ბრიტანელი მხატვარი ნილ ჰარბისონი აქრომატოფსიით, ანუ დალტონიზმით დაიბადა. უკვე რამდენიმე წელია ჰარბისონს შეუძლია ულტრაიისფერი სხივების „დანახვა“. მის თავში ჩადგმული ანტენის მსგავსი სენსორი გარდაქმნის სხვადასხვა ტალღის სიგრძეს თავის ქალაზე ვიბრაციად, რომელსაც შემდეგ ის აღიქვამს როგორც ხმას. მართალია ჰარბისონი ნივთებს ნაცრისფერში ხედავს, მაგრამ ის მას „ესმის“ ნათელ ფერებში.
„მინდოდა სხვანაირი ადამიანი ვყოფილიყავი. კიბორგად გახდომა არ არის მხოლოდ ცხოვრებისეული გადაწყვეტილება, ეს მხატვრული განცხადებაა − მე საკუთარ სხეულსა და ტვინს ვექცევი, როგორც სკულპტურას“, − განმარტა მხატვარმა.
თავდაპირველად, სენსორი შეიქმნა, რათა დახმარებოდა მას დალტონიზმის იშვიათი ფორმის წინააღმდეგ ბრძოლაში, რომელიც 33 000-იდან ერთ ადამიანს აწუხებს და ნიშნავს, რომ ის სამყაროს ნაცრისფერში ხედავს.
„უკვე 10 წელია კიბორგი ვარ. არ ვგრძნობ, რომ ტექნოლოგიებს ვიყენებ ან ტექნოლოგიებს ვატარებ. ვგრძნობ, რომ ტექნოლოგია ვარ. მე არ ვფიქრობ ჩემს ანტენაზე, როგორც მოწყობილობაზე − ეს არის სხეულის ნაწილი, მას ვატარებ საწოლსა და საშხაპეში“, − აღნიშნავს ჰარბისონი.
ასევე, ანტენა მას საშუალებას აძლევს აღიქვას ფერები ადამიანის ნორმალური სპექტრის მიღმა: მას შეუძლია გაარჩიოს ინფრაწითელი და ულტრაიისფერი. მისი ანტენა დაკავშირებულია ჩიპთან, რომელიც ფერს ბგერად გარდაქმნის. როგორც ის აღნიშნავს, მას შეუძლია სურათების „მოსმენა“ და ბგერების დახატვა.
„ის ცნობს სინათლის ელფერს და გარდაქმნის მას სიხშირეზე, რომელიც მესმის, როგორც ნოტი. ჩემთვის წითელი არ არის ვნების ფერი, როგორც ეს არის მრავალი ადამიანისთვის. ტელეფონის ზარი მწვანედ ჟღერს, ხოლო ემი უაინჰაუსის მუსიკა წითელი და ვარდისფერია“, − ამბობს მხატვარი კიბორგი.
ჰარბისონი ასევე აკეთებს საპირისპიროს − ადამიანების ხმებისგან ქმნის ნახატებს.
„მე დავხატე ჰიტლერისა და მარტინ ლუთერ კინგის გამოსვლა, მათი ხმები ფერებად ვთარგმნე. შემდეგ ვთხოვე ხალხს გამოეცნოთ რომელი მათგანი რომელი იყო“.
ჰარბისონს სურს, ის განიხილებოდეს როგორც კიბორგი. მას მოუწია ბრძოლა დიდი ბრიტანეთის საპასპორტო განყოფილებასთან, რომელიც თავიდან ეწინააღმდეგებოდა მის მიზანს, ჰქონოდა პასპორტის სურათი ანტენით. ჰარბისონი ამტკიცებდა, რომ ეს არ იყო ტექნოლოგიის ნაწილი, არამედ მისი სხეულის ნაწილი გახლდათ, და საბოლოოდ მათ დათმეს პირველი კიბორგის უფლებების სასარგებლოდ. ბრიტანელი ნილ ჰარბისონი ოფიციალურად მსოფლიოში პირველი ადამიანი-კიბორგია.
