ბინის შეძენა ის ერთ-ერთი ყველაზე მთავარი მოვლენაა, რომლის არასწორად გადაჭრა ადამიანის მთელ ცხოვრებას თავდაყირა დააყენებს. ამიტომ, სანამ ამ ნაბიჯს გადავდგამთ, აუცილებლად უნდა გავითვალისწინოთ არაერთი მნიშვნელოვანი საკითხი.
შავი, თეთრი თუ მწვანე კარკასი? მსგავსი შეთავაზება თუ ტერმინი ძალიან ხშირად გვხვდება სამშენებლო კომპანიების სარეკლამო კამპანიების დროს. ყოველდღიურობაში ეს სიტყვები თითქოს უკვე ნაცნობი და გასაგებია, რის გამო მყიდველები ხშირად ზედმეტი კონკრეტიკისგან თავს იკავებენ და შემდგომ მნიშვნელოვან პრობლემებს აწყდებიან.
სწორედ ამიტომ, Decor Book-ი გთავაზობთ თითოეული კარკასის მიახლოებით განხილვას, რათა დაგეხმაროთ თქვენთვის უფრო მისაღები და სასურველი გადაწყვეტილების მიღებაში.
ახლა კი უფრო დეტალურად თითოეულ დონეზე:
შავი კარკასი
შავი კარკასის შემთხვევაში, საცხოვრებელ ბინაში დაგხვდებათ მხოლოდ გარე პერიმეტრზე ამოყვანილი კედლები შიდა ტიხრებისა და შელესვის გარეშე. დამონტაჟებული იქნება შესასვლელი ცენტრალური კარი და გარე პერიმეტრზე არსებული ფანჯრები/ვიტრაჟები. მოწყობილი და დასრულებულია აივნები, არსებობის შემთხვევაში. ელექტროგაყვანილობა მიყვანილია შესასვლელ კარამდე. ელექტრო და სუსტი დენის სადენები (ტელევიზია, ინტერნეტი) მიყვანილია შესასვლელ კარამდე. არ არის დაპროექტებული ელექტროსამუშაოები და შესაბამისად, განსაზღვრული ადგილები როზეტებისა და ჩამრთველებისთვის. ასევე არ არის მოწყობილი იატაკის მოჭიმვა. წყლისა და კანალიზაციის წერტილები, როგორც წესი, მიყვანილია ერთ ან რამდენიმე ადგილას, სადაც განლაგებული უნდა იყოს სანიტარული კვანძები.
აღნიშნული ჩამონათვალით ნათელია, რომ შავი კარკასის შეძენა ნიშნავს, გააკეთოთ არქიტექტურულ-მოსაპირკეთებელი სამუშაოები სრულად. თუმცა უნდა აღინიშნოს, რომ არსებობს მომხმარებელი, ვინც ასეთი მოცემულობით დაინტერესებულია.
თეთრი კარკასი
შავი კარკასის სამუშაოებზე დამატებით, თეთრი კარკასი მოიცავს მყიდველის მოთხოვნის შესაბამისად შიდა ტიხრების მოწყობას და გარე პერიმეტრისა და შიდა ტიხრების შელესვას. იატაკი მოჭიმულია, ელექტროგაყვანილობა დამონტაჟებულია, განსაზღვრულია ადგილები როზეტებისა და ჩამრთველებისთვის. სამზარეულოსა და აბაზანა-ტუალეტში შეყვანილია წყლისა და კანალიზაციის მილები. ამ დონეზე, საცხოვრებელი ბინა მზადაა მოსაპირკეთებელი სამუშაოებისათვის (კედლების შეღებვა, ფილებისა და ლამინატის დაგება და ა.შ.). რაც შეეხება გათბობის სისტემას, ბევრი სამშენებლო კომპანია თეთრ კარკასში მოიაზრებს ცენტრალური გათბობის მილების მოწყობას, ასევე ინტერნეტი-ტელევიზიის კაბელების მოწყობას. აღნიშნული დამოკიდებულია ხელშეკრულების პირობებზე. თეთრი კარკასის პირობით ბინის შეძენისას დაზოგავთ დროს და ენერგიას შავი სამუშაოების განხორციელებაზე.
მწვანე კარკასი
შეკითხვაზე, თუ რას ნიშნავს მწვანე კარკასი, ცალსახა პასუხი არ არსებობს. თითოეული სამშენებლო-დეველოპერული კომპანია თავად განსაზღვრავს და ადგენს მწვანე კარკასის პირობებს. საცხოვრებელი ბინის მწვანე კარკასის პირობით მოწყობა დამატებით შეიძლება მოიცავდეს ენერგოეფექტური და ეკოლოგიურად სუფთა სამშენებლო და მოსაპირკეთებელი მასალებით მოწყობას და გათბობა-გაგრილების შიდა და გარე აგრეგატების/სისტემების დამონტაჟებას მყიდველთან შეთანხმებული პირობების შესაბამისად.
სწორედ ამიტომ, ბუნდოვანების თავიდან ასაცილებლად უმჯობესია პოტენციურმა მყიდველმა ბინის შეძენამდე დეველოპერთან ან მშენებელთან დააზუსტოს, თუ რას მოიცავს შეთავაზებული ჩაბარების პირობა.
