამომავლო გეგმა, კარიერული მიმართულებით?
ამ ეტაპზე მინდა ჩემი ცოდნა და განათლება მაქსიმალურად მოვახმარო საკუთარ პაციენტებს. რაც შეეხება კარიერულ ზრდას, ექიმი ყოველთვის პროფესიული ზრდის, ახალი ინფორმაციის მოძიებისა და განვითარების პროცესშია. მედიცინა არ დგას ერთ ადგილას: ყოველთვის რაღაც იცვლება, იხვეწება, ვითარდება და ჩვენც, ექიმებიც, ამ თანამედროვე, ცივილიზებული სამყაროს ყველაზე აქტიური წარმომადგენლები ვართ. სხვაგვარად სამედიცინო სფეროში არსებობა და განვითარება შეუძლებელია.
რას ურჩევდით OK!-ის მკითხველს?
OK!-ის მკითხველს და ნებისმიერ ადამიანს ვურჩევდი − გაუფრთხილდით ჯანმრთელობას! დაიცავით ჯანსაღი ცხოვრების წესი, ეს არის ჯანმრთელობის საწინდარი! დროულად მიმართეთ ექიმს არსებული პრობლემის შემთხვევაში, არ გადადოთ ვიზიტი! გისურვებთ ჯანმრთელობას!
