„მე შევქმენი ინტერნეტში ყალბი პროფილი და ადამიანებს ვამწარებდი“
„მე მინდოდა თავი მომეკლა და ცხოვრება დამესრულებინა“
„მე შვილი ვცემე“
„მე ველოსიპედით მომაკვდავ მტრედს გადავუარე“
„პლაჟზე ვმასტურბირებდი“
ასეთ აღსარებებს ცოდვების ონლაინ-მონანიების საიტებზე შეხვდებით. ცოდვების მონანიება თანამედროვე სამყაროში პოპულარობას კარგავს. არავის სურს, საკუთარი ცოდვების მოყოლისას მუხლები უკანკალებდეს. ავსტრიელი კათოლიკე მღვდელი ქრისტიან ზიბერერი ამბობს, რომ მონანიება ევროპაში არასოდეს ყოფილა ისეთი მასშტაბური, როგორიც დღესაა, რადგან ადამიანები თავიანთ ცოდვებს გაჯეტებთან გაცილებით მარტივად ყვებიან. სტატისტიკაც იგივეს ამბობს: ცოდვების მომნანიებელთა რიცხვი ვებგვერდებზე ყოველდღიურად 300-ს აღემატება.
ცოდვების მონანიების ონლაინპლატფორმებზე შესაძლებელია ელექტრონული სანთლების დანთებაც. ინანიებ ცოდვებს, ანთებ ელექტრონულ სანთლებს, უსმენ საეკლესიო მუსიკას და კითხულობ ონლაინ-ლოცვებს. ეკლესია გვხვდება იქ, სადაც ჩვენი გაჯეტებია.
ცალკეული ონლაინპლატფორმები ცოდვების დახარისხებასა და მათ შეფასებასაც გვთავაზობს. ცოდვების სიმძაფრე 5 კატეგორიად იყოფა – ყველაზე სერიოზულიდან ნაკლებ სერიოზულამდე. მრევლი კი ცოდვის სიმძიმეს თვითონ აფასებს.
ტექნოლოგიებმა რელიგიის მიმართ ადამიანების დამოკიდებულება მკვეთრად შეცვალეს. განვითარდა ელექტრონული საეკლესიო პროდუქტებიც. ვატიკანი მრევლს 110 დოლარად ელექტრონულ კრიალოსანს სთავაზობს. მოწყობილობა 10 შავი მძივისგან შედგება და მასზე მიმაგრებულია „ჭკვიანი ჯვარი“, რომელიც მონაცემებს აერთიანებს. მოწყობილობა მრავალფუნქციურია და ლოცვების ისტორიასაც ინახავს.
ფეისბუქზე ძალიან პოპულარული გახდა ქართველი სასულიერო პირების გვერდები. ყველაზე მეტი პოპულარობით მამა თეოდორე გიგნაძე სარგებლობს. მას 190 000-ზე მეტი მოწონება აქვს. ასევე ძალიან პოპულარულია მამა პეტრე, რომელსაც დღეისათვის 60 000-ზე მეტი ლაიქი აქვს. მისი პოსტები ძირითადად საკუთარი ფოტოების გაზიარებას, სხვადასხვა დროის ციტატებსა და ცნობილ ადამიანებთან გადაღებულ ფოტოებს ეძღვნება. ცალკეულ პოსტებს 1000-ზე მეტი გაზიარება აქვს. მართლმადიდებელი მრევლისთვის უკვე ჩვეულია ონლაინკურთხევის მოპოვებაც.
თუ როდის გაჩნდება მართლმადიდებელ ეკლესიაში ცოდვების მონანიება ონლაინ, რთული სათქმელია. ფაქტია, ადამიანები ყოველდღიურად უფრო ტექნოლოგიური ხდებიან და ტექნოლოგიები ჩვენი ცხოვრების განუყოფელი ნაწილია.
