დღეს ჩვენი საუბრის თემა არის სიყვარული და ბედნიერება. ჩვენი რესპონდენტი კი გახლავთ პროფესორი, გინეკოლოგ/რეპროდუქტოლოგი, „ზურაბ საბახტარაშვილის რეპროდუქციული კლინიკის“ ხელმძღვანელი, საქართველოში კოგნიტურ-შემეცნებითი არტის დამფუძნებელი და ბედნიერების ელჩი – არსენ გვენეტაძე. მან ჩვენთან პოზიტიური აზროვნებისა და მომავალი თაობის სიყვარულით აღზრდის აუცილებლობაზე ისაუბრა.
ბატონო არსენ, 2018 წლიდან ხართ „ბედნიერების ელჩი“…
2018 წელს მიუნხენში, ე.წ ფილარმონიაში, სადაც ჩემი კოგნიტურ-ვიზუალური არტის გამოფენაც მქონდა და 500-კაცამდე ეტევა, მიწვეული ვიყავი დოკუმენტური ფილმის პრემიერაზე, რომელიც თბილისის შესახებ გადაიღეს. ფილმში ერთ-ერთი პერსონაჟი მე ვიყავი, სწორედ ამიტომ მთხოვეს, რომ ჩვენების შემდეგ სიტყვით გამოვსულიყავი. ჩემი გამოსვლა შემდეგი სიტყვებით დავასრულე: ,,ყველა ქმედებას ბედნიერება არ მოაქვს, მაგრამ ბედნიერება არ იარსებებს ქმედების გარეშე“… ტაშის შემდეგ ქართველი სათვისტომოს ხელმძღვანელი და ფილმის რეჟისორი გამოვიდნენ და მადლიერების ნიშნად გადმომცეს სერტიფიკატი, სადაც ეწერა: „პროფესორ არსენ გვენეტაძეს – ბედნიერების ელჩს“. რა თქმა უნდა, ძალიან გამიხარდა ეს წოდება და დღესაც ვამაყობ ამით, ძალიან სასიამოვნოცაა და საპასუხიმგებლოც. სწორედ ამის შემდეგ დავაწესე ბედნიერების ჩუქების დღე, რომელიც გაზაფხულის პირველ კვირა დღეს აღინიშნება და წელს უკვე მეხუთედ აღვნიშნავთ.
თქვენთვის რა არის ბედნიერება?
რამდენიმე დღის წინ ჩემმა მეგობარმა მხატვარმა, ოთხი შვილის დედამ, რომელსაც სამხატვრო სკოლა აქვს, მითხრა – ორი სიტყვით ახსენი, რა არის ბედნიერება, რათა ჩემს მოსწავლეებს მოვამზადებინო ბედნიერებაზე ნახატები, რომლის გამოფენაც ბედნიერების ჩუქების დღეს გაიმართება, როგორც შარშანო. ჩემი პასუხი ასეთი იყო – როცა სიცოცხლე გიხარია, სწორედ ეს არის ბედნიერება.
„ბედნიერება?!
ბედნიერება დინებაა, დინამიკაა…
მოქმედებაა, სიყვარულის, სიცოცხლის ვნება…
ვნება „თავნება!“
ეს ნაწყვეტია ჩემი ერთ-ერთი ლექსიდან.
ბატონო არსენ, რაში გვეხმარება პოზიტიური აზროვნება?
ჩემი აზრით, პოზიტიური აზროვნება ენერგიის მომცემი ძალაა. ეს არის ძალა სიცოცხლის შეცნობისა, შეგრძნებისა და სიცოცხლის სიყვარულისა. პოზიტიური აზროვნება გვეხმარება, რომ არსებობა სიცოცხლედ ვაქციოთ.
„საკუთარი თავი თუ არ გიყვარს, როგორ შეიძლება ვინმე სხვა მიყვარდეს“, ეს სიტყვები თქვენ გეკუთვნით… როგორ ფიქრობთ, ბავშვს თავიდანვე უნდა ვასწავლოთ საკუთარი თავის სიყვარული?
სიყვარული ზრუნვაა. როდესაც ვინმეზე ზრუნავ, ეს გიჩენს თბილ ემოციებს და დადებითად გმუხტავს. ბავშვს თავიდანვე უნდა ვასწავლოთ, რომ მას უნდა უყვარდეს საკუთარი თავი, თუ გვინდა, რომ დაკარგული თაობა არ გვყავდეს.
დარჩენილი სიცოცხლის მთავარ მიზნად (იკიგაე) გავხადე შემდეგი: მომავალი თაობის ფსიქოემოციური და მენტალური აღზრდისთვის ორსულების (მომავალი მშობლების) განათლება ფსიქოლოგების ჩართულობით. სწორედ ამისთვის, დავსვი ჩემი ქალიშვილი და ვაჟიშვილი, დავწერე ანდერძი, სადაც ვამბობ, რომ ჩემი ქონების გარკვეული ნაწილი მინდა ფონდს – „სიყვარული ზრუნვაა“ – დარჩეს, რომელმაც უკვე დაიწყო ორსულებთან მუშაობა. აღნიშნული ფონდის მიზანია მომავალი თაობის სიყვარულით აღზრდა, უკვე მუცლადყოფნის პერიოდიდან.
რა არის ურთიერთობაში მთავარი?
ურთიერთობებში მთავარია სიყვარულის მოვლა და გრძნობის გაფრთხილება. სიყვარული ზრუნვაა, ხოლო სხვაზე ზრუნვა უკვე ბედნიერებაა. მეოთხე წელია, სიყვარულის შესახებ პროზას ვწერ, რომელსაც ჰქვია „თავისუფალი სიყვარულის მოვლა“. „სხვად ყოფნის ნიჭი“ „თავისუფალი სიყვარულის“, თავისი და სხვისი ემოციების, ემოციური ინტელექტის ფლობის ნიჭიერებაა!!!
ოჯახს!
მიყვარხართ, ვგიჟდები თქვენზე,
სიცოცხლე ახია ჩემზე!
დაბოლოს, თქვენს საქმიანობასაც შევეხოთ… რა ადგილი უჭირავს თქვენს პროფესიას თქვენს ცხოვრებაში?
ბევრჯერ მითქვამს, ათჯერ რომ დავიბადო, ათივეჯერ ექიმობას, რეპროდუქტოლოგიას ავირჩევდი. ჩემი პროფესია უსაზღვროდ მაბედნიერებს. მიმაჩნია, რომ ბედნიერების 85% ადამიანურ ურთიერთობაშია, ხოლო 15% – პროფესიაში. ჩემი პროფესია კი 100%-თ მაბედნიერებს, რადგან იგი თავისთავად მოიცავს ადამიანებთან, მათ შორის ახალგაზრდა წყვილებთან ურთიერთობას. ჩვენი გუნდი წელიწადში 700-ზე მეტ ახალ სიცოცხლეს ქმნის, 2023 წელს კი რეკორდული იყო ეს ციფრი – 791 ახალი სიცოცხლე. როგორ შეიძლება ჩემი პროფესია არ მაბედნიერებდეს?!
მიმაჩნია, რომ რეპროდუქტოლოგია „სიმშვიდის ბედნიერებას“ ნიშნავს, რომ თუ ექიმი სწორად აუხსნის პაციენტს თანამედროვე რეპროდუქტოლოგიის შესაძლებლობებს, იმას, თუ მის ორგანიზმს წლების განმავლობაში კვერცხუჯრედის მარაგის, სპერმის ხარისხის, მილების გამავლობის, საშვილოსნოს ფორმისა და ფუნქციური მდგომარეობის მიხედვით რა სჭირდება, პაციენტს ეცოდინება, რომ, ვთქვათ, ბუნებრივი მეთოდით რამდენიმე თვე შეიძლება მოიცადოს, შემდეგ კი უპრიანია მიმართოს თანამედროვე არტტექნოლოგიებს.
მე უსაზღვროდ მიყვარს ჩემი პროფესია, სიყვარული კი ჩემთვის ღმერთივითაა: „ღმერთი ჩემშია და მე ვარ ღმერთში…“
ასევეა სიყვარული, ის ჩემშია და მე ვარ მასში!
ვფიქრობ, ესაა თავისუფლების მწვერვალი საკუთარ თავში!
ტექსტი: სოფიო მალანია
ფოტო: მაკა მეგრელიძე
