ლეგენდარული სოფი ლორენი, მსოფლიოში აღიარებული თავისი ნიჭითა და სილამაზით, რომელსაც ძლიერი ქალის სიმბოლოდ მოიხსენიებენ, საზოგადოებრივ წნეხს, ტკივილსა და შეურაცხყოფას გაუძლო, იმისთვის, რომ საკუთარი გრძნობებისთვის არ ეღალატა. მიუხედავად თაყვანისმცემლების ურიცხვი რაოდენობისა მთელი ცხოვრება ერთი კაცის სიყვარულს ატარებს.
„როცა კარლო წავიდა, დრო შეჩერდა. სიცოცხლე გაგრძელდა, მაგრამ თითქოს ძილბურანში დავრჩი“.
16 წლის იყო, როცა კარლო პონტი, მასზე 22 წლით უფროსი, გავლენიანი და ჭკვიანი კინოპროდიუსერი გაიცნო, რომელიც მის კარიერულ წინსვლაშიც მონაწილეობდა და თანდათან სულ უფრო მნიშვნელოვან ადგილს იკავებდა მსახიობის ცხოვრებაში.
,,ეს პირველი ნახვით სიყვარული იყო” – ამბობს სოფი ლორენი თავის ავტობიოგრაფიულ წიგნში Yesterday, Today, Tomorrow.
მათ შორის თავდაპირველად მეგობრული ურთიერთობა ჩამოყალიბდა. პონტი უკვე დაქორწინებული იყო ჯულიანა ფიასტრიზე და იმ დროს იტალიაში განქორწინება მკაცრად იკრძალებოდა. სოფი ლორენს უამრავი ადამიანი ადანაშაულებდა, მათ შორის ეკლესიამაც კი ზურგი აქცია.
1957 წელს მექსიკაში საიდუმლოდ იქორწინეს და რამდენიმე წლის შემდეგ, მაშინ როცა პონტიმ კანონიერად განქორწინება მოახერხა, იტალიაში ოფიციალურად შეუღლდნენ.
მათ ორი შვილი ჰყავთ – ცნობილი დირიჟორი კარლო პონტი უმცროსი და და ედუარდო პონტი, კინორეჟისორი, რომლის ფილმშიც The Life Ahead 86 წლის სოფი ლორენმა მთავარი როლი შეასრულა.
მსახიობი დღემდე აღნიშნავს, რომ კარლო პონტი მისი ერთადერთი კაცი იყო. ფიქრითაც კი არასდროს უღალატია. ეს სიყვარული ჩვეულებრივი არ ყოფილა – კინემატოგრაფიული ამბავი იყო, რეალურ ცხოვრებაში, რომელსაც დრო, კანონი და საზოგადოება ვერ მოერია. ქალი, რომელმაც მთელი თავისი დიდება, კარიერა და გარშემო მყოფი მამაკაცები ერთი სიყვარულისთვის უარყო.
