მაკა ჯაბუა წლებია “ლიდერ ქალთა საზოგადოების” აქტიური წევრია, პროფესიული მოღვაწეობით კი ფლორისტ-დიზაინერი და ივენთ-დეკორატორია, რომელმაც ზუგდიდში დააფუძნა და ამჟამად ხელმძღვანელობს ყვავილების სალონს „MJ FASHION”. მისი პროფესიული წარმატება და ბიზნესში მიღწეული შედეგები აღიარებულ იქნა “ლიდერ ქალთა საზოგადოების” ჟურნალის “Business Women Magazine”-ის მიერ, სადაც მაკა ერთ-ერთი ტირაჟის გარეკანზე იყო წარმოდგენილი. როგორც შემოქმედებითი და მიზანდასახული პიროვნება, მაკა ჯაბუა არ ჩერდება და სამომავლოდ ბევრი საინტერესო გეგმა აქვს, რომელთა განხორციელებით სასიამოვნო სიახლეებს გვპირდება, იგი გვიზიარებს თავის ცხოვრებისეულ და პროფესიულ გზას, გვესაუბრება ლიდერ ქალთა საზოგადოების, წარმატებების, გამოწვევებისა და სამომავლო გეგმების შესახებ.
უპირველესად გაგვეცანით.
მე, მაკა ჯაბუა, ვარ მეუღლე, ორი შვილის დედა და სამი შვილიშვილის ბებია. მიხარია, რომ ცხოვრებაში ვაკეთებ იმას, რაც ჩემს სულს და გულს ავსებს. ვამაყობ, რომ ვარ MJ Fashion-ისა და MJ Flowers-ის დამფუძნებელი – ბრენდებისა, რომლებიც არა მხოლოდ ესთეტიკას და სილამაზეს ეძღვნება, არამედ სითბოსა და ემოციასაც ატარებს. ამჟამად ვცხოვრობ ზუგდიდში და ყოველდღიურად ვცდილობ, ჩემი საქმიანობით ბედნიერება შევმატო ჩემს კლიენტებსა და გულშემატკივრებს.
თუ აკეთებ საქმეს, რომელიც გულით გიყვარს, მაშინ ეს უბრალოდ სამუშაო აღარ არის – ეს შენი ცხოვრებისეული მოწოდებაა.
თქვენი გამოცდილებისა და კარიერული გზის შესახებ გვიამბეთ.
თავდაპირველად მხოლოდ ოცნება და სურვილი მქონდა, ყვავილების ფერადი სამყარო ახლოს გამეცნო და ის ბიზნესად მექცია. სწორედ ამიტომ, MJ Flowers-ის შექმნა ჩემთვის ერთ-ერთი ყველაზე ემოციური და ამაღელვებელი ნაბიჯი იყო. ამ სფეროში მოვსინჯე საკუთარი თავი და დღეს უკვე ოთხი წელია, რაც ყვავილების სალონის დირექტორი ვარ.
“ყვავილები მხოლოდ მცენარეები არ არის – ისინი შეგრძნებებია, რომლებიც სიტყვების გარეშეც ამბობენ ყველაფერს.”
რა არის თქვენი ძირითადი საქმიანობა?
პირველი ნაბიჯი ყოველთვის ყველაზე რთულია. ყველაფერი, რაც დასაწყისს უკავშირდება, სავსეა გამოწვევებით, მაგრამ ამავდროულად, უდიდეს სიამოვნებასაც მანიჭებს. შრომითა და რუდუნებით გავიკვლიე გზა ამ სფეროში და როგორც პიროვნულად, ასევე პროფესიულადაც გავიზარდე. ბიზნესი მხოლოდ მოგება არ არის – ის თავდაუზოგავი შრომაა, ოცნებების ახდენისა და საკუთარი შესაძლებლობების აღმოჩენის პროცესი.
მაქვს ფუფუნება, რომ ჩემი ოჯახის წევრები გვერდით მიდგანან. მათი მხარდაჭერა ჩემთვის ფასდაუდებელია. ეს მმატებს თავდაჯერებულობას, რომ უფრო გაბედულად შევხვდე ახალ გამოწვევებს.
რა იყო მოტივაცია იმისა, რომ გაგევლოთ ის გზა, რომელმაც აქამდე მოგიყვანათ.
ჩემი მთავარი მოტივატორი ბავშვობის ოცნებაა. ეს ოცნება ყოველთვის მაძლევდა ძალას, რომ შეუძლებელი შესაძლებლად მექცია.
თქვენი მიზნები და სამომავლო გეგმები გაგვიზიარეთ.
და აი, ახალი გამოწვევა – მალე გაიხსნება MJ სალონი! ეს იქნება სივრცე, სადაც სილამაზე, მოდის ხელოვნება და ესთეტიკა ერთმანეთს შეხვდება. ვმუშაობ იმაზე, რომ MJ სალონი არა მხოლოდ მომსახურების ხარისხით, არამედ საკუთარი უნიკალური სტილითაც გამორჩეული იყოს. ეს იქნება ადგილი, სადაც ადამიანები თავს განსაკუთრებულად იგრძნობენ.
“სილამაზე არ არის მხოლოდ გარეგნობა – ის მდგომარეობაა, რომელიც ადამიანს შიგნიდან ანათებს.”
დიდ მადლობას ვუხდი „ლიდერ ქალთა საზოგადოებას”, რომლის მხარდაჭერაც ჩემთვის ძალიან მნიშვნელოვანი აღმოჩნდა. მათი დახმარებით, არაერთი ფასეული ცოდნა და გამოცდილება მივიღე.
მხარდაჭერილი ქალი – ძლიერია, ხოლო ძლიერი ქალი – შეუჩერებელი!
საოცარი განცდაა, როდესაც იცი, რომ გარშემო არიან ადამიანები, რომლებიც შენს გზას შთაგონებით და სითბოთი ავსებენ.
MJ Fashion, MJ Flowers და MJ Salon – ეს არის ჩემი გზა, ჩემი ოცნებების ახდენის პროცესი.
ეს მხოლოდ დასაწყისია…
პარტნიორი კომპანიის კონტენტი
