სინგაპურში მდებარე ორქიდეის ბაღი ერთ-ერთი ყველაზე სურნელოვანი და ულამაზესი ადგილია, რომელსაც აუცილებლად უნდა ეწვიოს ადამიანი. აქ თქვენ შეხვდებით ხეივნებს, აუზებს, ნაკადულებს, თაღებს, ბილიკებს, შადრევნებს… და ეს ყველაფერი საოცარ სანახაობას ქმნის ნებისმიერი მნახველისთვის.
პარკი დაახლოებით 3 ჰექტარ ფართობს მოიცავს. დიზაინერებმა საინტერესო ნაბიჯები გადადგეს ბაღის ინტერიერზე მუშაობისას. გასაოცარი სანახავია 4 ზონა, რომელთაგან თითოეული გარკვეულ სეზონს ასახავს.
ღია ცისფერ და თეთრ ზონაში შესვლისას, მაშინვე მიხვდებით, რომ ეს ზამთრის გამომხატველ ტერიტორიას ეკუთვნის. თუ ნარინჯისფერი და ნათელი ოქროსფერი „მძვინვარებს“ გარშემო, ესე იგი შემოდგომაა. ზაფხული იასამნისფერი და წითელი ფერებითაა გამოხატული, ხოლო გაზაფხული − ყვითელი და მომწვანო ფერებით.
სინგაპურის ყვავილების პარკში თითქმის 60 000 ორქიდეას შეხვდებით. მებაღეები მუდმივად აახლებენ კოლექციას ახალი ჯიშებით, რომლებიც მიწოდებულია სხვადასხვა ქვეყნიდან.
ორქიდეების გასაოცარი ჯიშები, რომლებიც ყველას ნუსხავენ საკუთარი სილამაზით, მრავალი ცნობილი პიროვნების სახელს ატარებენ. მათ შორის არის თეთრი ფერის, ულამაზესი „პრინცესა დაიანა“ და ნაზი ვარდისფერი − „დედოფალი ელისაბედი“.
