ვერსალის სასახლე პარიზის გარეუბანში მდებარე მდიდრული სასახლისა და ბაღებისგან შემდგარი ულამაზესი სანახაობაა. იგი ყველაზე დიდი სასახლეა ევროპაში, სადაც ერთდროულად 20 ათასზე მეტი ადამიანი ეტევა. ეს არქიტექტურული ძეგლი ცნობილია თავისი ბაღებით, შადრევნებით და მდიდრული ინტერიერით. შეიძლება დაუჯერებლად მოგეჩვენოთ, მაგრამ ვერსალის პარკში 1400 შადრევანია. სასახლისა და პარკების კომპლექსი ერთიანი კლასიკური სტილითაა შექმნილი. 1789 წლის რევოლუციამდე, ვერსალის სასახლე ფრანგი მეფეების ოფიციალური რეზიდენცია იყო.
ვერსალის უზარმაზარი პარკი აკურატული ფრანგული ბაღებით უშუალოდ სასახლის მიღმა იწყება. მისთვის დამახასიათებელია იმ ეპოქაში პოპულარული სწორი გეომეტრიული ხაზები. ბევრი მცენარე მუზეუმის ისტორიული საარქივო დოკუმენტების მიხედვით აღადგინეს. აქვეა სხვა ქვეყნებიდან ჩამოტანილი ტროპიკული ხეები და ყვავილები. ზამთარში ისინი სპეციალურ ორანჟერეებში გადააქვთ დაბალი ტემპერატურისგან დასაცავად.
ვერსალის სასახლის შემოვლა ერთ დღეში ძალზე ძნელია − მხოლოდ ბაღებს ცხრაას ჰექტრამდე მიწა უჭირავს. სამუზეუმო კომპლექსის ტერიტორიაზე სამი სასახლეა: მთავარი, დიდი ტრიანონი და პატარა ტრიანონი. ტურისტებს შორის განსაკუთრებული პოპულარობით სარგებლობს აგრეთვე სამეფო საჯინიბოები და მარია ანტუანეტას სოფელი.
ტრიანონის პატარა სასახლეს ყველაზე ხშირად მისი ბოლო დიასახლისის − მარია ანტუანეტას სახელს უკავშირებენ. ახალგაზრდა დედოფალი თითქმის მთელ დროს მთავარი სასახლიდან და მისი მოძულე დიდგვაროვნებისგან მოშორებით ატარებდა. პარკის გვერდით გაჩნდა ოპერის შენობა და პატარა უტოპიური სოფელი, სადაც ქალი არარსებული სოფლის ცხოვრებაში იძირებოდა.
ვერსალის სასახლე, იმავდროულად, ხელოვნების ნაწარმოებთა საცავიცაა. აქ იხილავთ ნახატებს, ქანდაკებებს, ავეჯს, საიუველირო ნაკეთობებს. ყველზე ცნობილია სარკეებიანი, სეფედარბაზი (იგივე აპოლონის) და ვენერასი. დანარჩენ სალონებს ბერძნული ან რომაული ღმერთების, ქალღმერთებისა და მითოლოგიური გმირების სახელები ჰქვია: ჰერაკლე, დიანა, მერკური, მარსი და სხვ.
1979 წელს ვერსალი ერთ-ერთი პირველი იყო, რომელიც იუნესკომ მსოფლიო ისტორიული მემკვიდრეობის ძეგლთა სიაში შეიტანა. ვერსალის სასახლე საფრანგეთის დიდების სიმბოლოდ გადაიქცა, დღეს კი მას პარიზში ჩასული უამრავი ტურისტი სტუმრობს. სასახლე ყველას აოცებს თავისი მასშტაბებით და გულგრილს არავის ტოვებს.
