ლინდა ევანჯელისტა კანადელი ვარსკვლავი და 90-იანი წლების საკულტო სუპერმოდელია, რომელიც არაერთხელ აღიარეს მსოფლიოს ერთ-ერთ ყველაზე გავლენიან ფიგურად. ლინდამ კარიერული მოღვაწეობის განმავლობაში 700-ზე მეტი ჟურნალის გარეკანი დაამშვენა. საზოგადოება მას ხშირად ლეგენდარული ფოტოგრაფის სტივენ მეისელის „მუზად“ მოიხსენიებს.
ევანჯელისტას სამოდელო კარიერა 1984 წელს დაიწყო, როდესაც მან კონტრაქტი სამოდელო სააგენტო Elite Model Management-თან გააფორმა და მშობლიური კანადიდან ამერიკაში, ნიუ-იორკში გადავიდა საცხოვრებლად. 1988 წელს ლინდამ თმის ვარცხნილობა პიტერ ლინდბერგის რჩევით შეიცვალა, რის შემდეგაც მისი ორიგინალური და საკულტო სტილი ყველასთვის მის პიროვნებასთან ასოცირდებოდა, მას სახელიც კი უწოდეს The Linda.
ევანჯელისტას „მოდის ინდუსტრიის ქამელეონი“ შეარქვეს. ის გახდა 90-იანი წლების 5 ყველაზე დიდებული სუპერმოდელებიდან ერთ-ერთი. 1980-იანი წლების ბოლოს და 1990-იანი წლების დასაწყისში ლინდა მსოფლიოს ყველაზე ცნობილ ხალხთა რიცხვში შედიოდა. Fashion File-ის შოუში მაყურებელთა გადაწყვეტილებით ევანჯელისტა 2008 წელს „ყველა დროის ყველაზე დიდებულ სუპერმოდელად“ დასახელდა.
ყველასთვის მოულოდნელი იყო პერიოდი, როდესაც ლინდა ევანჯელისტა მოდის სამყაროდან სრულიად გაქრა. მან საზოგადოებას მრავალწლიანი საიდუმლო გაუმხილა და აღმოჩნდა, რომ მიზეზი, რის გამოც 90-იანი წლების საკულტო სუპერმოდელი ინდუსტრიაში მოღვაწეობას ჩამოშორდა კოსმეტიკური პროცედურა და მისი შედეგები აღმოჩნდა.
Zeltiq’s CoolSculpting-ის კოსმეტიკური პროცედურა გულისხმობდა დაბალი ტემერატურის გამოყენებით ცხიმის უჯრედების დაშლას, თუმცა სუპერმოდელის განცხადებით მის სხეულში ცხიმოვანი ქსოვილი უფრო გაიზარდა. უჯრედების დეფორმაციის შემდეგ ლინდას “პარადოქსული ცხიმოვანი ჰიპერპლაზია” განუვითარდა, რის გამოც მან წონაში საგრძნლობლად მოიმატა.
ჯანმრთელობის პრობლემებმა და რადიკალურმა გარეგნულმა ცვლილებამ ევანჯელისტა დეპრესიაში ჩააგდო, თუმცა როგორც სუპერმოდელმა აღნიშნა, საკუთარი ისტორიის მოყოლას ამ ამბით არ დაასრულებდა. მან CoolSculpting-ის კომპანიას სასამართლოში უჩივლა და მორალური და ფიზიკური ზიანისთვის 50 მილიონი დოლარი მოითხოვა.
„ყოველთვის მიყვარდა პოდიუმზე გასვლა, მაგრამ ახლა მეშინია იმის, რაც შეიძლება დავინახო. აღარ მინდა ვიმალებოდე და შიშში ვცხოვრობდე. გადავწყვიტე, რომ ამ ყველაფერზე ღიად ვისაუბრო“.
„მე ვცდილობდი თავად მომეგვარებინა ეს პრობლემა, ვერ ვხვდებოდი რას ვაკეთებდი არასწორად, დავიწყე დიეტა და ვარჯიში, მაგრამ შედეგს ვერ მივაღწიე. საბოლოოდ, როდესაც ექიმთან მივედი და ვუთხარი რა ხდებოდა, მითხრა, რომ არანაირი შიმშილი და ვარჯიში ამ პრობლემას ვერ გადაჭრიდა. დამისვეს დიაგნოზი, რომელიც ძალიან იშვიათ ადამიანებს ემართებოდათ. მსოფლიოში 11 მილიონი მსგავსი პროცედურა ჩატარებულა, თუმცა აღნიშნული შედეგი მხოლოდ 1%-ზე ნაკლებს ჰქონია“.
ევანჯელისტა დაუკავშირდა თავის ექიმს, რომელმაც აწარმოა მოლაპარაკება CoolSculpting-თან, კომპანიამ განაცხადა, რომ „ყველაფერს გამოასწორებდა“ და შესთავაზა მათ ლიპოსაქციის გაკეთება. პროცედურამდე ცოტახნით ადრე ლინდას დაუკავშირდნენ და უთხრეს, რომ ხელი უნდა მოეწერა კონფიდენციალურობის შეთანხმებაზე, თუმცა ლინდამ ამ ყველაფერზე უარი თქვა, მან ლიპოსაქციის ორი ოპერაცია გაიკეთა, რომლებისთვისაც 2016 წელს ლინდას თქმით ფული გადაიხადა.
„არანაირი შედეგი არ ჰქონია ამ ოპერაციებს, მეშინოდა სარკეში ჩახედვის, რადგან ადამიანი, რომელსაც ვხედავდი ჩემს თავს არ ჰგავდა. ვფიქრობდი, რომ არცერთი დიზაინერი არ მოინდომებდა ჩემთან თანამშრომლობას“.
ყველაზე გავლენიანი მოდური გამოცემის რედაქტორმა ანა ვინტურმა People–თან საუბრისას აღნიშნა, რომ „იყო დრო, როდესაც ლინდაზე პოპულარული სუპერმოდელი არ არსებობდა“. ვინტურმა ევანჯელისტა საკულტო ჟურნალის გარეკანზე 11-ჯერ მოახვედრა.
„რატომ ვგრძნობთ საჭიროებას, რომ ჩვენი სხეული არ არის იდეალური და გვჭირდება რამით შევცვალოთ ის? ყოველთვის ვიცოდი, რომ ასაკი მომემატებოდა და ისიც ვიცოდი, რომ ორგანიზმში ბევრი ცვლილება მოხდებოდა,მაგრამ არ მეგონა, ასეთი თუ გავხდებოდი. ვეღარ ვცნობ ჩემს საკუთარ თავს, ვერც გარეგნულად, ვერც პიროვნულად. ჩემი აზრით, ლინდა ევანჯელისტა, როგორც სუპერმოდელი გაქრა“.
„მე იმედი მაქვს, რომ ამ ჩრდილიდან გამოვალ და დავეხმარები ადამიანებს, რომლებიც მსგავს სიტუაციებში არიან. ეს არის ჩემი მიზანი, აღარ მინდა ტირილი, აღარ მინდა დამალვა, ვაპირებ გავაგრძელო ცხოვრება და დავეხმარო როგორც ჩემს საკუთარ თავს, ასევე სხვებსაც. ჩემთვის ახალი ცხოვრება იწყება“.
