საქართველო რომ საპატიო ადგილს იკავებს სტუმართმოყვარე ქვეყნებს შორის, ეს ყველამ კარგად ვიცით. შესაბამისად, მსოფლიო რუკაზე თავი უკვე მოინიშნა, როგორც ტურისტულად მნიშვნელოვანმა და ღირებულმა მიმართულებამ. ჩვენს ქვეყანაში ყველა რეგიონს თავისი მნიშვნელობა, სანახაობა, ისტორია და კულტურა გააჩნია, აქედან გამომდინარე, ტურისტებისთვის ყველა კუთხე აღმოჩენებით სავსეა. გთავაზობთ სასტუმროების ჩამონათვალს, რომლებიც უნიკალური დიზაინითა და საუკეთესო მომსახურებით გამოირჩევა.
Brim Tbilisi
სასტუმროსთვის მნიშვნელოვანი მახასიათებელია ურბანული დიზაინი, კლასიკური ელემენტები და მოდერნისთვის დამახასიათებელი ფორმები. შენობა და მისი ფორმები ხელით არის მოხატული. შენობის ინტერიერსა და ექსტერიერში კი გამოყენებულია ქართული ზღაპრის „წიქარას“ მოტივები. ასევე საინტერესოა კედელზე ფერების სახით გადმოტანილი აბსტრაქტული ფორმები, რომელთა აღქმის თავისუფლება დიზაინერმა მნახველს დაუტოვა.
საინტერესოა ისიც, რომ სასტუმროს ჩანაფიქრის მთავარი ფორმა ბროწეულია. ყველაფერი ეს კი ბროწეულის კულტურასთანაა დაკავშირებული, რომლის ისტორია ორ ათასწლეულზე მეტს ითვლის. ბროწეული ასევე ცხოვრებისა და თავიდან დაბადების სიმბოლოა. ამ კონტექსტით ის კიდევ უფრო კარგად ერწყმის დიზაინერის ჩანაფიქრს.
სასტუმრო „ქვევრები“
სასტუმრო თელავში, სოფელ შალაურში მდებარეობს და დამსვენებლებს უნიკალური კონცეფციის მქონე ქვევრის ფორმის ნომრებს სთავაზობს, მთავარი მიზანი კი ღვინისა და ქართული კულტურის პოპულარიზაციაა. ამ ეტაპზე სასტუმრო დამსვენებელს სამ ჰექტარ მიწის ფართობზე განთავსებულ 20 ქვევრ-ნომერს სთავაზობს, გარდა ამისა, ტერიტორიაზე განთავსებულია 3-სართულიანი სასტუმრო 17 ნომრით, რესტორნითა და ბარით.
„ესკიზი“
სასტუმრო „ესკიზი“ არის ახალი თაობის ბუტიკ-კონცეპტუალური ქართული სასტუმრო და ღვინის მარანი, რომელიც მდებარეობს ისტორიულ ქალაქ თელავის (კახეთში ცნობილი ქართული ღვინის დასახლების) შუაგულში. 10 წუთის სავალზე ქალაქის ცენტრიდან.
სასტუმრო „ესკიზის“ ოთახებიდან იშლება პანორამული ხედები ალაზნის ველსა და კავკასიონის მთებზე, ზოგიერთი მათგანი კი აუზისა და ბაღის ულამაზესი ხედებით არის გამორჩეული. თითოეული ოთახის დიზაინი უნიკალური და შთამბეჭდავია, პატარა დეტალებშიც კი იგრძნობა თანამედროვე და ტრადიციული ქართული კულტურის ელემენტები.
Legends Tskaltubo Spa Resort
სამკურნალო კურორტი წყალტუბო ცნობილია თბილი მინერალური რადონის წყლებით. ჯერ კიდევ 40-ანი წლებიდან ეს კურორტი განთქმული იყო საბჭოთა კავშირში უნიკალური თვისებების მქონე წყლებით, რომლებიც მთელ რიგ დაავადებებს კურნავს.
Golden Tulip Borjomi
Golden Tulip Borjomi კიდევ ერთი გამორჩეული დიზაინის სასტუმროა. 1892 წელს აშენებული შენობის რესტავრაცია ისე მოხდა, რომ მოხერხდა მისი ისტორიული და კულტურული ღირებულებების შენარჩუნება. სასტუმრო Golden Tulip Borjomi გაიხსნა უნიკალურ კულტურული ძეგლის შენობაში, რომელიც 1892 წელს ბორჯომში ირანის კონსულისთვის იყო აშენებული.
საოჯახო სასტუმრო „მხატვრის სახლი“
საოჯახო სასტუმრო „მხატვრის სახლი“ მდებარეობს რაჭაში, ონის ცენტრში, ტყის პირას, წყნარ და მყუდრო ადგილას. საოჯახო სასტუმრო ასევე გამოირჩევა ინტერიერით, რომელიც გაფორმებულია ქართული ტრადიციული ავეჯითა და დიასახლისის მიერ შესრულებული ფერწერული ნამუშევრებით, რაც მყუდრო და თბილ გარემოს ქმნის სტუმრებისთვის.
ასევე შეგიძლიათ ისარგებლოთ ბიბლიოთეკით, დაათვალიეროთ გალერეა, ქვების კოლექცია, დატკბეთ შოდა-კედელას ქედის ლამაზი ხედებით. სასტუმროს აქვს მარანი ქვევრებით, დიდი ბაღი უამრავი ხეხილით, ყვავილებითა და მოსასვენებელი ადგილებით თქვენი მაქსიმალური დასვენებისთვის.
Glarros OldTown
თბილისის ისტორიულ ნაწილში, ქალაქის ცენტრში მდებარე სასტუმრო Glarros OldTown-ის დიზაინის კონცეფცია ასახავს უნიკალური არქიტექტურული მემკვიდრეობისა და თანამედროვეობის ნაზავს. სპირალური კიბე, რომელიც შეიძლება მოიძებნოს კალაუბნის ყველა ეზოში და უწყვეტი მოზაიკა, რომელიც გადაჭიმულია დერეფნებში, სასტუმროს დიზაინის კონცეფციის დამახასიათებელი დეტალებია. საგულდაგულოდ შერჩეული ფერთა სქემები ქმნის მყუდრო და მშვიდ ატმოსფეროს, რომელიც დაგეხმარებათ დატვირთული დღის შემდეგ ქალაქიდან გაუსვლელად დაისვენოთ.
