2025 წელს ვარსკვლავები წითელი ხალიჩისთვის ძირითადად, ცნობილი ბრენდების საარქივო კოლექციების ლუქებს ირჩევდნენ და ცდილობდნენ მოდაში საკუთარი სტილი მაქსიმალურად წარმოეჩინათ, თუმცა მათი არჩევანი ყოველთვის წარმატებული არ ყოფილა.
გავიხსენოთ, ვინ და როგორი შეცდომები დაუშვა წითელ ხალიჩაზე.
ბელა პორჩი
მომღერალმა და ბლოგერმა ლოს-ანჯელესში, Variety Hitmakers-ის ღონისძიებაზე დასასწრებად Gucci-ს ლურჯი კაბა შეარჩია 2026 წლის კრუიზული კოლექციიდან. ეს სამოსი სრულიად შეუფერებელი აღმოჩნდა ტანდაბალი გოგონასთვის, რაც ყველამ შენიშნა.
მილა კუნისი
უკრაინული წარმოშობის მსახიობი ფილმის Wake Up Dead Man: A Knives Out Mystery პრემიერაზე თავისი ერთ-ერთი ყველაზე წარუმატებელი კაბით გამოჩნდა. 42 წლის მილას The New Arrivals-ის აბრეშუმის გრძელი კაბა ეცვა, რომლის სიგრძეც არასწორად იყო შერჩეული – კაბა ბოლოში იკეცებოდა და წელის ხაზზე ცუდად ჯდებოდა. გარდა ამისა, ქსოვილი დაჭმუჭნული იყო.
ჩეის ინფინითი
მსახიობმა ღონისძიებისთვის Louis Vuitton-ის რძისფერი კაბა შეარჩია, თუმცა სამკუთხედის ფორმის სილუეტი და ტანზე მეტისმეტად მჭიდროდ მომდგარი კორსეტი, რომელიც ფაქტობრივად, მკერდს აწვებოდა, საკმაოდ უცნაურად გამოიყურებოდა.
ამანდა საიფრიდი
ჰოლივუდის ვარსკვლავი Governors Awards-ზე Valentino-ს კაბით მივიდა, თუმცა მკერდზე ვარდისფერმა ბაფთამ და მკლავებზე ბეწვმა ყველაფერი გააფუჭა.
რეიჩელ სენოტი
ამ მსახიობის სიმაღლე დაახლოებით, 157 სანტიმეტრია და თეორიულად, მოკლე კაბები ძალიან უნდა უხდებოდეს, თუმცა ლუქი, რომელიც სტილისტმა შეურჩია, სრული ჩავარდნა აღმოჩნდა. რეიჩელს Chloé-ის ფერადი მინიკაბა ეცვა 2026 წლის შემოდგომა–ზამთრის კოლექციიდან.
ჯენიფერ ლოურენსი
მსახიობი რომის კინოფესტივალის წითელ ხალიჩაზე Dior-ის 2026 წლის გაზაფხული–ზაფხულის კოლექციის ლუქით გამოვიდა, თუმცა ბევრმა აღნიშნა, რომ ჯენიფერს ერთმანეთთან შეუთავსებელი სამოსი ეცვა. გარდა ამისა, სვიტერი მხრებიდან მუდმივად სძვრებოდა და მსახიობს მისი გასწორება უწევდა, რაც აშკარა დისკომფორტს უქმნიდა.
მია გოთი
ახალი „ფრანკენშტეინის“ ვარსკვლავმა Dior-ის კაბა ბრენდის ახალი კრეატიული დირექტორის კოლექციიდან შეარჩია, თუმცა „შიშველი კაბა“ არა მხოლოდ გამჭვირვალობის, არამედ სიგრძისა და ჭრილების გამოც ძალიან უცნაურად ჩანდა.
სიდნი სუინი
ჰოლივუდის ქერა მსახიობი თანამედროვე კინოს ერთ-ერთ ყველაზე მოთხოვნად ვარსკვლავად ითვლება, თუმცა Toronto International Film Festival-ზე თავისი ახალი ფილმის პრემიერაზე სრულიად დაჭმუჭნული Erdem-ის კაბით გამოჩნდა.
სარა პიჯონი
მსახიობი, რომლის მონაწილეობითაც 2026 წლის დასაწყისში ჯონ კენედი უმცროსისა და კეროლაინ ბესეტის შესახებ გადაღებული სერიალი გამოვა, ძალიან ლამაზი გოგონაა, თუმცა Prada-ს კაბა, რომელიც ერთ-ერთ ღონისძიებაზე ეცვა, მას საერთოდ არ უხდებოდა.
Ice Spice
რეპერმა წითელი ხალიჩისთვის Dolce & Gabbana-ს კაბა შეარჩია, თუმცა სამოსი მის აღნაგობას საერთოდ არ შეეფერებოდა. გარდა ამისა, კაბა ძლიერ იჭმუჭნებოდა და მკერდს აწვებოდა.
მოლი გორდონი
ერთი შეხედვით, Jacquemus-ის კაბა ძალიან ელეგანტური და ლაკონური ჩანდა, თუმცა სინამდვილეში მსახიობს მკერდზე აწვებოდა და ბოლოში დაჭმუჭნული იყო.
მარია ბრაზი
ინფლუენსერი კანის კინოფესტივალის წითელ ხალიჩაზე Chanel-ის 1987 წლის კოლექციის წითელი კაბით გამოჩნდა, თუმცა მთელი მისი ექსკლუზიურობისა და ვინტაჟურობის მიუხედავად, დიზაინი ძალიან მოძველებულად გამოიყურებოდა.
ლენა მაჰფუფი
ფრანგმა ინფლუენსერმა მოდური Alaïa-ს ლუქი შეარჩია კრეატიული ტოპითა და ფუმფულა ქვედაბოლოთი, თუმცა ტოპი მკერდზე უცნაურად გამოიყურებოდა, ხოლო ქვედაბოლოს სიგრძე ლენას ფეხებს ვიზუალურად ამოკლებდა.
ჰოლი ბერი
ოსკაროსანმა ვარსკვლავმა კანის კინოფესტივალის წითელ ხალიჩაზე Celia Kritharioti-ს კაბით გაიარა, რომელიც საერთოდ არ უხდებოდა. სამოსი მკერდს აწვებოდა და იღლიების არეში არაესთეტიკურად გამოიყურებოდა, ხოლო ქვედაბოლო მსახიობის ფეხებს ამოკლებდა.
შაკირა
პოპ-მომღერალი Met Gala-ზე Prabal Gurung-ის კაბაში მშვენივრად გამოიყურებოდა, თუმცა სამოსი ღონისძიებას საერთოდ არ შეესაბამებოდა. წლევანდელი ღონისძიების თემა იყო Superfine: Tailoring Black Style (უმაღლესი მოდა: შავი სტილის მორგება) ღონისძიება პატივს მიაგებდა შავ დენდიზმს, რომელიც წარმოადგენს გადაჭარბებულ ზრუნვას ისეთ რაიმეზე, რაც საჭიროა მაღალ წრეებში თავის წარდგენისთვის, შაკირამ კი დრესკოდი სრულად უარყო და უზარმაზარ, ზეფირის მსგავს კაბაში მივიდა.
ლისა მანობანი
Blackpink-ის ჯგუფის ვარსკვლავის დებიუტი Met Gala-ზე Louis Vuitton-ის უშარვლო ლუქით შედგა. გოგონას ეცვა შავი, ბრჭყვიალა ჟაკეტი გამჭვირვალე დეტალებით, ლოგოტიპიანი კოლგოტები და საცვალი. მალე ლისას იმიჯი ღონისძიებაზე ყველაზე სკანდალური გახდა, რადგან ბევრს არ მოეწონა, რომ საცვლებისთვის შეარჩიეს ქსოვილი გამოჩენილი შავკანიანი ქალების სახეებით.
სელმა ბლერი
Betsey Johnson-ის ოქროსფერ კაბაში გამოწყობილი მსახიობი 80-იანი წლების გამოსაშვებ საღამოზე მყოფ მოსწავლეს ჰგავდა – მის ლუქს მხოლოდ გვერდზე გაკეთებული კუდი აკლდა.
პამელა ანდერსონი
წელს ვარსკვლავი ხშირად შთამბეჭდავი ლუქებით ჩნდებოდა და თამამ ექსპერიმენტებს ატარებდა, თუმცა სტილისტმა, რომელმაც Tory Burch-ის კოსტიუმი შეურჩია, აშკარად შეცდომა დაუშვა – ქვედაბოლო ზედმეტად გრძელი იყო, ჟაკეტი კი დიდი ზომის, რის გამოც სახელოები იჭმუჭნებოდა.
ოლივია მანი
მსახიობმა გაწელილი და დაჭმუჭნული ქსოვილისგან შეკერილი Maticevski-ის კაბა შეარჩია. ალბათ ეს თამამი არჩევანი იყო, თუმცა საბოლოოდ, ოლივია ისე გამოიყურებოდა, თითქოს უბრალოდ ზეწარში იყო გახვეული.
ტიმოთი შალამე და კაილი ჯენერი
ტიმოთი შალამე და რეალითი-შოუს ვარსკვლავი კაილი ჯენერი ლოს-ანჯელესში, ფილმის Marty supreme -ს ერთად დაესწრნენ. წყვილი საზოგადოებაში ერთნაირი, ნარინჯისფერი Chrome Hearts-ის ლუქებით გამოჩნდა. მიუხედავად იმისა, რომ შეყვარებულები თითქოს ლამაზად იყვნენ ჩაცმულნი, ნარინჯისფერი ფერის ასეთი გადაჭარბება სოციალურ ქსელებში უამრავი ხუმრობის მიზეზი გახდა.
ასევე დაგაინტერესებთ
