21-ე საუკუნეში კანის მოვლის საშუალებების რაოდენობასთან ერთად იმატა შეკითხვებმაც, რომელთაც ყველაზე ხშირად ვუსვამთ სპეციალისტებს. OK! გთავაზობთ 9 მითსა და მის შესაბამის რეალობას იმისთვის, რომ დაირღვეს საზოგადოებაში არსებული არასწორი წარმოდგენები.
მითი 1:
ყველა პროდუქციის 60%, რომელსაც კანისთვის მოვიხმართ, ხვდება სისხლის მიმოქცევაში.
რეალობა ისაა, რომ ზუსტი პროცენტული მაჩვენებლის დასახელება შეუძლებელია, ვინაიდან კოსმეტიკური პროდუქტის თქვენს კანში შეღწევა დამოკიდებულია ინგრედიენტზე, კანის მდგომარეობაზე, გარემოზე (მაგ. ტემპერატურაზე, ტენიანობაზე) და მისი რაოდენობა მერყეობს 0%-დან 100%-მდე.
მითი 2:
26 წამია საჭირო კოსმეტიკური ინგრედიენტის სისხლში შესაღწევად.
პირველი მითიდან გამომდინარე, შეუძლებელია განსაზღვრო დრო, თუ რამდენი ხანი შეიძლება დასჭირდეს პროდუქტს სისხლში შესაღწევად, მით უმეტეს მაშინ, როდესაც მას ყოველივე ამის უნარი არ გააჩნია. ზოგიერთი ინგრედიენტი სწრაფად აღწევს სისხლში, სხვები კი გროვდება კანში და გამოყოფას რამდენიმე დღეს ანდომებს. ეს პროცესი დამოკიდებულია ინგრედიენტის მოლეკულების მოცულობაზე და იმაზეც, თუ სხეულის რა ადგილზე დაიტანეთ კოსმეტიკას.
მითი 3:
საშუალოდ, ქალის სხეულში ყოველწლიურად ერთი და იგივე რაოდენობის ქიმიური ნივთიერებები ხვდება.
რეალობა გახლავთ ის, რომ სინამდვილეში ზუსტი რაოდენობის დადგენა შეუძლებელია. თუმცა თუ თქვენ გსურთ საკუთარ ორგანიზმში შემავალი ქიმიური ნივთიერებების რაოდენობის გაგება, მოგიწევთ კლინიკური კვლევების ჩატარება. აღსანიშნავია, რომ ეს მითი არ ემყარება არცერთ გამოქვეყნებულ სამეცნიერო კვლევას.
მითი 4:
მინერალური ზეთი აფერხებს კანის „სუნთქვას“.
მინერალური ზეთი შეიცავს დიდ მოლეკულებს, რომლებიც თავს იყრის თქვენი კანის გარე ფენის ზედა ნაწილზე (ეპიდერმისის რქოვანაზე) და ქმნის ოკლუზიურ ფენას, თუმცა ყველა ზეთი მაინც არ აფერხებს კანის „სუნთქვის“ პროცესს, ვინაიდან მცენარეული ზეთები შემადგენლობით ჰგავს თქვენს კანზე არსებულ ლიპიდებს (ზეთებს), ამიტომ ორგანიზმში უფრო ადვილად მეტაბოლიზირდებიან. აღსანიშნავია ისიც, რომ ზეთები შეიცავს უამრავ მშვენიერ მცენარეულ ნაერთს, რომელიც შესაძლოა სასარგებლოც კი იყოს თქვენი კანისთვის.
მითი 5:
ყველა კონსერვანტი საშიშია.
ცნობილია, რომ კონსერვანტების ნაწილი აღიზიანებს ზოგიერთი ტიპის კანს. თუმცა გახსოვდეთ, რომ კონსერვანტები ამავდროულად ემსახურება ძალიან მნიშვნელოვან მიზანს − აჩერებს ბაქტერიებისა და სოკოების რაოდენობის ზრდას თქვენს კოსმეტიკაში. საბედნიეროდ, ბაზარზე მუდმივად შემოდის უამრავი ბუნებრივი კონსერვანტი, რომელიც შეიძლება გამოყენებულ იქნას თქვენი კანის უსაფრთხოებისთვის.
მითი 6:
თუ კანის მოვლისას მოვერიდებით ხელოვნური ნივთიერების გამოყენებას, მათ სამუდამოდ ავირიდებთ თავიდან.
კანის მოვლის ინდუსტრიაში მრავალი ისეთი კონსერვანტი გამოიყენება, რომელსაც საკვებშიც ხშირად ვხვდებით. მაგალითად, შეგიძლიათ მოარიდოთ თქვენი კანი პარაბენებს, თუმცა ეს არ ნიშნავს იმას, რომ თქვენ მათ არ მიიღებთ საკვების სახით. 2013 წელს ჩატარებულმა კვლევამ აჩვენა, რომ ნიუ იორკის (აშშ) სავაჭრო ქსელში არსებული საკვებისა და სასმლის 90% შეიცავდა პარაბენებს. ამდენად, თუ ნამდვილად გსურთ თავიდან აიცილოთ სინთეზური კონსერვანტები, კარგად შეამოწმეთ საკვების შეფუთვაზე დატანილი ეტიკეტიც.
მითი 7:
ევროკავშირმა აკრძალა 1000-ზე მეტი კოსმეტიკური ინგრედიენტი, ხოლო აშშ-მ (FDA) მხოლოდ 9.
ეს მოსაზრება მთლიანად რეალობას მოკლებული არ გახლავთ. ევროკავშირის კოსმეტიკის რეგულაციების სია შეიცავს 1400-მდე ინგრედიენტს, რომელთა გამოყენება კოსმეტიკაში აკრძალულია, რადგან ამ ინგრედიენტებიდან ბევრი ძალიან საეჭვოა.
ისინი შეიცავს:
- რადიოაქტიურ ნივთიერებებს
- ვაქცინებს
- ადამიანური წარმოშობის უჯრედებს/ქსოვილებს
- აზბესტს
ასე რომ, მნიშვნელოვანია გვესმოდეს − რიცხვები აქ სრულ რეალობას არ ასახავს, მთავარი არის მიზეზი.
მითი 8:
კანის ბუნებრივი მოვლა შესაძლებელია ქიმიკატების გარეშე.
თუ დავფიქრდებით, მივხვდებით, რომ ყველაფერი თქვენ გარშემო ქიმიურია. მაგალითად, ჰაერი და წყალი ქიმიური ნივთიერებებია, ისევე, როგორც საკვები, რომელსაც მიირთმევთ. რასაკვირველია, როდესაც ადამიანები ამბობენ, რომ მათი კანის მოვლის საშუალება ქიმიური დანამატებისგან თავისუფალია, გულისხმობენ იმას, რომ ის არ შეიცავს სინთეტიკურ ინგრედიენტებს, თუმცა ეს საკითხიც სადავოა იმის ფონზე, რომ შესაძლოა წყალიც კი შეიცავდეს ტოქსინებს. ამდენად, არ დაგავიწყდეთ, რომ ნატურალური ყოველთვის არ ნიშნავს უსაფრთხოს − არსებობს უამრავი საშიში ბუნებრივი ინგრედიენტი, რომელსაც უნდა მოერიდოთ კანის მოვლისას.
მითი 9:
საზოგადოებაში ყველაზე მიღებული კანის მოვლის საშუალებები სავსეა ხელოვნური ქიმიკატებით.
ბევრი სინთეზური ინგრედიენტი შედის კანის მოვლის სხვადასხვა საშუალების შემადგენლობაში, მაგრამ ფაქტია, რომ მათი უმეტესი ნაწილი წყალია − ლოსიონების, კრემების, შამპუნების, კონდიციონერების, გამწმენდების, ტონერებისა და ა.შ. უმეტესობა შეიცავს გამოხდილ წყალს, რომელიც იაფია, მარტივია და დიდი წვლილიც არ შეაქვს თქვენი კანის მოვლის საქმეში, გარდა მცირედი დატენიანებისა. ეს კი თავის მხრივ ხდება იმის ინსპირაცია, რომ გამოვიყენოთ უფრო მეტი უნიკალური ბუნებრივი ინგრედიენტით შექმნილი ნიშური პროდუქტები, რაც განსხვავდება მასიური წარმოების კანის მოვლის საშუალებებისგან.
