თანამედროვე საზოგადოება თითქოს ორ ნაწილად არის გაყოფილი – ერთ ნაწილს ასტროლოგიის უპირობოდ სჯერა და სახლიდან არ გავა თუ ნატალურ რუკაში არ ჩაიხედა, მეორე ნაწილი კი ყოველნაირად ცდილობს თავისი ცხოვრებიდან ასტროლოგია და ეზოთერიკა გამორიცხოს. რამდენად გამოსდით არავინ იცის, რადგან ბოლო დროს ციურმა მნათობებმა საზოგადოებაში პოზიციები მყარად გაიმყარეს.
მოდის ინფლუენსერებიც არ არიან ასტროლოგიის წინააღმდეგნი და ხშირად გვთავაზობენ, რა უნდა ჩავიცვათ ჩვენი ზოდიაქოს ნიშნის მიხედვით. დღეს კი გთავაზობთ გავარკვიოთ, რომელი ნივთები უნდა მოიცილოთ გარდერობიდან.
ვერძი (21 მარტი — 20 აპრილი)
ვერძები სამართლიანად ატარებენ ყველაზე ვნებიანი და იმპულსური ნიშნის ტიტულს, ამიტომ მკვეთრი სამოსი ძალიან უყვართ, თუმცა ხანდახან ავიწყდებათ, როდის უნდა გაჩერდნენ. თუ ამ სიტყვებში საკუთარ თავს ამოიცნობთ, უარი თქვით მანათობელ ფერებსა და გამომწვევ პრინტებზე. თქვენი ქარიზმა იმდენად თვალშისაცემია, რომ დამატებითი მცდელობა აშკარად ზედმეტია.
კურო (21 აპრილი — 21 მაისი)
კუროები კომფორტის სიყვარულით არიან ცნობილნი, თუმცა ეს კომფორტი ისე არ უნდა გამოიყურებოდეს, თითქოს სახლიდან პლედშემოხვეული გამოხვედით. გადახედეთ თქვენს გაწელილ სვიტერებსა და გაცვეთილ სპორტულ შარვლებს და სასწრაფოდ მოიცილეთ. სჯობს ეს ნივთები ტრენდული ტრიკოტაჟის კომპლექტებით ან მყუდრო ნაქსოვი კაბებით ჩაანაცვლოთ.
ტყუპები (22 მაისი — 21 ივნისი)
ტყუპები ნამდვილი ავანტიურისტები არიან, რომლებსაც ნებისმიერი სიტუაციიდან თავის დაძვრენა შეუძლიათ, თუმცა გახსოვდეთ, რომ თქვენი მთავარი მტერი იმპულსური შოპინგია. თუ ახალი სამოსი კარადში უკვე ნახევარი წელია, ჩაუცმელად დევს და „განსაკუთრებულ შემთხვევას“ ელოდება, დროა დაემშვიდობოთ. თქვენი გარდერობი თქვენს პიროვნებას უნდა გამოხატავდეს და არა შემთხვევით განწყობებს.
კირჩხიბი (22 ივნისი — 22 ივლისი)
კირჩხიბები ძალიან ემოციურები არიან და ყურადღების ცენტრში ყოფნა და გამორჩეულობა მოსწონთ, ამის ერთ-ერთი გზა კი ტანსაცმელია. ტანზე ჩამოკიდებული„ოვერსაიზი“ კირჩხიბი სტილი ნამდვილად არ არის. დიდი ზომის ჰუდებსა და მაისურებში ისინი ნაკლებად თავდაჯერებულები არიან და ცდილობენ ტანზე მჭიდროდ მომდგარი სამოსი მოირგონ.
ლომი (23 ივლისი — 21 აგვისტო)
ლომმა გოგონებმა კარგად იციან საკუთარი თავის ფასი და ნაკლებს არასდროს დასჯერდებიან. ისინი ყოველთვის იდეალურად გამოიყურებიან, იქნება ეს შარვალი-კოსტიუმი თუ რომანტიკული კაბა. ამ ცეცხლოვანი ნიშნის წარმომადგენლებისთვის დაფლეთილი ჯინსები, ნახვრეტებიანი სვიტერები, როკერული მაისურები და მსგავსი ნივთები მიუღებელია. ასეთ სამოსში ლომები არაბუნებრივად და რაც მთავარია, მოუწესრიგებლად გამოიყურებიან.
ქალწული (22 აგვისტო — 23 სექტემბერი)
ასტროლოგები ამბობენ, რომ ქალწული ყველაზე პრაქტიკული, გონიერი და თავშეკავებული ნიშანია. ამ ნიშნის წარმომადგენლები ემოციებს იშვიათად ავლენენ, მაგრამ გარშემო მყოფებს თავიანთი იდუმალებით აჯადოებენ. მიუხედავად ამისა, უარი უნდა თქვან ზედმეტად მკაცრ კოსტიუმებზე, რომლებიც მათ იმიჯს კიდევ უფრო მნიშვნელოვანს ხდის. სჯობს ყურადღება თავისუფალ (oversize) სამოსზე გააკეთოთ, რაც თქვენს ხასიათს გააწონასწორებს.
სასწორი (24 სექტემბერი — 23 ოქტომბერი)
სასწორებს რადიკალური ცვლილებების მიღება უჭირთ, რის გამოც მათი კარადა ხშირად „კომპრომისების კოლექციად“ იქცევა ხოლმე. მოიშორეთ ის ნივთები, რომლებიც მხოლოდ დაქალის ან კონსულტანტის რჩევით იყიდეთ. გარდერობი თქვენ უნდა მოგწონდეთ და არა თქვენს მრჩევლებს.
მორიელი (24 ოქტომბერი — 22 ნოემბერი)
მუქი ფერები კლასიკაა, მაგრამ თქვენს კარადას უენსდეი ადამსის გარდერობად ნუ გადააქცევთ. მოიშორეთ სამოსი, რომელიც ვიზუალურად გაბერებთ და ყოველდღიურობას ზედმეტ დრამატიზმს სძენს. რა თქმა უნდა, ყველა შავ ნივთს ნუ გადაყრით, უბრალოდ მათ ნაცრისფერი, შოკოლადისფერი, ცისფერი ან მწვანე ელემენტები დაამატეთ.
მშვილდოსანი (23 ნოემბერი — 22 დეკემბერი)
ქაშმირის კოსტიუმები და თბილი სვიტერები მშვილდოსნის თამამ ხასიათს საერთოდ არ შეეფერება. „შინაურულ სამოსში“ ამ ცეცხლოვანი ნიშნის წარმომადგენლები დაახლოებით ისე მოჩანან, როგორც მგელი ცხვრის ტყავში. იქნებ სჯობდეს, ყურადღება უფრო გამბედავ, ანიმალისტური პრინტის მქონე ნივთებზე შეაჩეროთ?
თხის რქა (23 დეკემბერი — 20 იანვარი)
თხის რქები შრომისმოყვარეები, დისციპლინირებულები და მიზანდასახულები არიან, კარიერა კი მათ პრიორიტეტებში პირველ ადგილს იკავებს. თუმცა, ბევრი ერთნაირი ნივთი მათ გარდერობს მოსაწყენს ხდის. დაემშვიდობეთ რამდენიმე ერთნაირ თეთრ მაისურს და ადგილი რაიმე უფრო თამამს დაუთმეთ.
მერწყული (21 იანვარი — 19 თებერვალი)
ასტროლოგები მერწყულს ყველაზე თავისუფლებისმოყვარე ნიშნად მიიჩნევენ. მათი იძულება შეუძლებელია, რადგან ყველაფერს გულით აკეთებენ. მიუხედავად ამისა, სამოსში ზედმეტად გამომწვევ ნივთებს უნდა მოერიდონ. გამჭვირვალე კაბების, მჭიდრო კორსეტებისა და ზედმეტად მოკლე ქვედაბოლოების გამო, ისედაც ეპატაჟური მერწყულები შესაძლოა, ვულგარულად გამოიყურებოდნენ.
თევზები (20 თებერვალი — 20 მარტი)
თევზები ყველაზე მეოცნებე და კეთილი ნიშანია. ისინი ყველაფერში კარგის დანახვას ცდილობენ, ამიტომ, „გრანჟის“ სტილს უნდა მოერიდონ. უხეშ ტყავის ქურთუკებში, დახეულ ჯინსებსა და დაკემსილ პერანგებში ამ ნიშნის წარმომადგენლები ცოტა უცნაურად გამოიყურებიან.
ასევე დაგაინტერესებთ
#OK! მოდური ჰოროსკოპი – რომელი ეპოქის სტილი შეგეფერებათ ზოდიაქოს ნიშნის მიხედვით
