ყველასთვის საყვარელი ლურჯი არსებები სმურფები ახალი ფილმით დაგვიბრუნდნენ. ის მხოლოდ ბავშვებისთვის არ არის, რადგან მეგობრობაზე, საკუთარი თავის პოვნასა და იმ მაგიაზე მოგვითხრობს, რაც თითოეულ ჩვენგანში არსებობს.
ფილმი სმურფების სოფელში ვითარდება, მხიარულ, ერთიან და ჯადოსნურ საზოგადოებაში, სადაც ყველა სმურფს თავისი როლი აქვს: დოქტორი სმურფი, კალენდრის სმურფი, კამუფლაჟის სმურფი და მხოლოდ ერთია, რომელსაც საკუთარი ადგილი ჯერ არ უპოვია. მთავარ გმირად უსახელო სმურფი გვევლინება(No Name Smurf). მის ხმას ცნობილი ბრიტანელი კომიკოსი ჯეიმს კორდენი ახმოვანებს.
სიუჟეტი იწყება მაშინ, როცა სმურფების ლიდერს, ყველასათვის საყვარელ პაპა სმურფს (ჯონ გუდმანი), ბოროტი ჯადოქრები იტაცებენ. მისი გადასარჩენად გზას გაუდგება No Name და ერთადერთი ქალი სმურფი – სმურფეტა, რომელსაც ამჯერად რიანა გაახმოვანებს. ის ძლიერი, დამოუკიდებელი და გამბედავი ლიდერია, რომელმაც კარგად იცის რას ნიშნავს იყო განსხვავებული.
მოგზაურობისას No Name სმურფი აღმოაჩენს, რომ მისი ნიჭი მაგიაა, შეუძლია პორტალების შექმნა, რაც სმურფებს საშუალებას აძლევს გადაადგილდნენ სხვადასხვა განზომილებაში. საბოლოოდ, თავის ნამდვილ სახელსაც გაიგებს – Magic Smurf.
ახალ სმურფულ რეალობაში ყოველი დღე ცეკვით იწყება – დილას პაპა სმურფი დიჯეის როლში გვევლინება და დილას მთელი სოფელი ენერგიულად იწყებს.
სმურფების ისტორია 1958 წელს იწყება. ისინი ბელგიელმა ილუსტრატორმა პიერ კიულიფორმა მეორეხარისხოვან პერსონაჟებად შექმნა, კომიქსისთვის Johan and Peewit, თუმცა სმურფებმა მალევე მოიპოვეს განსაკუთრებული პოპულარობა და სამყაროში ადგილი დაიმკვიდრეს.
პირველი ანიმაციური ფილმი The Smurfs and the Magic Flute 1976 წელს გამოვიდა, ბრიუსელის სტუდიაში, ხოლო 1981 წელს ამერიკულმა Hanna-Barbera-მ სმურფების სერიალი შექმნა.
სმურფების გარეგნობა მხატვრის ცოლმა, ნინემ გადაწყვიტა. ლურჯი მათთვის იდეალური ფერი იქნებოდა: წითელი ბოროტად გამოიყურებოდა, ყვითელი არაჯანსაღად, მწვანე კი გარემოში დაიკარგებოდა.
