18 წლის შემდეგ, ჯგუფი „ბზიკები“ სცენაზე ბრუნდება – დღეს საღამოს ევროვიზიის ოფიციალურ YouTube-არხზე მათი ახალი სიმღერის, ,,On Replay”, ვიდეორგოლის პრემიერა შედგება. სიმღერა, რომელსაც ისევ ჯგუფის ბავშვობის კომპოზიტორი, გიგა კუხიანიძე ქმნის, ხელოვნურ ინტელექტსა და თანამედროვე ეპოქაში ადამიანის როლს ეხება.
საქართველოს ევროვიზია 2026-ზე სწორედ საბავშვო ევროვიზია 2008-ის გამარჯვებული ჯგუფი „ბზიკები“ წარადგენს. მუსიკალური ჯგუფის წევრები არიან გიორგი შიოლაშვილი, მარიამ თათულაშვილი და მარიამ კიკუაშვილი. მათ პოპულარობა ბავშვობაში მოიპოვეს, როდესაც 2008 წელს საქართველოს სახელით საბავშვო ევროვიზიის კონკურსში გაიმარჯვეს.
ჯგუფი 2008 წელს თბილისში ჩამოყალიბდა. თავდაპირველად წევრები ინდივიდუალურად მონაწილეობდნენ შიდაშესარჩევ კონკურსში, თუმცა ჟიურის გადაწყვეტილებით ერთ გუნდად გაერთიანდნენ. იმ პერიოდში „ბზიკები“ კონკურსის ყველაზე ახალგაზრდა მონაწილეები მხოლოდ 10 წლისები იყვნენ.
„ბზიკებმა“ შიდაშესარჩევი ტური თბილისში დიდი უპირატესობით მოიგეს და 2008 წლის საბავშვო ევროვიზიაზე, კვიპროსის ქალაქ ლიმასოლში მე-6 ნომრად წარდგნენ. მათი სიმღერა ორიგინალურობითა და ენერგიით გამოირჩეოდა, რის შედეგადაც ჯგუფი გამარჯვებულად გამოაცხადეს და საბავშვო ევროვიზიის ისტორიაში საქართველოს პირველი გამარჯვება მოუტანეს.
თბილისში გამართულ 2025 წლის საბავშვო ევროვიზიაზე წარმოდგენილი პერფორმასის შემდეგ მაყურებელს დიდი სურვილი გაუჩნდა, რომ ზუსტად ,,ბზიკები” გამოსულიყვნენ 2026 წლის ევროვიზიაზე საქართველოს სახელით. დაახლოებით 18-წლიანი მუსიკალური პაუზის შემდეგ „ბზიკები“ სცენაზე ბრუნდებიან უკვე ახალი მუსიკალური ხედვითა და შემოქმედებითი სტილით. საზოგადოებრივი მაუწყებლის გადაწყვეტილებით, ჯგუფი საქართველოს ევროვიზია 2026-ზე ავსტრიის დედაქალაქ ვენაში წარადგენს.
ასევე დაგაინტერესებთ
#OK! ევროვიზია 2026-ზე საქართველოს ჯგუფი „ბზიკები“ წარადგენს
