ჯგუფ One Direction-ის ყოფილი წევრის, მომღერალი ლიამ პეინის ტრაგიკულად გარდაცვალების შემდეგ ახალი დეტალები გახდა ცნობილი. როგორც არგენტინის პროკურატურამ განაცხადა, პეინი შესაძლოა “ნახევრად გონზე” ან სრულიად უგონო მდგომარეობაში იყო, როდესაც სასტუმროს მესამე სართულის აივნიდან გადმოვარდა.
გამოქვეყნდა ლიამ პეინის ძვირადღირებული ლუქსის რამდენიმე ფოტო, სადაც აღბეჭდილია დამტვრეული ტელევიზორი, თუნუქის ფოლგა და თეთრი ფხვნილი. ფოტოებზე ასევე ჩანს ხის მაგიდის დამწვარი ზედაპირი.
დეტექტივები ადასტურებენ, რომ სასტუმროს ნომრიდან ამოღბულია ნივთიერებები, რაც მიუთითებს, რომ ლიამ პეინი ალკოჰოლის და ნარკოტიკების ზემოქმედების ქვეშ იყო. ასევე ცნობილია, რომ პოპვარსკვლავი გარდაცვალებამდე სასტუმრო ოთახში მარტო იმყოფებოდა.
პროკურატურამ სასტუმროს პერსონალის მიერ 911-ში შესული ზარის შინაარსი გაავრცელა, სადაც თანამშრომელი იტყობინებოდა “აგრესიული მამაკაცის შესახებ, რომელიც “ამტვრევდა თავის ოთახს” და ნარკოტიკების ან ალკოჰოლის ზემოქმედების ქვეშ შეიძლება ყოფილიყო”.
ასევე ცნობილია, რომ პეინი მის შეყვარებულ ქეით კესიდისთან ერთად 30 სექტემბერს სამხრეთ ამერიკაში ჩავიდა, არგენტინაში დარჩა ორი კვირის განმავლობაში, მიუხედავად იმისა, რომ მხოლოდ ხუთი დღის გატარებას აპირებდა.
12 ოქტომბერს, პეინის შეყვარებული კესიდი ფლორიდაში დაბრუნდა, მიუხედავად იმისა, რომ პეინი კვლავ სასტუმროში რჩებოდა.
მის გარდაცვალებამდე სულ რაღაც 48 საათით ადრე, 14 ოქტომბერს, გაირკვა, რომ პეინის ყოფილმა საცოლემ, მაია ჰენრიმ, დაიწყო სასამართლო პროცესი პეინის წინააღმდეგ და ადანაშაულებდა მას აკვიატებულ კონტაქტში და მის წინააღმდეგ მისი თაყვანისმცემლების “იარაღად” გამოყენებაში.
ორი დღის შემდეგ, პეინმა გამოაქვეყნა რამდენიმე ვიდეო სოციალურ მედიაში, მათ შორის ერთ-ერთში, მან თავის შეყვარებულს სახლში წასვლის გამო ხუმრობით “დაკარგული” უწოდა. რამდენიმე საათის შემდეგ კი, სასტუმროში გამოიძახეს პოლიცია “აგრესიული მამაკაცის გამო, რომელიც შესაძლოა ნარკოტიკების ან ალკოჰოლის ზემოქმედების ქვეშ ყოფილიყო”.
ბენდის ინსტაგრამზე საერთო განცხადება გამოქვეყნდა, რომელსაც ხელს ჰარი სტაილსი, ლუი ტომლინსონი, ზეინ მალიკი და ნაიალ ჰორანი აწერენ. “განადგურებულები ვართ ლიამის გარდაცვალების გამო. ცოტა ხანში, როცა ყველას ექნება ამის შესაძლებლობა, მეტს ვიტყვით ამასთან დაკავშირებით, იქამდე კი ჩვენი ძმის დაკარგვას ვიგლოვებთ და გადავიაზრებთ, რომელიც ძალიან გვიყვარდა,” — ვკითხულობთ წერილში.
მოგვიანებით ბენდის წევრებმა საკუთარ გვერდებზეც გაავრცელეს განცხადებები. “ლიამი ღიად ცხოვრობდა და გულიც ღია ჰქონდა. მისი ცხოვრებისეული ენერგია ინფექციურად გადამდები იყო. ის თბილი, მხარდამჭერი და საოცრად მოსიყვარულე იყო. ერთად გატარებული წლები ჩემი ცხოვრების ყველაზე ძვირფას წლებად დარჩება. ყოველთვის მომენატრები, ჩემო საყვარელო მეგობარი,” — დაწერა ჰარი სტაილსმა.
ლიამ პეინთან გამოსამშვიდობებელი პოსტები დაწერეს ზეინ მალიკმა და ლუი ტომლინსონმაც. “შენი წასვლით ძმა დავკარგე. ვერ აგიხსნი, რას გავიღებდი, კიდევ ერთხელ რომ ჩაგხუტებოდი, დაგმშვიდობებოდი და მეთქვა, როგორ მიყვარხარ და როგორ პატივს გცემ,” — განაცხადა ზეინ მალიკმა.
ლუი ტომლინსონმაც პირდაპირ ლიამს მიმართა — “საოცრად იღბლიანი ვარ, რომ ჩემს ცხოვრებაში იყავი, მაგრამ ძალიან მიჭირს დამშვიდობების იდეასთან შეგუება. მადლიერი ვარ რომ ბენდის დაშლის შემდეგ კიდევ უფრო დავახლოვდით, ტელეფონზე საათობით ვსაუბრობდით, ვიხსენებდით ათასობით საოცარ მოგონებას — მეგონა, მთელი ცხოვრების განმავლობაში გვერდით მეყოლებოდი. ძალიან გამახარებდა შენთან სცენის კიდევ ერთხელ გაზიარება, თუმცა ეს ჩვენს ბედში არ ეწერა.
მინდა იცოდე, რომ თუ ბეარს (ლიამის შვილი) ოდესმე დავჭირდები, ის ბიძა ვიქნები, რომელიც ცხოვრებაში სჭირდება და მოვუყვები, თუ რამდენად საოცარი მამა ჰყავდა.”
რაც შეეხება ნაიალ ჰორანს, მისი განცხადებიდან ვიგებთ, რომ ის ლიამ პეინს გარდაცვალებამდე ცოტა ხნით ადრე შეხვდა. “ყველაფერი, რაზეც ერთად გვეცინებოდა, ხანდახან უაზრობებიც კი, ამ სევდიან მომენტში მახსენდება. ჩვენ ერთად ავისრულეთ ყველა გიჟური ოცნება და ეს მოგონებები ჩემთვის მუდამ ძვირფასი იქნება. ის სიახლოვე და მეგობრობა, რაც ჩვენ გვქონდა, ცხოვრების განმავლობაში ხშირად არ ხდება,” — დაწერა ჰორანმა.
ასევე დაგაინტერესებთ:
