ნარგიზ მაჰმუდოვა 26 წელია ფარმაცევტულ სფეროში საქმიანობს. საკუთარი ფარმაცევტული კომპანიის გახსნა დაგროვილმა გამოცდილებამ და საქმის სიყვარულმა გადააწყვეტინა. კომპანია MIRO Pharma 2011 წლიდან ოპერირებს საქართველოს ბაზარზე და მომხმარებლისთვის ხელმისაწვდომს ხდის უმაღლესი ხარისხის მედიკამენტებს. კომპანიის შესახებ უფრო ვრცლად ნარგიზი ჟურნალ OK!-ის ესაუბრა.
უპირველესად გაგვეცანით და გვესაუბრეთ, თუ რატომ გადაწყვიტეთ ფარმაცევტული კომპანიის დაარსება?
პროფესიით ექიმი-პედიატრი ვარ, დავამთავრე აზერბაიჯანის სამედიცინო უნივერსიტეტი ბაქოში. შემდეგ 6 თვე ვიმუშავე პედიატრად, მაგრამ მალევე დავიწყე მუშაობა ფარმაცევტულ კომპანიაში. მაშინ ეს სფერო ახალი მიმართულება იყო და ძალიან დავინტერესდი, თან ახლოს იყო ჩემს განათლებასთან. მას მერე 26 წელი გავიდა, არაერთ უცხოურ კომპანიაში მიმუშავია სხვადასხვა თანამდებობაზე, მათ შორის 6 წელი – აზერბაიჯანში, 5 წელი – უკრაინაში და 13 წელი – საქართველოში. ამ დროის მანძილზე შევძელი ქართული ენის სწავლაც. მესმის, ვსაუბრობ და ვკითხულობ ქართულად, რაც ძალიან მომწონს, მსიამოვნებს და რასაკვირველია, საქმეშიც მეხმარება.
დაგროვილმა გამოცდილებამ, ცოდნამ და საქართველოს სიყვარულმა გადამწყვეტინა ჩემი კომპანია შემექმნა. ფარმაცევტულმა კომპანია MIRO Pharma 2011 წლიდანაა ბაზარზე, თუმცა 2022 წელს მოვახდინეთ რებრენდინგი.
რას სთავაზობთ საზოგადოებას?
უპირველესად მინდა აღვნიშნო, რომ ჩვენი პარტნიორები არიან მსოფლიოში წამყვანი ფარმაცევტული კომპანიები, რომლებიც მუდმივი კვლევების, მრავალწლიანი გამოცდილების საფუძველზე ქმნიან ინოვაციურ პროდუქტებს.
საზოგადოებას ვთავაზობთ მაღალი ხარისხის მედიკამენტებს, საკვებ დანამატებს, ამას გარდა ხარისხიან მენეჯმენტს. მოგეხსენებათ, ფარმაცევტულ ბაზარზე დიდია კონკურენცია, თუმცა ჩვენ ამ ხნის განმავლობაში მოვახერხეთ საზოგადოების ნდობის მოპოვება და ეს, რა თქმა უნდა, ჩვენთვის უდიდესი სტიმულია, რათა უფრო განვვითარდეთ და რაც შეიძლება მეტი ინოვაციური პროდუქცია იყოს ხელმისაწვდომი მომხმარებლისთვის.
როგორი ხელმძღვანელი ხართ?
ვცდილობ ვიყო ობიექტური და სამართლიანი, მაგრამ სიტუაციის მიხედვით შეიძლება საკმაო სიმკაცრეც გამოვიჩინო. ამ კითხვაზე, ალბათ, ჩემი თანამშრომლების პასუხი იქნებოდა საინტერესო.
აქვე მინდა აღვნიშნო პროფესიონალთა ის გუნდი, რომელიც MIRO Pharma-ს ქმნის. ისინი მუდმივად ითვალისწინებენ მომხმარებლის მოთხოვნებს.
რა არის საჭირო წარმატებისთვის?
პირველ რიგში, მონდომება და, რა თქმა უნდა, დიდი შრომა. აუცილებელია მუდმივი განვითარება და საკუთარ თავზე მუშაობა, ახლის სწავლა. ამ ყველაფერთან ერთად საჭიროა ცოტა იღბალიც.
სამომავლო გეგმები
კომპანიის მიზანია ადამიანის ჯანმრთელობისთვის უსაფრთხო და ხელმისაწვდომი პროდუქტების შეთავაზება. ასევე, ვფიქრობ ფარმაცევტული სფეროს მუშაობაში ინოვაციების შემოტანას.
ტექსტი: სოფიო მალანია
ფოტო: ალექსეი სეროვი
