ვალენტინა სამპაიო იქნება პირველი ტრანსგენდერი ქალი, რომელიც 15 ოქტომბერს, Victoria’s Secret-ის პოდიუმზე გაივლის. ვალენტინა 26 წლის ბრაზილიელი მოდელია, რომელიც წლებია მოდის ინდუსტრიაში არსებულ ბარიერებს ამსხვრევს. 2017 წელს მან საერთაშორისო მედიის ყურადღება მიიპყრო, როდესაც გახდა პირველი ტრანსგენდერი მოდელი, რომელიც ფრანგული Vogue-ის გარეკანზე მოხვდა.
ბრაზილიელმა მოდელმა სულ ახლახან ესპანური ELLE-ის 2024 წლის ოქტომბრის ნომრის გამოცემა დაამშვენა.
„იყო ტრანსგენდერი, ხშირად ხალხის გულისა და გონების ჩაკეტილ კართან დაპირისპირებას ჰგავს. ჩვენ ვიღებთ და განვიცდით უამრავ დაცინვას, შემზარავ კომენტარსა და ფიზიკურ ძალადობას, მხოლოდ იმიტომ, რომ ზოგიერთი ადამიანის აზრით, არსებობის უფლება არ გვაქვს. გაიზარდო მოსიყვარულე ოჯახში, გქონდეს ნაყოფიერი გამოცდილება სკოლაში და იშოვო ღირსეული სამსახური, წარმოუდგენლად შეზღუდული და ლიმიტირებულია ჩვენთვის“, − განაცხადა ვალენტინამ SI-სთან საუბრისას.
ვალენტინა სამპაიო ბრაზილიის ჩრდილოეთ ნაწილში, სეარაში გაიზარდა. მან 8 წლის ასაკში ფსიქოლოგის დახმარებით აღმოაჩინა, რომ ტრანსგენდერი იყო, თუმცა საკუთარ თავს 12 წლის ასაკამდე ვალენტინას არ უწოდებდა. ბრაზილიელმა ლამაზმანმა სამოდელო საქმიანობა 16 წლის ასაკში დაიწყო, როდესაც იგი მაკიაჟის არტისტმა აღმოაჩინა და სან პაულოს სამოდელო სააგენტოსთან დააკავშირა.
როგორც სამპაიო ინტერვიუში აღნიშნავს, გენდერული იდენტიფიკაციის გამო, ხშირად დაცინვისა და დისკრიმინაციის მსხვერპლი გამხდარა, თუმცა ამჯერად აანალიზებს, რომ მისმა სტატუსმა პოზიტიური ცვლილების საშუალება მისცა. მას მიაჩნია, რომ ეს შანსი, ბრაზილიის ტრანსგენდერი მოსახლეობის წინაშე დიდი პასუხისმგებლობაა.
„ვაცნობიერებ, რომ იღბლიანი ვარ და ვეცდები, ეს ყველაფერი ცვლილებებისთვის მაქსიმალურად გამოვიყენო“. ის პირობას დებს, რომ შეინარჩუნებს საკუთარ გზას, ერთგვარ მისიას, გააგრძელოს მარგინალიზებული ადამიანების შეგულიანება. მოდელი LGBTQ+ აქტივისტია, რომელიც ხშირად საუბრობს ტრანსგენდერებისთვის არსებულ პრობლემებსა და მათი გადაჭრის გზებზე, აქტიურად იბრძვის ადამიანების უფლებების დასაცავად და მათი ცნობიერების ასამაღლებლად.
