საკუთარი საქმის პროფესიონალი მაშინ ხარ, როდესაც გიყვარს ის საქმე, რასაც აკეთებ. გარდა ამისა, მნიშვნელოვანია განვითარებისთვის მუდმივი მზადყოფნა და სურვილი. პროფესიაზე, სამომავლო გეგმებსა და სხვა საინტერესო თემებზე ჟურნალი OK! ექიმ-სტომატოლოგს, „ნიუ დენტ XXI“-ის თანადამფუძნებელს, თამარ შავაძეს ესაუბრა.
რატომ აირჩიეთ სტომატოლოგობა? რას ნიშნავს თქვენთვის ეს პროფესია?
სტომატოლოგობა ჩემი ოცნება არასდროს ყოფილა. უბრალოდ, თავისთავად მოხდა, რომ ეს ის იყო, რაც ყველაზე მეტად მესმოდა. დედა სტომატოლოგი მყავს და ფაქტობრივად, ბავშვობა სტომატოლოგიურ კლინიკაში მაქვს გატარებული.
განათლება თბილისის სახელმწიფო უნივერსიტეტში მივიღე, რეზიდენტურა კი სასწავლო-კვლევით ცენტრ „უნიდენტში“. ასევე, გადამზადების კურსები გერმანიაში, იტალიასა და უკრაინაში გავიარე.
რა მოგცათ ამ ქვეყნებმა? რას ურჩევდით იმ ახალგაზრდებს, ვისაც სწავლის გაგრძელება საზღვარგარეთ სურთ?
პირველი, რაც ამ ქვეყნებში სწავლამ მიმახვედრა არის ის, რომ აუცილებელია მუდმივი წინსვლა და განვითარება, არა მხოლოდ მედიცინაში, ნებისმიერ სფეროში. ყოველთვის უნდა იყო მზად სიახლისთვის და არ უნდა გაჩერდე.
ასევე, შეცვალა ჩემი ხედვა სხვადასხვა საკითხის მიმართ. დავრწმუნდი, რომ ადამიანი მაშინ კი არ მარცხდება, როდესაც არ გამოსდის, არამედ მაშინ, როდესაც წინსვლას არ ცდილობს.
გარდა ამისა, საზღვრებს გარეთ სწავლისას გავიცანი უამრავი კოლეგა, რომლებიც ჩემთვის დღემდე მოტივატორები არიან.
ახალგაზრდებს ვურჩევდი, კარგად გაიაზრონ, რომ წინ ძალიან ბევრი შრომა და გამოწვევა ელით, თუმცა შედეგად ნამდვილად ღირს.
რა ადგილი უჭირავს თქვენს ცხოვრებაში პროფესიულ საქმიანობას?
შეიძლება ითქვას, ეს პროფესია ჩემი ცხოვრებაა. ეს არის ის, რასაც ყველაზე მეტ დროს ვუთმობ და რაშიც ყველაზე დიდ ენერგიას და რესურსს ვდებ. ეს პროფესია მაბედნიერებს და მე მისით ვარსებობ.
მიყვარს მოღიმარი და ბედნიერი ადამიანების ყურება. როცა ადამიანი თვალებით იღიმის, თითქოს მის სულს ხედავ, თუ ლამაზ კბილებსაც დავუმატებთ, მისი ღიმილით მივიღებთ სრულყოფილ, თავდაჯერებულ ადამიანს მინიმალური კომპლექსებით – გარდა ესთეტიკური და ფუნქციური პრობლემებისა, ხშირ შემთხვევაში ადამიანებს ტკივილისგან ვათავისუფლებთ.
რა მიგაჩნიათ თქვენი პროფესიის ყველაზე რთულ გამოწვევად?
არ ვიცი, ალბათ, ინდივიდუალურია. ჩემთვის ყველაზე რთულია ადამიანებთან კომუნიკაცია, ყველას დამახსოვრება, მათი პრობლემის თუ სურვილის გათვალისწინება, განსაკუთრებით კი, როცა სურვილები და რეალობა ერთმანეთს სცდება. მე თავისთავად, პასუხისმგებელი ვარ უზრუნველვყო ჩემი პაციენტების საუკეთესო მომსახურება.
რა ან ვინ არის თქვენი მთავარი მოტივატორი?
ყველაზე ბედნიერი წუთები მაშინაა, როდესაც კმაყოფილ პაციენტს ვხედავ. ეს არის ჩემთვის დიდი მოტივაციაც და წარმატებაც. ამ დროს მიჩნდება სურვილი, უფრო მეტი გავაკეთო.
ადამიანმა არასოდეს არ უნდა შეწყვიტოს განვითარება და ტემპი არ უნდა შეანელოს. მით უმეტეს, სტომატოლოგია ის დარგია, რომელიც ყოველწლიურად ვითარდება და რაღაც ახალს გვთავაზობს. სწორედ ამიტომ შენც უნდა აუწყო ფეხი და მზად იყო სიახლისთვის.
რას ნიშნავს ბათუმი თქვენთვის?
ბათუმი ჩემი სახლია. მიუხედავად იმისა, რომ ბევრ ქვეყანაში თუ ქალაქში ვარ ნამყოფი, არასდროს გამჩენია სურვილი, სხვაგან მეცხოვრა.
რას ეტყოდით ქალებს სამოტივაციოდ?
არა მარტო ქალებს, ყველა ადამიანს ვეტყოდი, რომ არ არსებობს არაფერი, რაც ვერ გამოგვივა. ზოგის გზა წარმატებისკენ სხვებთან შედარებით უფრო მარტივი ჩანს, მაგრამ თუ საკმარის სურვილს და შრომას ჩავდებთ, მაშინ ყველაფერი გამოვა. მთავარია, არ დავითრგუნოთ და არასოდეს დავკარგოთ საკუთარი თავის რწმენა.
რას ურჩევდით პაციენტებს?
პაციენტებს ვურჩევდი, ისევე მოუფრთხილდნენ პირის ღრუს, როგორც ნებისმიერ სხვა ორგანოს, მოუარონ არა მარტო ვიზუალისთვის, არამედ სიჯანსაღისთვისაც.
მნიშვნელოვანია, სტომატოლოგს მიმართონ პროფილაქტიკის მიზნით და არა მხოლოდ მაშინ, როცა პრობლემის წინაშე აღმოჩნდებიან.
სამომავლო გეგმები…
არ მიყვარს სამომავლო გეგმებზე წინასწარ საუბარი, მირჩევნია განვახორციელო და შემდეგ შედეგზე ვისაუბრო.
ტექსტი: სოფიო მალანია
ფოტო: გიორგი კალანდაძე
