ზაფხული ის სეზონია, როდესაც ვიწყებთ ფიქრს, თუ სად გავატაროთ ჩვენი კუთვნილი შვებულება. ეს ხომ ცხოვრების ის პერიოდია, რომელიც ახალ ისტორიებთან, მოგონებებთან, განტვირთვასთან და ადამიანების გაცნობასთან ასოცირდება. ერთი შეხედვით, თითქოს მარტივია, მაგრამ რეალურად, მისი დაგეგმვა საკმაოდ რთული და საპასუხისმგებლო პროცესია. სწორედ ამიტომ, ჟურნალი OK! გთავაზობთ რამდენიმე რჩევას, რათა ეს პროცესი მართლაც დაუვიწყარი იყოს და მთელი ცხოვრება გაგყვეთ განცდილი ემოციები.
- უპირველესად, შეარჩიეთ ადგილი, რომლის მონახულებასაც აპირებთ. მოიძიეთ ყველანაირი სახის ინფორმაცია ისტორიაზე, კულტურაზე, გასართობ ადგილებზე. წინასწარ გადაწყვიტეთ, ექსკურსია გსურთ, ინდივიდუალური ტური, ლაშქრობა, ბანაკი თუ სხვ. ყოველივე ეს დაგეხმარებათ დროის სწორად განაწილებასა და განსაზღვრაში.
- კიდევ ერთი უმნიშვნელოვანესი ფაქტორი ფინანსების სწორად განაწილებაა. აუცილებლად გათვალეთ თქვენი ბიუჯეტი, გადახედეთ ფასებს და შეადარეთ თქვენ მიერ განსაზღვრულ თანხას.
- შეიძინეთ სამგზავრო ბილეთები და დაჯავშნეთ საცხოვრებელი ადგილი. განსაზღვრეთ, სად გსურთ ამ პერიოდის გატარება – ქალაქის ცენტრში, გარეუბანში, მთებთან ახლოს თუ ზღვისპირას.
- აუცილებლად გადაამოწმეთ, როგორი ამინდის პროგნოზია გამოცხადებული დასვენებისთვის განკუთვნილი დღეების განმავლობაში, რათა ამინდის მოულოდნელმა ცვლილებამ არ შეცვალოს თქვენი გეგმები.
- ერთ-ერთი ყველაზე მნიშვნელოვანი პროცესი ბარგის ჩალაგებაა. შეარჩიეთ ადგილის, სეზონისა და ამინდის შესაბამისი ტანისამოსი.
- და რა თქმა უნდა, გადაიღეთ რაც შეიძლება ბევრი ფოტო, რათა ამა თუ იმ ადგილას განცდილი ემოციები მაქსიმალურად დიდხანს გაგყვეთ. შეიქმენით მოგონება, რომელიც მთელი ცხოვრების განმავლობაში გაგახსენებთ ამ დაუვიწყარ წუთებს.
