იმ სამყაროში, სადაც ქალებს სილამაზის სტანდარტებს გვიწესებენ, უმეტესობა ჩვენგანი ცდილობს არ ჩამორჩეს ამ ყველაფერს. არაფერია ცუდი იმაში, გინდოდეს გამოიყურებოდე უფრო ლამაზად, თუმცა სანამ რაიმეს შეცვლას ან შელამაზებას გადავწყვეტთ, აუცილებელია ვიცოდეთ, თუ ვის ვანდობთ ჩვენს სახეს და რომელი პრეპარატით ვიკეთებთ ამა თუ იმ პროცედურას. ჩემთვის მნიშვნელოვანია ბოლომდე ვენდობოდე სპეციალისტს და მან ამომწურავად გამაცნოს ყველაფერი. სწორედ ასეთი ინფორმაცია გაუზიარა #OK!-ის დერმატო-კოსმეტოლოგმა ქეთა დიასამიძემ, რომელიც თამამად შეიძლება ითქვას, რომ ორიენტირებულია ხარისხზე და როგორც თავად აღნიშნავს, ქეთასთვის აუცილებელია პაციენტთან გულწრფელობა, ეს ყველაფერი კი განსაზღვრავს მის პროფესიონალიზმს.
სად დაეუფლეთ პროფესიას?
უნივერსიტეტი დერმატოლოგიის განხრით სტამბოლში დავამთავრე, ასევე, პარალელურად 3 წლის განმავლობაში ვსწავლობდი კოსმეტოლოგიას. სწავლა ახლახან დავასრულე, სამუშაო გამოცდილებაც თურქეთში, კერძოდ კი სტამბოლში მივიღე.
რა არის მნიშვნელოვანი წარმატების მისაღწევად?
წარმატების მისაღწევად უპირველეს ყოვლისა მიზანია საჭირო. სურვილი იმისა, იყო შემდგარი ადამიანი და შეძლო ადამიანებს მისცე ის, რაც მათ ძალიან სჭირდებათ. მე მჯერა, რომ თითოეულ ჩვენგანს შეუძლია ნებისმიერი სურვილი და ოცნება რეალობად აქციოს. მე პირადად 3 წლიდან ვოცნებობდი იმაზე, რასაც ახლა ვაკეთებ და ზუსტად ვიცოდი, რა მინდოდა.
რა სახის პროცედურებს სთავაზობთ პაციენტებს?
პაციენტებს ვთავაზობ სხვადასხვა პროცედურას, როგორიცაა ფილერით ინიექცია − ტუჩის შევსება/გალამაზება, ბოტოქსით ინიექცია − ნაოჭების საწინააღმდეგო. ბიორევიტალიზაცია, მეზოთერაპია, სახისა და ტანის მოდელირება.
როგორია თქვენი სილამაზის ფორმულა? თავად როგორ უვლით სახის კანს?
წლის დასაწყისში ვიკეთებ მეზოთერაპიის კურსს, ასევე, ზაფხულამდე აუცილებლად ბიორევიტალიზაციას. რაც შეეხება თავის მოვლას, ვიყენებ როგორც ცნობილ ბრენდებს, ისე ჩემ მიერ დამზადებულ პროდუქციას. ორ კვირაში ერთხელ ვიკეთებ ზედაპირულ პილინგს, უსათუოდ კარგად ვიტენიანებ კანს, ვიყენებ დღისა და ღამის ნიღბებს და აუცილებლად თვალის შრატს. დღის განმავლობაში ვიღებ იმდენ წყალს, რამდენიც ჩემი ორგანიზმისთვის საკმარისია.
გვესაუბრეთ პაციენტებისადმი თქვენს მიდგომაზე.
პაციენტებს ყოველთვის დიდი ყურადღებით ვუსმენ. მაქსიმალურად ვცდილობ გავითვალისწინო მათი სურვილები და შევძლო ყველა შედეგით კმაყოფილი და ბედნიერი გავუშვ. ძალიან ბევრი შეკითხვა აქვთ ხოლმე, არიან პაციენტები, რომლებსაც ინიექციური კოსმეტოლოგია პლასტიკურ ქირურგიაში ერევათ. აი, მაგალითად, ჰგონიათ, რომ ცხვირის რინომოდელირება ამ პატარა ნემსით რინოპლასტიკის შედეგს მისცემთ. სწორედ ამიტომ ვცდილობ თავიდანვე გავიგო მათი სურვილები, რათა სწორად მივაწოდო ინფორმაცია.
გვესაუბრეთ შედეგებზე და მომსახურების ხარისხზე.
ნებისმიერი პროცედურა გარკვეული დროის შემდეგ გაიწოვება. რეაბილიტაციას დაახლოებით 3 დღიდან 1 თვემდე სჭირდება, დამოკიდებულია იმაზე, თუ რა სახის პროცედურას ვაკეთებთ. ხარისხს რაც შეეხება, დიდი ხანია საქართველოში არ ვიძენ პრეპარატებს − ყველაფერი თურქეთიდან შემომაქვს, აუცილებლად მაღალი ხარისხის პრეპარატები. მინდა ხაზგასმით აღვნიშნო, რომ აუცილებელია პრეპარატი პაციენტის თვალწინ გაიხსნას. ჩემთან არცერთი პრეპარატი არ იყოფა რამდენიმე პაციენტზე. ამას ხაზს იმიტომ ვუსვამ, რომ ხშირად მეკითხებიან, ვყიდი თუ არა ერთეულებს? − არა, რა თქმა უნდა, რადგან ფილერი ბაქტერიის მატარებელია, ჩვენ შეყვანამდე ასპირაციებს ვაკეთებთ, რითაც შეიძლება პაციენტის ინფიცირება. ამიტომაც მე ვიზღვევ თავს და გახსნილ პრეპარატს რამდენიმე პაციენტზე არ ვყოფ.
უხარისხო ფილერის გამოყენებამ რა სავალალო შედეგამდე შეიძლება მიიყვანოს პაციენტი?
ნეკროზი, ფტოზი, კუნთის დაზიანება… შესაძლოა გაჭრაც დასჭირდეს. ამიტომაც მე არ ვმუშაობ დაბალი ხარისხის პრეპარატებით.
რას ურჩევდით პაციენტებს?
უპირველესად ვურჩევ, მიაქციონ ხარისხს ყურადღება. სპეციალისტს აუცილებლად უნდა ჰქონდეს სამედიცინო განათლება. შეამოწმეთ ვადები და მოითხოვეთ თქვენ თვალწინ გაიხსნას ყველა პრეპარატი, რის შემდეგაც აირჩიეთ საუკეთესო. იყავით ბედნიერები, იცხოვრეთ სიყვარულში, რადგან სტრესი აუცილებლად ჩვენს სახეზე აისახება. მინდა ყველა ისეთი ლამაზი იყოს, როგორც შინაგანად გრძნობენ თავს.
სამომავლო გეგმები…
ძალიან მალე გაიხსნება ჩემი ესთეტიკური ცენტრი, სადაც უმაღლესი ხარისხის პროცედურებს ჩაატარებენ კვალიფიცირებული სპეციალისტები. ასევე, წელს ისევ ვაბარებ გამოცდებს და მივდივარ ქირურგიაში, რაც უდიდეს სიამოვნებასა და წარმატების სურვილს მგვრის. მინდა ყოველდღე ვვითარდებოდე და ვიზრდებოდე თქვენს სამსახურში.
საკონტაქტო ინფორმაცია:
Instagram: dr.ketadiasamidze
ტექსტი: სოფიო მალანია
ფოტო: გიორგი კალანდაძე
