#OK! Mami - დეკორატიული და საყოფაცხოვრებო ნივთები თქვენი სახლისთვის

Mami დეკორატიული და საყოფაცხოვრებო ნივთების მწარმოებელი კომპანიაა, რომელიც 2020 წელს ჩამოყალიბდა და მომხმარებელს სთავაზობს როგორც ქართულ, ასევე ევროპულ სტილში შექმნილ ნაკეთობებს. ჟურნალი OK! ბრენდის დამფუძნებელ თათა ჯანჯალიას ესაუბრა, რომელმაც უფრო ვრცლად გვიამბო Mami-ს საქმიანობის შესახებ.

გვიამბეთ კომპანიის შესახებ. რამდენი ხანია რაც ქართულ ბაზარზე გამოჩნდა?

კერამიკის სახლი Mami („მამი“) 2020 წელს ჩამოყალიბდა და პირველი სარეალიზაციო ნაწარმი ბაზარზე ონლაინგაყიდვების ფორმით აგვისტოში წარმოადგინა.

რას სთავაზობთ მომხმარებლებს?

მოცემულ ეტაპზე Mami დეკორატიულ და საყოფაცხოვრებო ნივთებს აწარმოებს. მომხმარებელს ვთავაზობ როგორც ქართულ, ასევე ევროპულ და შერეულ ხაზს. Mami ინარჩუნებს ქართულ ტრადიციულ მიმართულებას და ამავდროულად, ქმნის ახალ და თანამედროვე კერამიკულ ნაწარმს.

ვინ ქმნის ნამუშევრებს?

ნამუშევრებს ვქმნი მე. ასევე მინდა აღვნიშნო, რომ მყავს მცირე გუნდი, რომელიც მეხმარება ნამუშევრების ჩამოსხმაში (თიხის სუსპენზია/თხევადი თიხა ისხმება ყალიბებში), გაწმენდასა და გამოწვაში. თითოეული ნამუშევარი ამოყვანილი, ყალიბში ჩასხმული თუ გამოძერწილი უნდა დამუშავდეს ზუმფარის ქაღალდითა და ნამიანი ღრუბლით. ჩემი გუნდის გარეშე ამ საქმიანობის წარმართვა ძალიან გამიჭირდებოდა და თითოეული ეს ადამიანი „მამის“ ნაწილია.

რა შეიძლება იყოს ინსპირაციის წყარო მუშაობის პროცესში?

ნებისმიერი რამ შესაძლოა გახდეს ინსპირაციის წყარო: ილუსტრირებული წიგნი, ბუნება, ქუჩის არტი, გრაფიკული ილუსტრაცია, მუზეუმის ექსპონატი, სხვა არტისტების ნამუშევრები ა.შ. გარდა ამისა, ბევრი ძველი ჟურნალი და ფოტო მაქვს შენახული ინსპირაციისთვის.

ვინ არიან თქვენი ძირითადი მომხმარებლები?

ჩემი მომხმარებლები არიან 25-დან 55 წლამდე ქალები და მამაკაცები. რომელთაც საშუალო და მაღალი შემოსავალი აქვთ.

როგორ ხდება შეკვეთა და შემდეგ პროდუქციის მომხმარებლამდე მიწოდება?

ამ ეტაპზე მხოლოდ ონლაინგაყიდვები მაქვს და სოციალური ქსელის საშუალებით ხდება ნივთების რეალიზება. ასევე ვთანამშრომლობ სხვადასხვა კომპანიასთან, რომელთა დახმარებით პროდუქცია ონლაინ იყიდება. მაქვს etsy-ის მაღაზიაც და ნაკეთობების ნაწილი საზღვარგარეთ იყიდება.

სამომავლო გეგმები.

სამომავლოდ უპირველესად მსურს საკუთარი ვებგვერდის შექმნა და worldwide delivery-ის დამატება. ბევრი ახალი იდეა მაქვს, რომელთა განხორციელებას აუცილებლად ვაპირებ. გპირდებით ძალიან ბევრ სიახლეს და ლამაზ ნაკეთობებს.