პრინცი ჰარი დიდ ბრიტანეთში დაბრუნების შესაძლებლობას განიხილავს. ამის შესახებ მან გასულ კვირას, WellChild Awards-ის დაჯილდოების ცერემონიაზე მიანიშნა, თუმცა ამბობენ, რომ მეფე ჩარლზ III ამისთვის მზად არ არის.
ცნობილია, რომ სასექსის ჰერცოგი ახლახან სამშობლოს ეწვია, რომ საქველმოქმედო ღონისძიებათა სერიაში მონაწილეობა მიეღო. შეხვედრებს შორის პრინცმა კლარენს-ჰაუსში მისვლა და მამის ნახვა შეძლო, რასაც ფართო განხილვები მოჰყვა.
ახლახან ცნობილი გახდა, რომ WellChild-ის დაჯილდოებისას ჰარიმ ჯოს სტოუნთან ისაუბრა. პრინცი დაინტერესდა გაუჭირდა თუ არა მომღერალს სამშობლოში დაბრუნება და რას ფიქრობს ის ბრიტანულ სკოლებზე, რაც გამოცემა Page Six-ის აზრით, მინიშნება იყოს პრინცის სამშობლოში შესაძლო დაბრუნებაზე.
„ჰარი ბრიტანული სკოლების უპირატესობაზე და იმაზე საუბრობდა, როგორ მნიშვნელოვანია ბავშვებისთვის საზოგადოება. სასიამოვნო იყო ამის გაზიარება პრინცისთვის, რადგან ჩვენი სამშობლოში დაბრუნების მიზეზი სწორედ ის იყო, რომ გვინდოდა, ბავშვები ოჯახისა და მეგობრების გარემოცვაში, უსაფრთხო გარემოში გაზრდილიყვნენ. ჰარი ძალიან კეთილი და უბრალოა, როგორც ყოველთვის. ის შეიძლება დაბრუნდეს, რაც ცუდი არ იქნებოდა,“ – განაცხადა მომღერალმა.
სამეფო ოჯახის ექსპერტები აცხადებენ, რომ მოვლენების ასეთი განვითარება გამორიცხულია. საქმე ისაა, რომ ჰარი თავის ვალდებულებებთან დაბრუნებას არ მოისურვებს, ხოლო ჩარლზ III არ დაუშვებს, რომ ის სამეფო ოჯახის წევრი სანახევროდ იყოს. წყაროების ინფორმაციით, მეფე კატეგორიულად წინააღმდეგია, რომ ჰარიმ ოჯახის საქმეებში მონაწილეობა ნაწილობრივ მაინც მიიღოს. მას შემდეგ, რაც მამა-შვილი კლარენს-ჰაუსში შეხვდა, მონარქმა კიდევ ერთხელ დაადასტურა, რომ ელისაბედ II-ის გადაწყვეტილებების ერთგულია. დედოფალს სამეფო მოვალეობებისა და პირადი, კომერციული საქმიანობის შეთავსება დაუშვებლად მიაჩნდა, რაც ჰარის ყველა შანსს უსპობს.
„მეფე მიმტევებელი ადამიანია, მაგრამ ის გარდაცვლილი დედის პოზიციის ერთგულია და მიაჩნია, რომ სამეფო ოჯახში არ შეიძლება „ნახევრად გასული და ნახევრად დარჩენილი“ წევრები არსებობდეს“ — განუცხადა სასახლის ინსაიდერმა DailyMail-ს.
ამ შემთხვევაში პრინცი საკუთარი თავისა და ოჯახისათვის სასურველ დაცვას ვერ მიიღებს, ხოლო მის გარეშე ის ქვეყანაში ყოფნაზე უარს ამბობს.
სირთულეების მიუხედავად, ჰარი მაინც გეგმავს წელიწადში „ოთხჯერ ან ხუთჯერ“ ჩამოსვლას, რათა პირად საქველმოქმედო პროექტებში მონაწილეობა მიიღოს. მას ასევე შეეძლება მამის ნახვა, ხოლო თუ შერიგება მოხერხდა – ძმისაც, მაგრამ მხოლოდ კერძო, დახურულ შეხვედრებზე. რაც შეეხება იმას, რომ ჰარის საჯარო ღონისძიებებზე გამოჩენის ნება დართონ, ამაზე საუბარი ამჟამად არ მიმდინარეობს.
