ევროპული ინვესტიციებით შექმნილი დასავლური სტანდარტის სადაზღვევო კომპანიის, „პრაიმის“ თელავის სერვისცენტრი 5 წელია, რაც რეგიონში ოპერირებს. ამდენივე წელია, რაც ეკატერინე მგელაძე აღნიშნული სერვისცენტრის ხელმძღვანელია. როგორც ეკა იხსენებს, თბილისიდან თელავში 6 წლის წინ გადმოვიდა საცხოვრებლად. თავდაპირველად გაუჭირდა უცხო გარემოსთან ადაპტაცია.
„პრაიმმა მთავარი როლი ითამაშა ჩემს ცხოვრებაში და დღეს თამამად შემიძლია ვთქვა, რომ ეს გარემო ნამდვილად ჩემია“.
ეკას თქმით, მის საქმიანობას მის ცხოვრებაში დიდი ადგილი უჭირავს. წლების განმავლობაში დაგროვილმა გამოცდილებამ თავდაჯერებულობა შემატა, რაც დამეთანხმებით, ალბათ, რომ მენეჯერისთვის მნიშვნელოვანია.
„სადაზღვევო სფერო საკმაოდ მრავალფეროვანი და საინტერესოა. სამუშაო სპეციფიკიდან გამომდინარე, გვიწევს კომუნიკაცია უამრავ ადამიანთან, გვაქვს სხვადასხვა სახის შეხვედრები და პრეზენტაციები. გარდა ამისა, ვცდილობ ყოველდღიურად განვვითარდე და არ ჩამოვრჩე სიახლეებს, ასევე ბევრს ვმუშაობ გუნდის განვითარებაზეც“. – ამბობს ეკა.
აღსანიშნავია, რომ „პრაიმის“ გუნდი დაკომპლექტებულია პროფესიონალი და შრომისმოყვარე ადამიანებით, რომლებიც ფოკუსირებულნი არიან განვითარებასა და მომხმარებლისთვის მაღალი ხარისხის სერვისების შეთავაზებაზე. „კახეთის ყველა რეგიონში (ახმეტა, ყვარელი, გურჯაანის რაიონი, ლაგოდეხი) და მის სოფლებში გვყავს წარმომადგენლები – გარე აგენტები, რომლებიც ოფისის გარეთ დაუღალავად გვიმაგრებენ ზურგს“.
„ჩვენ ვმუშაობთ თითქმის ყველა სადაზღვევო პროდუქტზე, ეს იქნება აგრო, ავტომობილის, ქონების,სამოგზაურო თუ პასუხისმგებლობის დაზღვევა. აღსანიშნავია, რომ „პრაიმი“ ხშირად სთავაზობს მომხმარებლებს სხვადასხვა სახის აქციებს, საჩუქრებსა და ფასდაკლებებს. დიდ კონკურენციას ვუწევთ სხვა სადაზღვევო კომპანიებს რეგიონში – ფასებისა და სერვისმომსახურების მხრივ. მით უმეტეს, მოგეხსენებათ, თუ როგორი დიდი კონკურენციაა სადაზღვევო ბაზარზე, თითქმის ყველა კომპანიას ჰყავს წარმომადგენლობა კახეთში“.
როგორც ეკა აღნიშნავს, რეგიონის სპეციფიკიდან გამომდინარე, კომპანიისთვის პრიორიტეტული აგროდაზღვევაა, რომელიც მათ ერთ-ერთ უპირატესობას წარმოადგენს, რაც გულისხმობს – აგროზარალის დადგომის დროს ფერმერის მიერ შემოსულ ზარზე მყისიერ რეაგირებას და ზარალის ობიექტურად შეფასებას. მნიშვნელოვანია ისიც, რომ „პრაიმის“ მიერ მოწვეული პროფესიონალი და მაღალკვალიფიციური ექსპერტები ზარალს ობიექტურად აფასებენ.
აგროდაზღვევა იძლევა საშუალებას, დააზღვიოთ სასოფლო-სამეურნეო კულტურების მოსავალი ბუნებრივი მოვლენებით გამოწვეული ზარალისგან. ასევე შესაძლებელია დააზღვიოთ თქვენი მოსავალი როგორც სახელმწიფო აგროდაზღვევის პროგრამით, ასევე ინდივიდუალურად.
თუ ფლობთ ან ამუშავებთ რეგისტრირებულ მიწის ნაკვეთს და ხართ აღრიცხული ფერმერთა რეესტრში, შეგიძლიათ დააზღვიოთ 5 ჰექტარამდე ფართობი სახელმწიფო სუბსიდირების ფარგლებში.
„სამომავლოდ ვგეგმავთ გაფართოებას, ახალი კადრების აყვანასა და გადამზადებას. ასევე ახლახან ჩავუშვით ახალი აგროპროდუქტი, კერძოდ, – მსხვილფეხა რქოსანი პირუტყვის დაზღვევა. ჩვენ უკვე მთელი კახეთის მასშტაბით ვაწარმოებთ შეხვედრებს ფერმერებთან. ვატარებთ პრეზენტაციებს და მინდა გითხრათ, რომ „პრაიმის“ ამ ახალმა პროდუქტმა დიდი ინტერესი გამოიწვია საზოგადოებაში“.
ტექსტი: სოფიო მალანია
ფოტო: ალექსეი სეროვი
