რამდენიმე დღის წინ, ცნობილი ბრენდის Valentino-ს ინსტაგრამ გვერდზე ახალი ფოტო გამოქვეყნდა კამპანიიდან, რომელიც Roman Stud-ის ჩანთის უახლეს მოდელს ეძღვნებოდა ბოლოდროინდელი კოლექციიდან. სარეკლამოდ აირჩა 28 წლის ფოტოგრაფის – მაიკლ ბეილის ავტოპორტრეტი, რომელმაც სოციალურ ქსელებში არაერთგვაროვანი გამოხმაურება დაიმსახურა.
“არა, მადლობა! ამას ხელოვნებასთან არანაირი კავშირი არ აქვს”
“ამ ჩანთის შეძენა მსურდა! ახლა აღარ მინდა!”
“ეს მამაკაცია თუ ქალი” ჩვენ უნდა გამოვიცნოთ?!”
სწორედ ასეთი კომენტარებით შეხვდა ბრენდის კრეატიულობას საზოგადოების დიდი ნაწილი, თუმცაღა გარკვეული კატეგორია თამამ ნაბიჯს იწონებს, ფოტომოდელს კი ჯონი დეპის ახალგაზრდობასთან აიგივებს.
სკანდალი უყურადღებოდ არც Valentino-ს კრეატიულმა დირექტორმა – 54 წლის პიერპაოლო პიჩოლიმ დატოვა და სოციალურ ქსელში სტატუსი გამოაქვეყნა:
“.. რევოლუცია მხოლოდ მაშინ არის შესაძლებელი, როცა ინკლუზიურობა შეგვიძლია, როცა ვიცავთ ადამიანის უფლებებს და აზრის გამოხატვის თავისუფლებას. სიძულვილი – ეს აზრის გამოხატვა არ არის, ეს შიშით გამოწვეული შიშია, რომელიც მარტივად შეიძლება ძალადობაში გადაიზარდოს.”
