ახალი წლის დადგომა ყველა ქვეყანაში სხვადასხვა, უცნაურ და სიმბოლურ ტრადიციებთან ასოცირდება. სწორედ ეს განსხვავებები ქმნის თითოეული ქვეყნის უნიკალურობას. მოდით განვიხილოთ ბრაზილიის უჩვეულო და სახალისო საახალწლო ტრადიციები.
რადგან ახალ წელს ბრაზილიაში ზაფხულია, ამინდის შესაბამისად, ბრაზილიელებიც სანაპიროებზე აღნიშნავენ საყოველთაო დღესასწაულს. შუაღამის დადგომისთანავე ადგილობრივები მიეშურებიან ოკეანისკენ, რათა შვიდი ტალღა მოიგერიონ და შვიდი სურვილიც ჩაიფიქრონ ტალღების გადალახვისას. ამ ტრადიციით ბრაზილიელები პატივს მიაგებენ ზღვისა და ოკეანის ქალღმერთ Yemanja-ს (იემაია). რიტუალის მიხედვით, წყალში ჩასვლისას ადამიანს თეთრი ფერის ტანსაცმელი უნდა ეცვას, როგორც უმანკოების, ისე იღბლისა და მშვიდობის სიმბოლოდ. ტრადიციის ნაწილია ასევე ოკეანის სანაპიროებზე სამკაულების, თეთრი ყვავილებისა და სანთლების დატოვება ქალღმერთის სახელზე მომავალი წლის კეთილდღეობის, მშვიდობისა და სიყვარულის მოლოდინით.
სამხრეთ ამერიკის სხვა ქვეყნების მსგავსად, ტანსაცმლის ფერს ბრაზილიაშიც დიდი მნიშვნელობა ენიჭება. უმეტეს შემთხვევაში, ახალი წლის თეთრი და ახალი ტანსაცმლით დახვედრაა ბრაზილიური ტრადიციისთვის დამახასიათებელი, რადგან წმინდა, აუმღვრეველ წელიწადში შებიჯებას უკავშირდება.
