ბირკინის ორიგინალი შავი, ტყავის ჩანთა 8.6 მილიონ ევროდ (10 მილიონი დოლარი) გაიყიდა და Sotheby’s – ის აუქციონზე ყველაზე ძვირადღირებულ ჩანთად დასახელდა. ეს არის პირველი Birkin, რომელიც Hermès-ის მიერ ჯეინ ბირკინისთვის, ბრიტანელი მსახიობისა და მომღერლისთვის, შეიქმნა. ის ჩანთას ყოველდღიურად იყენებდა, 1985-დან 1994 წლამდე.
1984 წელს, ტიერი ერმესის შვილთაშვილი და Hermès-ის ხელმძღვანელი ჟან-ლუი დიუმა პარიზიდან ლონდონში ფრენისას ბირკინს გვერდით მიუჯდა. ჯეინს ნივთებით გატენილი, დიდი ნაქსოვი კალათა ეჭირა, რომელიც დიუმას დაეცა. მსახიობი ერთ-ერთ ინტერვიუში იხსენებს, როგორ უთხრა მამაკაცს ხუმრობით, რომ ჩემოდნის ზომის ჩანთა სჭირდებოდა, ჟან-ლუიმ კი უპასუხა – ,,მაშინ დამიხატე”. ჯეინმა ესკიზი გაატანა, ხოლო ჩანთა საჩუქრად 1985 წელს მიიღო.
Sotheby – მ წინასწარი შეფასება არ გაამჟღავნა, თუმცა აუქციონის დაწყებამდე ჩანთაზე უკვე 1 მილიონი ევროს ოდენობის წინასწარი ფსონი იყო დადებული, რაც რეკორდული მაჩვენებელია. ათ წუთიან ბრძოლაში, ცხრა კოლექციონერს შორის, იაპონიელმა კოლექციონერმა გაიმარჯვა.
Sotheby’s – ის ხელმძღვანელმა, მორგან ჰალიმიმ, ეს გაყიდვა მოდის ისტორიაში მნიშვნელოვან ეტაპად შეაფასა:
„ეს არის შთამბეჭდავი მაგალითი იმისა, თუ როგორ შეუძლია განსაკუთრებულ ნივთს კოლექციონერთა ვნება გააღვიძოს”.
ბირკინი ორიგინალი ჩანთა უამრავ, გაცილებით მდიდრულ ვერსიაზე ძვირად გაიყიდა, მაგალითად, 2022 წელს Sotheby – ის მიერ გაყიდულ თეთრი ბრილიანტებით მორთულ, Diamond Himalaya Birkin-ზე.
ჯეინ ბირკინმა ჩანთა 1994 წელს გაყიდა, რათა თანხა შიდსის კვლევებისთვის გადაერიცხა. მას შემდეგ რამდენჯერმე კერძო მფლობელის ხელში გაიარა, თუმცა გამოფენებზე მაინც ხვდებოდა – ნიუ-იორკის თანამედროვე ხელოვნების მუზეუმში, ლონდონის ვიქტორია და ალბერტის მუზეუმში. ბოლო მფლობელი Catherine B იყო, რომელმაც განაცხადა:
„გაყიდვა იმ ემოციის გამეორებაა, როცა თავად ვიბრძოდი ჩანთის მოსაპოვებლად. გრძნობა მაშინაც და ახლაც აუხსნელია“.
ჯეინ ბირკინი 2023 წელს, 76 წლის ასაკში გარდაიცვალა. მან ერთ-ერთ ინტერვიუში ხუმრობით აღნიშნა:
„როცა მოვკვდები ალბათ მხოლოდ ჩანთის გამო გამიხსენებენ”.
ბირკინის კოლექციონერები ჩანთებს უძრავ ინვესტიციებად განიხილავენ, თუმცა ჯეინის ჩანთა პრაქტიკულობისთვის შეიქმნა, რაზეც მისი ისტორიაც მეტყველებს, ამიტომ საინტერესოა რა ბედი ეწევა ამ უნიკალურ ნივთს.
