Lefform Concrete Georgia ერთადერთი კომპანიაა საქართველოში, რომელიც ბეტონისგან დამზადებულ ავეჯს სთავაზობს საზოგადოებას როგორც შიდა ინტერიერისთვის, ასევე ექსტერიერისთვის. კომპანიამ უკვე წლებია, რაც წარმოება დაიწყო, თუმცა როგორც ბრენდი, ერთი წლის წინ ჩამოყალიბდა და უამრავი მომხმარებელიც გაიჩინა. ჟურნალი OK! Lefform Concrete Georgia-ს დამფუძნებელ ნიკა ლეფსაიას ესაუბრა, რომელმაც უფრო ვრცლად გაგვაცნო კომპანიის კონცეფცია.
ნიკა, გვიამბეთ ბრენდის დაარსების შესახებ.
პროფესიით არქიტექტორ-დიზაინერი ვარ და უკვე 15 წელია, რაც კონკრეტულ პროექტებზე ვმუშაობ. ჩემი ერთ-ერთი დამკვეთის მოთხოვნა იყო ბეტონის ნიჟარის დამონტაჟება, რომელიც იტალიიდან 900 ევროდ ჩამოვიტანე. გარკვეული დროის შემდეგ კიდევ ერთმა დამკვეთმა მოითხოვა ბეტონის ნიჟარა, რომლის ფასიც 1200 ევრო იყო. სწორედ აქედან გამიჩნდა იდეა, საკუთარი ხელით დამემზადებინა ყალიბები და შემექმნა ბეტონის პროდუქცია, მომხმარებლის სურვილიდან გამომდინარე.
დასაწყისისთვის მოვიძიე გერმანული წარმოების მასალები, რომლებიც აღნიშნული პროდუქციის დამზადებაში მესაჭიროებოდა, დავამზადე ორი ყალიბი და საკუთარ სახლში დავიწყე ნიჟარების ჩამოსხმა. თავდაპირველ ეტაპზე დაახლოებით 8 ცალი გავყიდე 250 ევროდ. ფასში საკმაოდ დიდი სხვაობა იყო და მოთხოვნაც შესაბამისად გაიზარდა ამ მიმართულებაზე.
რამდენი ხანია, რაც Lefform Concrete Georgia ბაზარზე გამოჩნდა, როგორც კომპანია?
2021 წლის თებერვალში დავაარსე კომპანია. 3 თვის განმავლობაში ვმუშაობდი ყალიბებზე, რაც საკმაოდ ძვირადღირებული სიამოვნებაა და ამასთანავე ძალიან შრომატევადია. ჩემი ახლობლებისა და სამეგობრო წრის დახმარებით შევძელი, მოკლე დროში განმეხორციელებინა და დასაწყისისთვის დაახლოებით 5 ყალიბი დამემზადებინა. მოგვიანებით თავადაც ვისწავლე ყალიბების დამზადების ხელობა და დღესდღეობით დამოუკიდებლად ვამზადებ, დამკვეთის სურვილიდან გამომდინარე.
ამ ყველაფერში განსაკუთრებული წვლილი ჩემმა მეგობარმა და პარტნიორმა − დავით ახვლედიანმა შეიტანა. დაახლოებით ერთი წლის წინ მასთან მივედი და შევთავაზე ჩემ მიერ მოფიქრებული იდეა, თავადაც საკმაოდ დიდი გამოცდილება ჰქონდა საწარმოო სფეროში და მას შემდეგ ერთად შევუდექით ამ საქმის წარმოებას.
მხოლოდ ბეტონზე მუშაობთ?
ამ ეტაპზე ვიყენებთ მხოლოდ ბეტონს, ხოლო მომავალში ვგეგმავთ ხისა და რკინის დამატებას, თუმცა ბრენდის მთავარ ნიშად რასაკვირველია დარჩება ბეტონი.
გვესაუბრეთ ხარისხზე უფრო ვრცლად.
ხარისხი, როგორც უკვე აღვნიშნე, არის უმაღლესი. ვიყენებთ 900-მარკიანი გერმანული წარმოების მასალას, რომელიც გამოიყენება ხიდებისა და მდგრადი საჭიროების მქონე პროდუქციის დასამზადებლად. ახლა გადავდივართ შვეიცარიული წარმოების კომპანიაზე, რომელიც კიდევ უფრო გაუმჯობესებულ ფუნქციებს გვთავაზობს.
სად მდებარეობს საწარმო და სად შეგვიძლია პროდუქციის შეძენა?
საწარმო მდებარეობს ქალაქ რუსთავში, 600 კვადრატულ მეტრ ფართობზე. ვმუშაობთ ჩვენ ორნი და საჭიროების შემთხვევაში გვეხმარება 5 ადამიანი. სამომავლოდ რასაკვირველია ვაპირებთ გაზრდას და უფრო მეტი ადამიანის დასაქმებას.
რამდენიმე მაღაზიაში გვაქვს ჩვენი პროდუქცია შეტანილი, თუმცა მოცულობიდან გამომდინარე წარმოდგენილია არასრული რაოდენობით. ამიტომ პროდუქციის დათვალიერება და შეძენა შესაძლებელია ონლაინ, სადაც მომხმარებელი სრულ ასორტიმენტს იხილავს.
გვესაუბრეთ პროდუქციაზე, რომელსაც საზოგადოებას სთავაზობთ.
ჩვენთან შესაძლებელია მომხმარებელმა შეიძინოს სხვადასხვა ფორმისა და ზომის ხელსაბანი ნიჟარები, კედელზე გასაკრავი ფილები, ძალიან განსხვავებული და ინდივიდუალური ფორმის ბეტონის სავარძლები. ასევე გვაქვს აუზში ჩასადგმელი შეზლონგები, მაგიდები; ვაპირებთ ახალი ფორმის სავარძლებისა და კედელზე გასაკრავი ფილების დამატებასაც.
რამდენად დიდია მოთხოვნა ქართულ ბაზარზე?
ამ ეტაპზე ბევრად დიდია მოთხოვნა, ვიდრე ეს ერთი და ორი წლის წინ იყო, ვინაიდან საზოგადოებამ გაიცნო ჩვენი კომპანია და ამან რა თქმა უნდა გაზარდა ცნობადობა.
ჩემთვის მნიშვნელოვანი იყო უპირველესად არქიტექტორებსა და დიზაინერებს გაეცნოთ ჩვენი პროდუქცია, რადგან მათი მხრიდან მომხმარებლამდეც მიდის ინფორმაცია Lefform Concrete Georgia-ს შესახებ.
გვესაუბრეთ უპირატესობებზე.
ყველა ის ფორმა, რომელსაც ადამიანი ჩვენს საწარმოში იხილავს, ჩემ მიერაა მოფიქრებული, დამუშავებული და შექმნილი. შესაბამისად უპირატესობა ესეც არის, რადგან ნამუშევრები ინდივიდუალური და ყველასგან განსხვავებულია. გარდა ამისა, ბეტონის პროდუქცია არ არის გათვლილი ფართო ასორტიმენტზე, რადგან ამ კონკრეტულ ნაკეთობას კონკრეტული მომხმარებელი და ინტერესთა ჯგუფი ჰყავს.
სამომავლო გეგმები.
მოგეხსენებათ ასეთი ტიპის წარმოებით მხოლოდ ჩვენ ვართ წარმოდგენილი ქართულ ბაზარზე და სამომავლოდ ვაპირებთ მომხმარებლისთვის ბევრად ახალი და ინოვაციური პროდუქციის შეთავაზებას. ამასთანავე, საწარმოს კიდევ უფრო გაფართოებას და შოურუმის გახსნას.
ბეტონის პროდუქციასთან დაკავშირებით უამრავი იდეა და გეგმა გვაქვს. ვმუშაობთ რამდენიმე კონკრეტულ ფორმაზე, რადგან ძალიან აქტუალური და მოთხოვნადია ბეტონის ვიზუალი.
გვსურს შევქმნათ ჩვენი ხაზი და ეტაპობრივად გადავიდეთ სერიულ წარმოებაზე, რაც თავისთავად ექსპორტზე გატანასაც მოიცავს.
FB: Lefform Concrete Georgia
Insta: lefform_concrete_georgia
Mail: [email protected]
Tel: 557 18 88 81
