„მის ფინეთს“, სარა ძაფჩეს რასისტული ფოტოს გამო ტიტული და გვირგვინი ჩამოართვეს – ინფორმაციას BBC News-ი ავრცელებს.
სკანდალი სოციალურ ქსელში გამოქვეყნებულ ფოტოს მოჰყვა, სადაც 22 წლის სილამაზის დედოფალი თითებით თვალების კუთხეებს წევს, რათა ისინი უფრო ვიწრო და დახრილი გამოჩნდეს. ფოტოს წარწერაც ახლდა – „ჩინელებთან ერთად მივირთმევ“.
იაპონიაში, სამხრეთ კორეასა და ჩინეთში „მის ფინეთის“ პოსტი რასისტულად შეაფასეს. გოგონამ თავის მართლება სცადა და განაცხადა, რომ ეს ჟესტი თავის ტკივილის გამო გააკეთა. მან და ეროვნული სილამაზის კონკურსის ორგანიზატორებმა მოგვიანებით ბოდიშიც მოიხადეს, თუმცა სკანდალი მაინც გაგრძელდა. ფოტოზე კომენტარი ფინეთის პრემიერ-მინისტრმაც კი გააკეთა და სილამაზის დედოფლის ჟესტი დაუფიქრებელ და სულელურ ნაბიჯად შეაფასა.
გოგონამ რასისტული ფოტოს გამო ბოდიში მოიხადა და აღნიშნა, რომ მან „ბევრ ადამიანში უარყოფითი რეაქცია გამოიწვია“.
„მე ასეთი განზრახვა არ მქონია… ჩემთვის ადამიანების, მათი წარმომავლობისა და განსხვავებების პატივისცემა ძალიან მნიშვნელოვანია“, – დაწერა სარამ Instagram-ის პოსტში.
სარას ბოდიშმა მიზანს ვერ მიაწია. მას ბევრმა „არაგულწრფელი“ უწოდა, რადგან ფინურ ენაზე იყო დაწერილი. სამაგიეროდ, სილამაზის დედოფალს მხარდაჭერა ფინეთის პარლამენტის ორმა მემარჯვენე წევრმა გამოუცხადა – მათ გამოაქვეყნეს ფოტოები, სადაც ძაფჩეს ჟესტს იმეორებენ.
ადგილობრივი მედიის ცნობით, ახლა პარტია „ფინელი“ განიხილავს, უნდა დაეკისროთ თუ არა პარლამენტის წევრებს მათი ქმედებების გამო სანქციები.
საბოლოოდ, „მის ფინეთის“ კონკურსის ორგანიზატორებმა სარა ძაფჩესთვის ტიტულის ჩამორთმევა გადაწყვიტეს.
„როდესაც ადამიანს ეროვნული და საერთაშორისო წარმომადგენლის როლი ეკისრება, მისი ქმედებები და პასუხისმგებლობა განუყოფელია“, – ნათქვამია მათ განცხადებაში.
:format(webp)/nginx/o/2025/12/14/17339913t1h44c9.jpg)
ასევე დაგაინტერესებთ
