ვარდისფერი ოქტომბერი – ძუძუს კიბოს შესახებ ცნობიერების ამაღლების თვეა. აღნიშნული დაავადების ადრეულ სტადიაზე გამოვლენა მისი დამარცხებისთვის აუცილებელია. ამ თვეს მსოფლიოს სხვადასხვა ქვეყანაში ადამიანები, სამედიცინო ორგანიზაციები, ასევე ცნობილი fashion თუ beauty-ბრენდები ერთიანდებიან საერთო მიზნის გარშემო: ცნობიერების ამაღლებით დაამარცხონ მსოფლიოში ერთ-ერთი ყველაზე გავრცელებული სიმსივნე. აღსანიშნავია, რომ გადარჩენილების პატივსაცემად, ადამიანები ატარებენ ვარდისფერ ლენტებს. ჟურნალი OK! გაგაცნობთ მოდისა და სილამაზის იმ ბრენდებს, რომლებიც გამოხატავენ საკუთარ აქტიურ მხარდაჭერას ძუძუს კიბოს წინააღმდეგ ბრძოლაში.
Estee Lauder – 30 წლის წინ, როდესაც ჯერ კიდევ არ არსებობდა ვარდისფერი ლენტი და ქალები მთელ მსოფლიოში იღუპებოდნენ მკერდის კიბოთი, Estee Lauder-მა (ჯოზეფინ ესტერ მენცერმა) − ბრენდის დამფუძნებელმა, გადაწყვიტა ძუძუს კიბოს წინა პლანზე წამოწევა. 1992 წელს ის გახდა ერთ-ერთი პიონერი, რომელმაც წამოიწყო ძუძუს კიბოს წინააღმდეგ ბრძოლის კამპანია და შექმნა ვარდისფერი ლენტი, რომელიც შემდგომ იქცა სიმბოლოდ. ერთი წლის შემდეგ, მან დააარსა არაკომერციული ორგანიზაცია Breast Cancer Research Foundation® (BCRF), რათა გამოემუშავებინა თანხები და მოეძია დაფინანსება მხოლოდ ძუძუს კიბოს კვლევისთვის. დღემდე ქალბატონი ლაუდერის გზას აგრძელებს მისი ბრენდი და შთამომავალი. კამპანია მხარს უჭერს 60-ზე მეტ ორგანიზაციას მსოფლიოში.
Ralph Lauren-ის Pink Pony-კოლექცია– 2000 წელს მოდის ამერიკულმა კომპანიამ წამოიწყო გლობალური კამპანია, სახელწოდებით Pink Pony Campaign. იგი მხარს უჭერს ინიციატივებს, რაც ხელმისაწვდომს ხდის ხარისხიან მკურნალობას ძუძუს კიბოს მქონე პაციენტებისთვის. Pink Pony-კოლექციიდან შეძენილი თითოეული ნივთის გაყიდვის 25 პროცენტი ირიცხება ფონდში, ან კიბოს სხვადასხვა საერთაშორისო საქველმოქმედო ორგანიზაციაში.
Jimmy Choo-მ შემოგვთავაზა კაფსულების კოლექცია, რომელიც შეიცავს ულამაზეს და ტრენდულ ჩანთებს, საფულეებს და სხვა აქსესუარებს. ყველაზე გაყიდვადი – BING 100 ბროლის სამაჯური, ღია ვარდისფერ ატლასში აღმოჩნდა. ამ კოლექციის თითოეული ნივთის გაყიდვიდან შესყიდვის ფასის 20 პროცენტი კვლევის ფონდს გადაეცემა.
Sezane – ყოველ წელს ბრენდი ოქტომბრის თვის პირველ ორშაბათს წარადგენს ვარდისფერ კოლექციას − ეს ვარდისფერი შემოდგომაა. Sezane კიდევ ერთხელ ადასტურებს თავის მხარდაჭერას და მთელი მოგება კიბოს კვლევას გადაეცემა.
Sigma Beauty – ბრენდმა The Pink Fund-თან თანამშრომლობის შედეგად, Pretty In Pink Set-კოლექცია გამოუშვა. Sigma Beauty არის ორგანიზაცია და იგი ეხმარება ადამიანებს, რომლებიც მკურნალობენ და იბრძვიან ძუძუს კიბოს წინააღმდეგ. კოლექცია მოიცავს თვალის „ჩრდილების“ პალიტრას, ფუნჯებს და დამატენიანებელ, თხევად ტუჩსაცხს. გაყიდვების შედეგად შემოსული თანხა გადაეცემა Pink Fund-ს.
Savage X Fenty – რამდენიმე წელია გამოხატავს თავის მხარდაჭერას ძუძუთი კიბოს წინააღმდეგ ბრძოლაში. ბრენდის მიზანია, ამ საკითხის შესახებ ცნობიერების ამაღლება, სწორედ ამიტომ კამპანიაში მონაწილეობენ ის ადამიანები, რომლებმაც აღნიშნული დაავადება დაამარცხეს. ისინი სხვებს უზიარებენ თავიანთ ისტორიებს და წარმოადგენენ ერთგვარ მაგალითს ადამიანებისთვის, თუ როგორ უნდა დაამარცხონ ეს ვერაგი დაავადება. Savage x Fenty-მა წარმოადგინა სპეციალური ვარდისფერი ოქტომბრის კაფსულების კოლექცია, რომელიც შედგება შორტების, გამაშებისა და ტოპებისგან.
PUMA – შარშან გლობალური სპორტული კომპანია გაერთიანდა Barbell for Boobs-თან ერთად და გამოუშვა კოლექცია, რომელიც მოიცავს სავარჯიშო მაისურებს, ტოპებს, წინდებს და სხვა აქსესუარებს. Barbell for Boobs არის ძუძუს კიბოს საზოგადოება და იგი ეხმარება ადამიანებს, რომლებსაც აქვთ ძუძუს კიბოს დიაგნოზი ან დაამარცხეს აღნიშნული დაავადება. Barbell for Boobs ასევე, უზრუნველყოფს მათ საჭირო რესურსებით, ცხოვრების ხარისხის გასაუმჯობესებლად.
Lele Sadoughi – ძუძუს კიბოს შესახებ ცნობადობის ამაღლების მიზნით, ბრენდმა მშვენიერი ვარდისფერი თავსაბურავი შემოგვთავაზა. თითოეული ამ თავსაბურავის გაყიდვიდან შემოსული თანხის ათი პროცენტი გადაეცემა ძუძუს კიბოს კვლევის ფონდს (BCRF).
