კორონავირუსისგან გამოწვეულმა პანდემიამ მსოფლიო ტურიზმის ინდუსტრია სრულიად სხვა მიმართულებით დაატრიალა და თვალწინ ჩვენთვის უჩვეულო რეალობა გადაგვიშალა. აქამდე თუ მხოლოდ ბილეთის შეძენის შემთხვევაში შეგვეძლო უამრავ ქვეყანაში გვემოგზაურა, დღესდღეობით ძალიან ბევრი წინაღობისა და სირთულის წინაშე აღმოვჩნდით.
გარკვეული პერიოდის განმავლობაში სხვადასხვა ქვეყანას შორის მიმოსვლა სრულიად აიკრძალა და ამან განსაკუთრებული გავლენა იმ ადამიანებზე მოახდინა, ვისთვისაც მოგზაურობა ძალიან მნიშვნელოვან როლს ასრულებდა − როგორც საქმიანი, ასევე ტურისტული თვალსაზრისით.
არცთუ შორეულ წარსულში მსგავსი ისტორიების შესახებ მხოლოდ ფილმებში ან წიგნებში თუ ამოვიკითხავდით, და ისიც იმდენად არარეალურად გვეჩვენებოდა, რომ ბევრ ჩვენგანს ღიმილსაც კი გვგვრიდა. ახლა კი ჩვენი ყოველი დილა პანდემიასთან დაკავშირებული სიახლეების გაცნობით იწყება.
როგორც უკვე აღვნიშნეთ, მთელი ამ დროის განმავლობაში საზოგადოება უამრავი ცვლილების, მოთხოვნისა თუ შეზღუდვის წინაშე აღმოჩნდა. რასაკვირველია, რთულად შესაგუებელი იყო ნებისმიერი ჩვენგანისთვის − პანდემიის დასაწყისიდან დღევანდელ დღემდე უამრავი ეტაპი გავიარეთ და ყველა მათგანს შესაბამისი განცდა და ემოცია უკავშირდება, მაგრამ დადებითი კუთხითაც თუ შევხედავთ, ვირუსმა ბევრი რამ გადაგვაფასებინა და დროის, ჩვენი ყოველდღიური ცხოვრების ფასი გვასწავლა. გარდა ამისა, ძალიან ბევრმა გადაწყვიტა ქვეყნის შიგნით ემოგზაურა და მისი სამშობლოს ღირსშესანიშნაობები უკეთ გაეცნო.
„კოვიდ“-პასპორტი ტურიზმის აღდგენის მთავარ მექანიზმად მოგვევლინა და დღეს უკვე შესაძლებელია სხვადასხვა ქვეყანას ვესტუმროთ − რასაკვირველია, ამა თუ იმ რეგულაციის დაცვით.
