ჩვენს რესპონდენტს ბრენდის დაარსების იდეა მას შემდეგ გაუჩნდა, რაც ამერიკიდან დაბრუნდა. იდეა და მიზანი თავიდანვე ქართული პროდუქციის პოპულარიზაცია იყო, შესაბამისად, სახელწოდებაც აქედან გამომდინარე შეარჩია და დღესდღეობით ბრენდი – სახელით – „ქართველი“ – ოპერირებს. როგორია მისი ჩამოყალიბებისა და განვითარების ეტაპები, „ქართველის“ დამფუძნებელი ირინა გვეტაძე გვიამბობს.
გაგვაცანით ბრენდი „ქართველი“. როდის ჩამოყალიბდა და გამოჩნდა საზოგადოების წინაშე?
„ქართველი“, როგორც ბრენდი, 2019 წელს ჩამოყალიბდა. ახალი დაბრუნებული ვიყავი ამერიკიდან, სადაც დავამთავრე უნივერსიტეტი. მონატრებული ვიყავი საქართველოს და პატრიოტული სულისკვეთება მქონდა გაღვივებული, ამიტომ მინდოდა რაიმე ქართულის შექმნა. დავიწყე სპორტული სამოსის წარმოება და ჰუდებზე დავატანე წარწერა – „ქართველი“. მინდოდა სიმბოლური დატვირთვა ჰქონოდა ლოგოს სახით და ბევრი ძიების შემდეგ არჩევანი შევაჩერე უძველესი კაბალას დამწერლობის თილისმების ნიშანზე. ვარაუდობენ, რომ ეს არის ერთ-ერთი ასტროლოგიური ნიშანი, რომელიც ფშავ-ხევსურეთისა და თუშეთის პიქტოგრამებისა და ფარული ნიშნების მსგავსია. ჯერ კიდევ იკვლევენ მსგავსებას ამ მიმდინარეობაში. ეს ყველაფერი ერთად შეიკრა და 2019 წელს საკმაოდ დიდი პოპულარობა მოიპოვა. მაშინ თითქოს არ იყო სპორტული სამოსი ასეთი პოპულარული, თუმცა კოვიდის პერიოდიდან ძალიან მოთხოვნადი და აქტუალური გახდა.
რას სთავაზობთ საზოგადოებას?
საზოგადოებას ვთავაზობთ მათზე მორგებულ პროდუქციას. ვცდილობთ დავაკმაყოფილოთ მათი გემოვნება, სტილი და ხარისხი. როდესაც მომხმარებელი კმაყოფილია, ეს ნიშნავს, რომ შენ მას შესთავაზე მისთვის მისაღები მოდელი და ფასი. გვაქვს როგორც მზა პროდუქცია, ასევე ინდივიდუალური მომსახურება. გვინდა საზოგადოებას დავუმტკიცოთ, რომ ქართული ასოცირდება ხარისხთან, რადგან ყველანაირი პირობა და რესურსი გვაქვს იმისთვის, ვაწარმოოთ უმაღლესი ხარისხის პროდუქცია როგორც ქვეყნის შიგნით, ასევე ფარგლებს გარეთ.
რა სტილის სამოსს სთავაზობთ საზოგადოებას?
„ქართველს“ აქვს სპორტული და კლასიკური ხაზი. ხელმისაწვდომია როგორც ქალბატონებისა და მამაკაცებისთვის, ასევე ბავშვებისთვის. ვერგებით მომხმარებლის მოთხოვნებს ზომების, პარამეტრების, მოდელისა და ფერების მიხედვით.
რაც შეეხება კლასიკირ სამოსს, ქალის ხაზში გაცილებით ფართო არჩევნი გვაქვს. კოლექციაში წარმოდგენილია როგორც საზაფხულო კაბები, ქვედაბოლოები, შორტები, ასევე ვმუშაობთ კლასიკური შარვლებისა და პერანგების დამატებაზე. ზაფხულიდან ჩვენს მომხმარებლებს შევთავაზებთ უმაღლესი ხარისხის, ულამაზეს და ძალიან დახვეწილ აბრეშუმის ხაზს.
რა სახის ქსოვილებს იყენებთ?
ქსოვილების საკმაოდ ფართო არჩევანი გვაქვს. დამოკიდებულია სეზონზე თუ რა იკერება. ზაფხულში დაუთბილავ ბამბის ქსოვილებზე ვმუშაობთ ორძაფიანი და სამზაფიანი ქსოვილებით, რომელსაც ვიწერთ როგორც საქართველოში, ასევე საზღვარგარეთ. ზაფხულში არჩევანს აბრეშუმის ქსოვილებზე ვაკეთებთ. ზამთარში დათბილულ ბამბის ქსოვილზე იზრდება მოთხოვნა, რადგან სპორტულებისთვის შეუცვლელია ცივ ამინდებში.
რა ნიშა აქვს ბრენდს ბაზარზე?
ბრენდი „ქართველის“ ნიშა თავიდან ძალიან სპეციფიკურ აუდიტორიაზე იყო გათვლილი, რადგან მხოლოდ სპორტული სამოსის წარმოებით დავიწყეთ. თუმცა, იქიდან გამომდინარე, რომ გაიზარდა პროდუქციის დასახელება, შესაბამისად, გაიზარდა მომხმარებლების მასშტაბი. ამან შეცვალა ბრენდის ნიშა და ჩვენი მიზანია „ქართველი“საუკეთესო იყოს და მისი მასშტაბირება მოვახდინოთ.
გვესაუბრეთ ხარისხზე.
ბრენდი „ქართველი“ ორიენტირებულია საზოგადოების კმაყოფილებაზე. პირადად ჩემთვის ძალიან დიდი მნიშვნელობა აქვს ხარისხს და მომხმარებლის შეფასებას, შესაბამისად, ისე ვარჩევთ ქსოვილს და ნამუშევარს, როგორც საკუთარი თავისთვის. ეს საშუალებას გვაძლევს, პრეტენზია გვქონდეს მაღალ ხარისხზე და მომხმარებელს გარანტირებულად კარგი პროდუქცია შევთავაზოთ.
როგორია ბრენდის სამომავლო გეგმები?
ბრენდი „ქართველი“ მუდმივად სიახლეებს სთავაზობს მომხმარებლებს. „ქართველის“ პროდუქცია წარმოდგენილია შოურუმის სახით სხვადასხვა მაღაზიაში. აქტიურად ვმუშაობთ ონლაინ, თუმცა ახლო მომავალში იგეგმება პერსონალურად „ქართველის“ მაღაზიის გახსნაც.
