OK! და იტალიური ბრენდი GEOX წარმოგიდგენთ ინტერვიუს ქეთი ხატიაშვილთან, რომელიც გვესაუბრებათ იმის შესახებ, თუ როგორია წარმატებულ ქალად და წარმატებულ დედად ყოფნა. ქეთიმ გვიამბო იმის შესახებაც, თუ როგორ ატარებს თავის შვილთან ერთად თავისუფალ დროს და როგორი მიდგომაა ბავშვთან საჭირო იმისათვის, რომ მშობელმა კარგი შედეგი მიიღოს. ყოველივე ამის ვრცლად გასაგებად, გაეცანით ინტერვიუს.
ქეთი, თქვენი საქმიანობიდან გამომდინარე, გადატვირთული გრაფიკი გექნებათ. დაახლოებით რა დროს ატარებთ თქვენს შვილთან ერთად და როგორ ცდილობთ ამ დანაკლისის შევსებას?
ხელს გვიწყობს ფაქტი, რომ ანასტასია ჩემს ტანვარჯიშის აკადემიაში დადის. ამდენად, მას შემდეგ, რაც იგი სკოლიდან ბრუნდება, გვეძლევა შესაძლებლობა იმისა, რომ 4-დან 8 საათამდე გაკვეთილებზე ერთად ვიყოთ, რა დროსაც მეტ-ნაკლებად გვაქვს კომუნიკაცია. ვარჯიშის შემდეგ კი შინ ერთად ვბრუნდებით და ვცდილობთ ავინაზღაუროთ ის დრო, რომელსაც ერთად ვერ ვატარებთ. ვგეგმავთ სხვადასხვა აქტივობას და ერთად ვმეცადინეობთ.
ყველაზე მეტად რის გაკეთება უყვარს თქვენს შვილს დედასთან ერთად?
ვინაიდან მეც და ანასტასიასაც გადატვირთული გრაფიკი გვაქვს, მნიშვნელობა არ აქვს, რას ვაკეთებთ − მთავარია, ერთად ვიყოთ. თუმცა ჩემთან ერთად განსაკუთრებით საყიდლებზე სიარული უყვარს. ამ დროს ძალიან ვხალისობთ და ვერთობით. ამინდების გაუარესებასთან ერთად ზამთრის ფეხსაცმლის ძებნა დავიწყეთ და, რა თქმა უნდა, GEOX-ს მივაკითხეთ. ძალიან გვიყვარს ეს ბრენდი – დახვეწილი დიზაინით, კომფორტული, ბავშვებისთვისაც და ზრდასრულებისთვისაც დიდი არჩევანია. ფეხსაცმელის ხარისხი ჩვენთვის ძალიან მნიშვნელოვანია.
რომელი თვისებაა, რომელიც თქვენს შვილს ყველაზე მეტად მოსწონს თქვენში, და რატომ?
ვფიქრობ, ანასტასიას ყველაზე მეტად ჩემი უეცარი გადაწყვეტილებები მოსწონს. მაგალითად, როდესაც მეცადინეობს და ვატყობ, დაღლილია ან რაიმე არ გამოსდის და ვეუბნები, რომ შეუძლია თავი დაანებოს ან დაისვენოს, ძალიან უკვირს და მოსწონს. ვინაიდან, იგი ჯერ პატარაა, ვცდილობ, სახალისო გავხადო მისი სწავლის პროცესი და დასვენების მიზნით უეცრად სასეირნოდ გავდივართ ან რაიმე აქტივობას ვგეგმავთ.
რას გვეტყვით თქვენი შვილის ინტერესებთან დაკავშირებით? რამდენად ხშირად ემთხვევა მისი ინტერესები თქვენსას?
ჩემი და ანასტასიას ინტერესები ძალიან ხშირად ემთხვევა. ემთხვევა ჩვენი გემოვნებაც. მიუხედავად იმისა, რომ ვცდილობ თავს არ მოვახვიო ჩემი აზრი, ანასტასია ყოველთვის ითვალისწინებს ჩემს რჩევას. როდესაც ფილმს ერთად ვუყურებთ და ვმსჯელობთ ამა თუ იმ პერსონაჟის ქმედებებზე, იმაზე, თუ ჩვენ მის ადგილას როგორ მოვიქცეოდით, ხშირად ერთმანეთის აზრს ვიზიარებთ.
როგორია ქეთი ხატიაშვილი, როგორც დედა?
ქეთი, როგორც დედა, არის ზომიერად მკაცრი და პრინციპული, რადგან ანასტასიას ხასიათიდან გამომდინარე, საჭიროა, მუდმივად ტონუსში მყავდეს, რადგან თუ ასე არ იქნება, უცებ შეიძლება მთელი სისტემა ჩამოგვექცეს. შინ ძალიან მხიარული ვარ. მე და ანასტასია ბევრ რამეს ვაკეთებთ: გვიყვარს ერთად ცეკვა, ქალაქგარეთ გასვლა და გართობა.
