1951 წელს მემები რომ ყოფილიყო, ეს ფოტო რამდენიმე საათში ვირუსულად გავრცელდებოდა. მასზე ფარდობითობის თეორიის შემქმნელი ჭაღარა ბრძენის ნაცვლად, ცელქი მოხუცი მოჩანს, რომელიც მსოფლიოს ენას უყოფს. როგორ მოხდა, რომ უდიდესმა მეცნიერმა ასეთი ფოტო გადაიღო?
1951 წლის 14 მარტს აინშტაინი 72 წლის გახდა. ამ დღის აღსანიშნავად, ფიზიკოსის კოლეგებმა და მეგობრებმა პრინსტონის უნივერსიტეტში ზეიმი მოაწყვეს. ოფიციალური ცერემონიის შემდეგ, დაღლილი აინშტაინი მეუღლესთან და მეგობართან ერთად მანქანაში ჩაჯდა, რომ სახლში დაბრუნებულიყო, თუმცა ფოტოგრაფები მანქანას წინ გადაუდგნენ.
„დაბადების დღის ტორტი და საზეიმო გამოსვლები უკვე ყველამ გადაიღო. აინშტაინი დაღლილი და დატანჯული ჩანდა და სწორედ იმ დროს, როდესაც მანქანა დაიძრა, ვიღაცამ იყვირა: „ჰეი, პროფესორო, დაბადების დღის აღსანიშნავად, გაიღიმეთ!“ – იხსენებს United Press-ის ფოტოჟურნალისტი, არტურ სასი.
არტურ სასი
სწორედ მაშინ დიდმა ფიზიკოსმა, რომელიც თავისი უზარმაზარი მოთმინებით იყო ცნობილი, თავის შეკავება ვეღარ შეძლო. მან გაღიმების ნაცვლად, ფოტოაპარატს ენა გამოუყო და მაშინვე წავიდა. ეს ჟესტი მხოლოდ რამდენიმე წამს გაგრძელდა, მაგრამ სასმა ერთი კადრის გადაღება მაინც მოასწრო.
თავიდან რედაქტორებმა „შეუსაბამო ფოტოს“ მიღებაზე უარი თქვეს, მაგრამ სასმა რამდენიმე სხვა გამოცემას გაუგზავნა. ასე დაიწყო ფოტოს ნელი, მაგრამ სტაბილური სვლა დიდებისკენ. თავად აინშტაინი, ფოტოს დანახვამ აღაფრთოვანა. მან გაზეთის ცხრა ეგზემპლარი შეუკვეთა და ერთი ჟურნალისტ ჰოვარდ სმიტსაც გაუგზავნა წარწერით: „ეს ჟესტი მოგეწონებათ, რადგან მთელი კაცობრიობისადმია მიმართული“.
ვარაუდობენ, რომ ამ ჟესტით მეცნიერს სურდა ეთქვა, რომ სავარძელში მჯდომი გენიოსის იმიჯით დაიღალა. მთელი ცხოვრების მანძილზე ის მეცნიერებაში, პოლიტიკასა და სოციალურ საკითხებში საყოველთაოდ მიღებულ ნორმებს ებრძოდა და ეს ჟესტი შეხსენება იყო, რომ რთული თეორიების უკან იუმორის გრძნობის მქონე, ცოცხალი ადამიანი იმალება.
ბედის ირონიაა – „ნამდვილი აინშტაინის“ გადაღება ასობით ფოტოგრაფმა სცადა, მაგრამ მხოლოდ ერთმა მოახერხა და დაიჭირა წამი, როდესაც მეცნიერმა ყველა ნიღაბი მოიხსნა და გარშემო ატეხილი აჟიოტაჟის მიმართ თავისი ნამდვილი დამოკიდებულება გამოავლინა.
2009 წელს, აინშტაინის ფოტოს ორიგონალური კადრი აშშ-ის აუქციონზე 74,325 დოლარად გაიყიდა. ლეგენდარული ფოტოს მფლობელი იშვიათი სამეცნიერო წიგნებისა და ხელნაწერების ექსპერტი დევიდ ვაქსმანი გახდა.
ასევე დაგაინტერესებთ
