სოციალური მედია უკვე დიდი ხანია ჩვენი ცხოვრების განუყოფელი ნაწილი გახდა. Instagram-ის, Facebook-ის, TikTok-ისა და სხვა მრავალი პლატფორმის გახსნის გარეშე ჩვენი ყოველდღიური ცხოვრება თითქმის წარმოუდგენელია. უკვე იმდენი ხანია, რაც სოციალური მედიის “ინფლუენსერები” ეგრეთწოდებულ „კულტურულ ძალას“ წარმოადგენენ, რომ რთულია 21-ე საუკუნის წარმოდგენა მათ გარეშე. სიტყვა ინფლუენსერი ადრეულ წლებში არ არსებობდა, Twitter-ს ძალიან ცოტა ადამიანი მოიხმარდა, ინსტაგრამი კი მხოლოდ 2010 წლის ოქტომბერში ამოქმედდა.
ჰოლივუდის ვარსკვლავებმა, სპორტსმენებმა და შოუბიზნესის წარმომადგენლებმა ისარგებლეს სწრაფად განვითარებადი სოციალური მედიისა და პერსონალური ბრენდინგის სამყაროთი და ნამდვილი იმპერია შექმნეს, რომლებითაც დღეს მილიონიბით დოლარს გამოიმუშავებენ, პარალელურად კი საკუთარ იმიჯს აკონტროლებენ.
დღეს სოციალურ მედიას ვარსკვლავები იყენებენ არამხოლოდ საკუთარი ფოტოებისა და ვიდეოების გამოსაქვეყნებლად, ასევე საკუთარი ბიზნესის დასარეკლამებლად.
დღეს კრიშტიანუ რონალდუ მსოფლიოში ყველაზე მეტი გამომწერის მქონე ვარსკვლავია. ქალ ვარსკვლავებში 2022 წელს კაილი ჯენერი გახდა პირველი, ვინც 300 მილიონი გამომწერი დააგროვა, თუმცა ამჟამინდელი მონაცემებით სელენა გომესმა მასაც გაასწრო და დღეს ინსტაგრამზე ყველაზე მეტი გამომწერის მქონე ქალია.
მისი გამომწერების რაოდენობა 400 მილიონზე მეტია.
