სულ რაღაც სამი თვის წინ ფიბიმ განაცხადა, რომ ბრუნდება, LVMH-სთან ხელშეკრულებას მოაწერა ხელი და საკუთარი ბრენდის კრეატიული დიზაინერი გახდება. მოდის სუპერკონკურენტულ სფეროს „მაჯისცემა“ მას შემდეგ „არ ესინჯება“, რადგან მისი დაბრუნება ბევრი ბრენდისთვის უბრალოდ განაჩენია. თავისუფლად შეიძლება ითქვას, რომ ბოტეგას ფენომენური გაყიდვები აუცილებლად დაეცემა. რატომ? იმიტომ, რომ ფიბის სულისკვეთებაზე იდგა მთელი ბრენდი. როდესაც ფიბიმ წასვლა გადაწყვიტა, რამდენიმე დიზაინერმა მისი არყოფნით გამოწვეული ვაკუუმი უცებ ამოავსეს, ფიბის სტილში შესრულებული სამოსით. ზოგიც პირდაპირ, უტიფრად იპარავდა ძველი სელინის სამოსს და ახლებური ელემენტებით სთავაზობდა მყიდველებს. მაგრამ ფიბის ერთგული მომხმარებლები ერთგულად ელოდნენ მის დაბრუნებას.
ფიბი მზადაა ახალი სიტყვა შესთავაზოს მის ერთგულ მომხმარებელ გოგონებს. ფიბის ფენომენი ჩემთვის ძალიან საინტერესოა. მისი უნარი, რომ 1500 ევროდ ჩვეულებრივ სვიტერი გაყიდოს, ყოველთვის მაოცებდა − ამას ხომ ცალკე მოხერხება სჭირდება!
თავდაპირველად, გავიხსენოთ მისი საქმიანობა „ქლოეში“. ერთი სიტყვით დავახასიათებ − სასწაული. როგორც კი დატოვა ბრენდი, „ქლოემ“ აქტუალურობა დაკარგა და დღემდე ვერ დაიბრუნა. მისი მისვლა სელინში იყო რევოლუციური. ქალის სამოსი შეიცვალა, შემოვიდა მამაკაცური მინიმალისტური ფორმები. ძლიერი ქალის იმიჯი, რომელსაც ნახევრადშიშველი სიარული არ სჭირდება იმისთვის, რომ ყურადღება მიიქციოს (ივ სენ ლორანისგან განსხვავებით). სელინის გოგო არის მკაცრი ფორმებით, ორიგინალური სილუეტებით, მამაკაცური შტრიხებით და მოულოდნელი ელემენტებით. საბოლოო ჯამში, სელინის გოგო ყველაზე საინტერესოა ყველგან და ყოველთვის.
რთულია პროგნოზი გააკეთო, რას უნდა ველოდეთ ახლა ფიბისგან, მაგრამ რაც უნდა იყოს, დარწმუნებული ვარ, 5 ან 10 წელიწადში უკვე ყველგან ტრენდული იქნება. რადგანაც ასეთია ფიბი − ის ხედავს, როგორ უნდა გამოიყურებოდეს დამოუკიდებელი ძლიერი ქალი. ქალი, რომელსაც უყვარს მოდა, ექსპერიმენტები და რაც მთავარია − საკუთარი თავი. ეს ლოგიკურიცაა. წარმოიდგინეთ, რამდენად უნდა გიყვარდეთ საკუთარი თავი, რომ ასეთი ძვირადღირებული სამოსი იყიდოთ. ძალიან ცალსახად.
